1 Samuel 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1NA RĨRĨ, kwarĩ mũthuri ũmwe wa itũũra rĩa Ramathaimu-zofimu, rĩa bũrũri ũrĩa wĩ irĩma nyingĩ wa Efiraimu, wetagwo Elikana, mũrũ wa Jerohamu wa Elihu, mũrũ wa Tohu wa Zufu, Mũefiraimu;

2nake aarĩ na atumia erĩ; nao ũmwe etagwo Hana, nake ũrĩa ũngĩ agetwo Penina; Penina nĩwe wakĩrĩ na ciana, no Hana ndaarĩ na ciana.

3Nake mũthuri ũcio nĩaambataga oimĩte itũũra rĩao mwaka o mwaka, agathiĩ Shilo kũinamĩrĩra Jehova, Mũnene wa Ita, amũhoe, na amũrutĩre igongona. Nao ariũ a Eli erĩ, Hofini na Finehasi, nĩo maarĩ athĩnjĩri-Ngai a Jehova kuo.

4Na rĩrĩ, mũthenya ũrĩa Elikana aarutaga igongona wakinya, akĩhe Penina, mũtumia wake, o na ciana ciake ciothe cia ihĩĩ na cia airĩtu, o wa rũgai;

5no rĩrĩ, Hana, aamũheire rũgai rũake maita merĩ, nĩ gũkorũo nĩaamwendete; no Jehova nĩaamũhingĩte nda.

6Na rĩrĩ, mũiruwe akĩmũthirĩkia, akĩmũiguithia ruo ngoro, nĩ gũkorũo Jehova nĩaamũhingĩte nda.

7Na rĩrĩa mũthuriwe ekaga ũguo mwaka o mwaka, o nake Hana akaambataga agathiĩ nyũmba ya Jehova-rĩ, mũiruwe akĩrũmanĩria kũmũthirĩkia; na tondũ ũcio akĩrĩra, agĩtiga kũrĩa irio.

8Nake Elikana, mũthuriwe, akĩmũũria atĩrĩ, Nĩ kĩ gĩgũkũrĩria, Hana? Na nĩ kĩ kĩgirĩtie ũrĩe irio? Ngoro yaku ĩiguithĩtio ũũru nĩ kĩ? Githĩ ndikũgunĩte gũkĩra ihĩĩ ikũmi?

9Na rĩrĩ, maarĩkia kũrĩĩra irio kũu Shilo, o na kũnyua, Hana agĩgĩũkĩra. Nake Eli, mũthĩnjĩri-Ngai, nĩ gũikara aaikarĩire gĩtĩ gĩake hingĩro-inĩ ya mũrango wa hekarũ ya Jehova.

10Nake Hana nĩaaiguĩte ũũru mũno na ngoro, agĩkĩhoya Jehova, na akĩrĩra mũno.

11Agĩkĩĩhĩta mwĩhĩtwa, akiuga atĩrĩ, Wee Jehova, Mũnene wa Ita, ũngĩĩtĩkĩra kũrora wone thĩna ũrĩa niĩ, ndungata yaku ya mũndũ-wa-nja, ’thĩnĩtio, na ũndirikane, wage kũriganĩrũo nĩ niĩ ndungata yaku ya mũndũ-wa-nja, no makĩria ũ’he niĩ, ndungata yaku ya mũndũ-wa-nja, kahĩĩ-rĩ, niĩ na niĩ nĩngakahe Jehova matukũ mothe ma muoyo wako, na gatikahutio na rũenji mũtwe o na rĩ.

12Na gũgĩkinya atĩrĩ, atĩ hĩndĩ ĩrĩa aarũmanĩirie kũhoya arĩ mbere ya Jehova, Eli akĩmũbara kanua.

13Na rĩrĩ, Hana nĩ kũhoya aahoyaga na ngoro, nayo mĩromo yake igaikara ĩkĩoyoyaga, no mũgambo wake ndwaiguagwo; tondũ ũcio Eli agĩĩciria nĩ kũrĩwo arĩĩtwo.

14Eli agĩkĩmũũria atĩrĩ, Ũgũtũũra ũrĩagwo nginya hĩndĩ ĩ? Eheria ndibei ĩo yaku ĩgũthire.

