1 Samuel 26

Kikuyu Bible (IBUKU RĨRĨA ITHERU RĨA NGAI)

← Chapter 25 Jump to: Chapter 27 →

1Ningĩ Azifu magĩthiĩ gwĩ Saulu o kũu Gibea, makiuga atĩrĩ, Githĩ Daudi ti kwĩhitha ehithĩte kĩrĩma-inĩ kĩa Hakila, kĩrĩa kĩng’etheire werũ?

2Saulu agĩgĩũkĩra, agĩikũrũka kũu werũ-inĩ wa Zifu arĩ na Aisiraeli ngiri ithatũ athure, magacarie Daudi kuo.

3Saulu akĩamba hema ciake kĩrĩma-inĩ kĩa Hakila kĩrĩa kĩng’etheire werũ, akuhĩhĩirie njĩra. Nake Daudi nĩaaikarĩte werũ-inĩ ũcio, agĩkĩona atĩ Saulu nĩamũrũmĩrĩire o kũu werũ-inĩ.

4Tondũ ũcio Daudi akĩrekia athigani, agĩkĩmenya atĩ ti-itherũ Saulu nĩokĩte kuo.

5Daudi agĩgĩũkĩra, agĩthiĩ kĩraaro-inĩ harĩa Saulu aambĩte hema ciake, nake Daudi akĩona harĩa Saulu aakomete toro me na Abineri wa Neri, mũnene wa ita yake; Saulu agĩgĩkorũo akomete handũ harigicĩirio na ngari iria maarĩ nacio, nao andũ arĩa angĩ makaamba hema ciao mamũthiũrũrũkĩirie.

6Daudi agĩgĩcokia akĩũria Ahimeleku ũrĩa Mũhiti, na Abishai wa Zeruia, ũrĩa mũrũ wa nyina na Joabu, atĩrĩ, Nũ ũgũikũrũkania na niĩ, tũkinye he Saulu kĩraaro-inĩ gĩake? Nake Abishai akiuga atĩrĩ, Nĩ niĩ tũgũikũrũkania nawe.

7Tondũ ũcio Daudi na Abishai magĩgĩkinya harĩ andũ a Saulu ũtukũ; na atĩrĩrĩ, Saulu agĩkorũo akomete handũ hau harigicĩrie na ngari, narĩo itimũ rĩake rĩkahandwo mũtwe-inĩ wake; nake Abineri, na andũ arĩa angĩ, magakoma mamũrigicĩirie na mĩena yothe.

8Hĩndĩ ĩo Abishai agĩkĩĩra Daudi atĩrĩ, Ngai nĩarekereirie thũ yaku akamĩneana guoko-inĩ gwaku ũmũthĩ; tondũ ũcio, ta reka ndĩmĩthece na itimũ rĩrĩ, ndĩmĩthecithanie na thĩ o itheca rĩmwe, na ndimĩtheca rĩa kerĩ.

9Nake Daudi agĩkĩĩra Abishai atĩrĩ, Menya ũmũũrage; no ũndũ-rĩ, nũ ũngĩkĩhota gũtambũrũkia guoko okĩrĩre mũitĩrĩrio maguta wa Jehova, na onwo ta atehĩtie?

10Ningĩ Daudi akiuga atĩrĩ, O ta ũrĩa Jehova atũũraga muoyo-rĩ, Jehova nĩwe ũkũmũhũra, kana mũthenya wake wa gũkua o ro ũguo ũkinye, kana hihi athiĩ ita-inĩ, agakuĩre kuo.

11Jehova arongiria ndigatambũrũkie guoko gwakwa njũkĩrĩre mũtĩrĩrio maguta wa Jehova! No wee oya itimũ rĩrĩ rĩĩ mũtwe-inĩ wake, na kabũthũ gaka ka maĩ, twĩthiĩre.

12Daudi agĩkĩoya itimũ mũtwe-inĩ wa Saulu, na kabũthũ ka maĩ. Nao magĩgĩĩthiĩra, na gũtirĩ mũndũ wonire ũndũ ũcio, kana akĩũmenya, kana mũndũ o na ũmwe agĩũkĩra; nĩ gũkorũo othe nĩmaakomete; nĩ ũndũ nĩmaagwatĩtwo nĩ toro mũnene mũno uumĩte he Jehova.

13Hĩndĩ ĩo Daudi agĩkĩringa mũrĩmo, akĩrũgama handũ haraya mũno, o igũrũ gacũmbĩrĩ ga kĩrĩma; na hagakĩgĩa ithenya inene mũno gatagatĩ-inĩ kao

14Daudi agĩkĩanĩrĩra agĩĩta andũ a Saulu, na Abineri wa Neri, akiuga atĩrĩ, Anga ndũrĩ ũndũ ũngĩcokia, wee Abineri? Abineri agĩgĩcokia akiuga atĩrĩ, Wee nĩwe ũ ũkwanĩrĩra mũthamaki ũgĩĩtana?

