Philippians 2

Kamba (MBIVILIA ŨVOO MŨSEO)

← Chapter 1 Jump to: Chapter 3 →

1Kwenyu kwĩthĩwa mwĩ nthĩnĩ wa Klĩsto nĩkũtumaa mwĩthĩwa mwĩ alũmu, na wendo wake nũmũkiakiasya. Mwĩ na mũamba na Veva Mũtheu, na inyw'ĩ nĩmwĩw'anĩaa tei na ĩnee.

2Kwoou yu usũsyai ngoo yakwa na ũtanu kwa kwĩkalaa mwĩ na kĩsũanĩo kĩmwe na kwendanaa o ũndũ ũmwe, na kwa kwĩthĩwa na ngoo ĩmwe na mwĩ kĩndũ kĩmwe.

3Mũikekae ũndũ mwĩanĩĩsye o itumi syenyu ene, kana mwĩthĩwe na ngathĩĩo sya mana, ĩndĩ ĩnyivasyei na mũyosaa andũ ala angĩ ta mo aseo kwĩ inyw'ĩ.

4Kĩla ũmwe wenyu ndakamanthae kwĩyĩuna o we mwene, ĩndĩ amanthae kũuna andũ ala angĩ o namo.

5Ĩthĩwai na veva ta ũla Klĩsto Yesũ waĩ naw'o.

6We o na kau aĩ Ngai vyũ, ndaaosa kwĩthĩwa eanene na Ngai ta ũndũ wa kũtindaa alũmanĩtye naw'o.

7We mwene kwa ngenda yake, nĩwatiie ũu w'onthe na eetw'a ngombo. Nĩweethĩiwe ailyĩ ũndũ ũmwe na mũndũ, na ooneka e na wũmbe wa mũndũ.

8Nĩweenyivisye mwene na eethĩwa e mwĩwi kũvika kũkw'a, ĩĩ, kũkw'a ngelany'onĩ.

9Kwa kĩtumi kĩu Ngai nĩwamũnenevisye mũno, na amũnenga ĩsyĩtwa yĩla yĩ ĩũlũ wa masyĩtwa onthe.

10Na kwoou kwa kũnenga ĩsyĩtwa ya Yesũ ndaĩa, syũmbe syonthe ila syĩ ĩtunĩ na ila syĩ kũũ nthĩ, na ila syĩ vala maveva ma ala akw'ũ mekalaa nikatulya ndu imũthaithe,

11na kĩla mũndũ nũkakũsĩĩa kana Yesũ Klĩsto nĩ Mwĩai, kwa ũkumyo wa Ngai Asa.

12Endwa makwa, inyw'ĩ mavinda onthe nĩmweethĩawa mwĩ ewi kwakwa yĩla naĩ vamwe nenyu, na kwoou yu nĩ vaasa nenyu, nĩmwaĩlĩte kwĩthĩwa mwĩ ewi mũno mbee. Kwoou thũkũmaai mwĩ na kĩkĩo na kũthĩlĩa mũvikĩe ũtangĩĩo wenyu,

13nĩkwĩthĩwa kĩla ĩvinda Ngai nũthũkũmaa nthĩnĩ wenyu, amũtonyethye kwĩthĩwa na wendi na vinya wa kwĩkaa kwenda kwake.

14Ĩkaai maũndũ onthe mũte kũnyungunyĩsya kana kũkananĩsya,

15nĩ kana mwĩthĩwe mũtaweteka ũndũ mũthũku na mwĩ atheu; syana sya Ngai ite ĩvĩtyo, na syĩkalaa katĩ wa andũ ma nthĩ athũku na eki ma naĩ. No nginya mũkenae katĩ woo o tondũ ndata itheasya matunĩ,

16kwa kwĩkalaa mũlũmĩtye ĩla ndeto ĩnenganae thayũ. Mweeka ũu ngeethĩwa ndonya kwĩkathĩĩa nenyu Mũthenyanĩ wa kũka ĩngĩ kwa Klĩsto, kana kũsemba kwakwa na kũthũkũma kwakwa kũyaĩ kwa mana.

17Mũĩkĩĩo wenyu na ũthũkũmi nĩ nthembo mumĩsye Ngai. Nĩvatonyeka ngoawa na nthakame yakwa ĩkatulũlwa ĩũlũ wa nthembo ĩsu. Ethĩwa ũu nũkwĩkĩka, nĩngwĩw'a mũyo na kũtana vamwe nenyu.

18O ta ũu o nenyu nĩmwaĩlwe nĩ kwĩw'a mũyo na kũtana vamwe nakwa.

19Nĩna mũvango wa kũtũma Timotheo kwenyu o mĩtũkĩ ethĩwa nĩkw'o kwenda kwa Mwĩai, nĩ kana ndonye kũthangaa nakwata ũvoo wenyu.

20Vai mũndũ ũngĩ nĩthengeanĩe nake take, na ũthĩnĩkaa kwa w'o ngoonĩ nĩ maũndũ menyu.

21Andũ ala angĩ mathĩnĩkĩaa maũndũ moo ene, na ti ala ma Yesũ Klĩsto.

22Ĩndĩ inyw'ĩ ene nĩmwĩsĩ ũndũ Timotheo wonanĩtye kwĩthĩwa mũndũ mũseo. We nakwa, o ta mwana na ĩthe, nĩtũthũkũmĩte vamwe kũendeesya Ũvoo Mũseo.

23Kwoou nĩmbangĩte kũmũtũma kwenyu, namina kũmanya oou ũndũ maũndũ makwa mekwĩthĩwa mailyĩ.

24Ĩndĩ nĩ na wĩkwatyo kwa Mwĩai, kana nyie mwene ngooka kwenyu o mĩtũkĩ.

25Nĩnonie no nginya nĩtũme mwana-a-asa waitũ Evavilotito kwenyu, nake atetheanĩasya wĩa nakwa na tũkitĩaa Ũvoo Mũseo ĩmwe, na nĩwe mũmũtũmĩte kũndetheeasya mavatanĩ makwa.

26E na mea maingĩ ma kũmwona inyw'ĩ inyw'onthe, na e na kĩũũyũ ngoonĩ nĩkwĩthĩwa nĩmweewie kana aĩ mũwau.

27Kwa w'o we aĩ mũwau mũno akew'a kũkw'a. Ĩndĩ Ngai nĩwamwĩw'ĩie tei, na tyo we e weka, ĩndĩ o vamwe nakwa, Ngai ndaambongela kĩmako ĩũlũ wa kĩla naĩ nakyo.

28Kwondũ wa ũu nĩngwenda mũno vyũ kũmũtũma, nĩ kana mwamwona ĩngĩ mũtonye kwĩthĩwa na ũtanu, nakwa ngĩthelwa nĩ kĩmako.

29Kwoou mũthokyei na ũtanu mwingĩ ta mwana-a-asa nthĩnĩ wa Mwĩai, na nĩmwaĩlĩte kũnenga ndaĩa andũ ma mũthemba wake.

30We aĩ vakuvĩ kũkw'a nũndũ wa wĩa wa Klĩsto, na nĩweelikĩtye mũisyonĩ nĩ kana atonye kũndetheesya vala mũtaĩ mũtonya kũndethya.

← Chapter 1 Jump to: Chapter 3 →