15Nake Hana agĩcokia akiuga atĩrĩ, Aca, ti ũguo, mwathi wakwa, ndĩ mũndũ-wa-nja ũiyũirũo nĩ kĩeha mũno ngoro; ndinyuĩte ndibei, kana nganyua njohi; no nĩ ngoro yakwa ĩhororeire maũndũ mayo mbere ya Jehova.

16Tiga kũnyona, niĩ ndungata yaku, ta ndĩ mũndũ-wa-nja mwaganu mũno; nĩ ũndũ-rĩ, o na nginya rĩu no kwaria ndĩraaria nĩ ũndũ wa ũrĩa kĩeha, o na gũthirĩkio kũrĩa ’thirĩkĩtio, cinyingĩhĩire.

17Eli agĩgĩcokia atĩrĩ, Thiĩ na ũhoro; Ngai wa Isiraeli aroetĩkĩra ihoya rĩaku rĩu ũmũhoete.

18Nake mũtumia ũcio akiuga atĩrĩ, Reka niĩ, ndungata yaku, njĩtĩkĩrĩke nĩwe. Tondũ ũcio mũndũ-wa-nja ũcio agĩĩthiĩra, akĩrĩa irio; na ndaigana gũcoka gũtuka gĩthiithi.

19Nao magĩkĩroka gũũkĩra rũcinĩ tene, makĩinamĩrĩra mbere ya Jehova makĩmũhoya; magĩkĩhũndũka, makĩinũka kwao mũciĩ kũu Rama. Elikana agĩkĩonana na Hana mũtumia wake, nake Jehova akĩmũririkana.

20Na gũgĩkinya atĩrĩ, atĩ ihinda rĩakinya, Hana akĩgĩa ihu, agĩciara kahĩĩ, agĩgatua Samueli, akiuga atĩrĩ, Nĩ gũkorũo nĩ kũhoya ndĩkahoete kwĩ Jehova.

21Nake mũndũ ũcio, ti Elikana, na andũ othe a nyũmba yake, makĩambata makarutĩre Jehova igongona rĩa mwaka o mwaka, o na kũhingia mwĩhĩtwa wake ũrĩa ehĩtĩte.

22No rĩrĩ, Hana ndaigana kwambata; nĩ ũndũ erire mũthuriwe atĩrĩ, Ndikwambata o nginya kaana gaka gagatua iria; na hĩndĩ ĩo nĩguo ngagatwara, nĩguo gakeonanie mbere ya Jehova, na gatũũre ho matukũ mako mothe.

23Nake Elikana, mũthuriwe, akĩmwĩra atĩrĩ, Ĩka o ta ũrĩa ũkuona kwagĩrĩire; ikara o nginya hĩndĩ ĩrĩa ũgagatigithia iria; we Jehova arotũũra arũmĩtie uuge wake! Tondũ ũcio mũndũ-wa-nja ũcio agĩtĩra gũthiĩ, agĩgĩikara akĩongithagia kaana kau gake, o nginya rĩrĩa aagatigithirie iria.

24Na rĩrĩ, rĩrĩa aagatigithirie iria-rĩ, agĩkaambatia, nao magĩgĩthiĩ na ndegwa ithatũ, na mũtu wa eba ĩmwe, na gĩtete kĩa ndibei; nake agĩgatwara nyũmba ya Jehova kũu Shilo; nako kaana kau kaarĩ o kanini.

25Nao magĩthĩnja ndegwa, magĩcoka magĩtwara kaana kau he Eli.

26Hana agĩkiuga ũũ: Atĩrĩrĩ, mwathi wakwa, o ta ũrĩa wee mwathi wakwa ũtũũraga muoyo-rĩ, nĩ niĩ mũndũ-wa-nja ũrĩa warũgamĩte haha hakuhĩ nawe, ngĩhoya Jehova.

27Kaana gaka nĩko ndahoyaga; nake Jehova nĩetĩkĩrĩte kũ’he kĩrĩa ndamũhoire;

28tondũ ũcio, o na niĩ nĩndakaamũrĩra Jehova; hĩndĩ ĩrĩa yothe gegũtũũra muoyo-rĩ, gegũtũũra ge kaamũrĩre Jehova. Nao magĩkĩinamĩrĩra Jehova hau makĩmũhoya.

Jump to: Chapter 2 →