15Daudi agĩkĩĩra Abineri atĩrĩ, Githĩ wee tiwe njamba mũno? Ningĩ thĩinĩ wa Isiraeli-rĩ, nũ ũngĩ ũgĩtariĩ tawe? Ũkĩagĩte kũmenyerera mwathi waku, mũthamaki witũ, nĩ ũndũ kĩ? Nĩ ũndũ-rĩ, he mũndũ ũmwe wa andũ ake ũgũtonyete he mũthamaki witũ, o ũcio mwathi waku, nĩguo amũũrage.

16Ũndũ ũcio wĩkĩte ti mwega. O ta ũrĩa Jehova atũũraga muoyo-rĩ, nĩmwagĩrĩirũo nĩ kũũragwo, nĩ ũndũ mũtimenyereire mwathi wanyu wega, ũcio mũitĩrĩrio maguta wa Jehova. Rĩu-rĩ, ta kĩrore itimũ rĩa mũthamaki nĩrĩo rĩrĩ, na kabũthũ gake ka maĩ, iria ciuma mũtwe-inĩ wake.

17Nake Saulu agĩkĩmenya mũgambo wa Daudi, akiuga atĩrĩ, Ĩ ũcio nĩ mũgambo waku, mũrũ wakwa, Daudi? Nake Daudi akiuga atĩrĩ, Ĩĩ, mũthamaki ũyũ, mwathi wakwa, nĩ mũgambo wakwa.

18Agĩkiuga atĩrĩ, Mwathi wakwa, nĩ kĩ kĩragĩtũma ũnũmĩrĩre na ihenya, niĩ ndungata yaku? Tondũ-rĩ, kaĩ ndĩgĩĩkĩte atĩa? Ningĩ-rĩ, kaĩ guoko gwakwa gũgĩĩkĩte ũũru ũrĩkũ?

19Tondũ ũcio, mũthamaki ũyũ, mwathi wakwa, ta igua ũhoro wa ndungata yaku. Atĩrĩrĩ, kũngĩkorũo Jehova nĩwe warahũrĩte ngoro yaku nĩguo ũnjũkĩrĩre-rĩ, ta nĩetĩkĩre horohio ya mũtararĩko ũrĩa ũnungaga wega; no rĩrĩ, kũngĩkorũo nĩ andũ a gũkũ thĩ mekĩte ũguo, marogwatwo nĩ kĩrumi marĩ mbere ya Jehova! Nĩ ũndũ matukũ maya manyingatĩte njeherere igai rĩrĩa Jehova agayanĩire, makoiga atĩrĩ, Thiĩ ũgatungatĩre ngai ingĩ.

20Tondũ ũcio thakame yakwa ĩroaga gũkanaitwo thĩ haraya na harĩa Jehova arĩ; nĩ ũndũ mũthamaki wa Isiraeli oimagarĩte agacarie thuya, o ta rĩrĩa mũndũ ekũguĩma ngware irĩma-inĩ.

21Saulu agĩkiuga atĩrĩ, Nĩnjĩhĩtie; ta coka, mũrũ wakwa Daudi, nĩ ũndũ ndigacoka gũgwĩka ũũru o na rĩ, nĩ gũkorũo muoyo wakwa nĩwonetwo na maitho maku ũmũthĩ ta wĩ bata mũno; atĩrĩrĩ, nĩnjĩkĩte ũndũ wa ũkĩgu mũno, na ngehia mũno ma.

22Daudi agĩgĩcokia akiuga ũũ: Itimũ nĩwa rĩrĩ, mũthamaki ũyũ; mũndũ ũmwe wa aanake acio nĩaringe arĩiyĩre.

23Jehova nĩwe ũrĩĩkaga mũndũ o mũndũ maũndũ o ta ũrĩa ũthingu wake, na wĩhokeki wake, itariĩ; nĩ ũndũ Jehova nĩegũkũneanĩte guoko-inĩ gwakwa ũmũthĩ, na ndinetĩkĩra gũtambũrũkia guoko gwakwa njũkĩrĩre mũitĩrĩrio maguta wa Jehova.

24Atĩrĩrĩ, o ta ũrĩa muoyo waku wonetwo ũrĩ bata mũno na maitho makwa ũmũthĩ-rĩ, o ũguo taguo reka muoyo wakwa wonagwo na maitho ma Jehova ta ũrĩ bata mũno, akĩndute maũndũ-inĩ mothe marĩa ’nyariragwo namo.

25Saulu agĩkĩĩra Daudi atĩrĩ, Gũkena-rĩ, nĩwe, mũrũ wakwa, Daudi wee-rĩ, nĩũgeka maũndũ manene, na ti-itherũ nĩũkahootana. Daudi agĩgĩĩthiĩra, nake Saulu akĩhũndũka, akĩĩinũkĩra.

← Chapter 25 Jump to: Chapter 27 →