Ezekiel 43

Kikuyu Bible (IBUKU RĨRĨA ITHERU RĨA NGAI)

← Chapter 42 Jump to: Chapter 44 →

1Thutha wa ũguo ningĩ akĩndwara kĩhingo-inĩ kĩu, o kĩu kĩarorete mwena wa irathĩro.

2Na atĩrĩrĩ, riri wa Ngai wa Isiraeli ũgĩũka uumĩte na mwena ũcio wa irathĩro; naguo mũgambo wake watariĩ ta mũrurumo wa maĩ maingĩ, nayo thĩ ĩkĩmũrĩkwo nĩ ũtheri wa riri ũcio wake.

3Naguo ũndũ ũcio ũkĩonwo ũtariĩ o ta kĩoneki kĩrĩa ndonire hĩndĩ ĩrĩa okĩte kũninithia itũũra rĩu; ningĩ cioneki icio ikahaana o ta kĩoneki kĩrĩa ndonire gũkuhĩ na rũũĩ rũa Kebari; niĩ na niĩ ngĩĩgũithia ngĩturumithia ũthiũ thĩ.

4Naguo riri ũcio wa Jehova wa ũrĩa ekagĩrĩrũo ũgĩtonya nyũmba ĩo thĩinĩ uumĩte na njĩra ya kĩhingo-inĩ kĩrĩa kĩarorete irathĩro.

5Nake Roho akĩnjoya na igũrũ, akĩndonyia nja ya na thĩinĩ, na atĩrĩrĩ, riri ũcio wa Jehova wa ũrĩa ekagĩrĩrũo ũgĩkorũo ũiyũrĩte nyũmba ĩo yothe.

6Niĩ na niĩ ngĩigua ngĩarĩrio nĩ mũndũ wĩ kũu nyũmba ĩo thĩinĩ; ningĩ hagĩcoka hakĩrũgama mũndũ harĩ niĩ.

7Nake akĩnjĩra atĩrĩ, Mũrũ wa mũndũ, haha nĩho handũ ha kũigwo gĩtĩ gĩakwa kĩa ũnene, o na handũ ha gũkinyithagia makinya ma magũrũ makwa, na nĩho ngatũũraga ndĩ gatagatĩ-inĩ ga ciana cia Isiraeli tene na tene. Nao andũ a nyũmba ya Isiraeli o ene, o na athamaki ao, matigacoka gũthahia rĩĩtwa rĩakwa itheru na ũndũ wa kũhũra maraya, o na ũndũ wa ciimba cia athamaki ao iria mathikaga matĩri-inĩ mao ma kũndũ gũtũũgĩru.

8O na kana marĩthahie magĩaka hingĩro cia nyũmba yao hakuhĩ na cia nyũmba yakwa, o na makĩhanda itingĩ cia nyũmba yao hakuhĩ na cia nyũmba yakwa, matigĩtie o rũthingo ruiki gatagatĩ-inĩ gaitũ nao; o na ningĩ nĩmaathahirie rĩĩtwa rĩakwa itheru na maũndũ mao ma thahu marĩa maaneka, na nĩkĩo ndamaninire na marakara makwa.

9Na rĩrĩ, wega wao no matigane na ũmaraya ũcio wao, o na manjehererie ciimba icio cia athamaki ao, maciikie haraya na niĩ; na nĩngagĩtũũra gatagatĩ-inĩ kao tene na tene.

10Wee nawe mũrũ wa mũndũ, onia andũ a nyũmba ya Isiraeli nyũmba ĩo, nĩ getha maconorũo nĩ ũũru ũcio wao; na ũreke mamĩthime, mamenye ũrĩa ĩtariĩ.

11Na rĩrĩ, mangĩkorũo maconoretwo nĩ maũndũ mothe marĩa maaneka-rĩ, ũcoke ũmonie mũhianĩre wa nyũmba ĩo, o na mũthondekere wayo, o na nyumĩro ciayo, o na matonyero mayo, o na mũhianĩre wa ciuco ciayo ciothe; ningĩ ũmonie mĩtugo yothe yayo ĩrĩa ya kũrũmĩrĩrũo, o na mũhianĩre wa ciuco ciayo ciothe, o na maathani mayo mothe, ũkĩandĩke ũhoro ũcio magĩkwĩonagĩra na maitho mao, nĩ getha matũũre mamenyereire mũhianĩre wayo wothe, o na mĩtugo yayo yothe ĩrĩa ĩtuĩtwo ya kũrũmĩrĩrũo, na mekage maũndũ macio.

12Ningĩ ũyũ nĩguo watho wa nyũmba ĩo, atĩ gacũmbĩrĩ gothe ga kĩrĩma gĩkĩ gaikare ge kaamũre mũno, o na ndwere-inĩ ciako ciothe. Atĩrĩrĩ, ũcio nĩguo watho wa nyũmba ĩo.

13Na rĩrĩ, ũyũ nĩguo mũthimĩre wa kĩgongona o ta ũrĩa mĩkono ĩtariĩ, naguo mũkono ũmwe-rĩ, nĩ mũkono mũgima wa ndũire na iraata rĩmwe. Gĩtina-inĩ gĩa kĩgongona kĩu nĩ kĩa mũkono ũmwe, o nakuo kwarama gwakĩo nĩ kwa mũkono ũmwe o ro ũguo, naguo mũgũkũ wakĩo ũrĩa ũkĩrigicĩirie gĩtina-inĩ na ndwere ciothe nĩ wa iraata rĩmwe; ũguo noguo gĩtina gĩakĩo kĩhaana.

14O na ningĩ kuuma o gĩtina-inĩ gĩakĩo tĩri-inĩ nginya metha-inĩ yakĩo ya na mũhuro nĩ mĩkono ĩĩrĩ, na wariĩ wayo nĩ mũkono ũmwe; o na ningĩ kuuma metha-inĩ ĩo ya na mũhuro nginya metha-inĩ ĩo ĩngĩ ya na igũrũ nĩ mĩkono ĩna, na wariĩ wayo no mũkono ũmwe o ro ũguo.

15O na ningĩ kĩgongona kĩo kĩene nĩ kĩa mĩkono ĩna; naho handũ hakĩo harĩa hacinagĩrũo igongona-rĩ, hakagĩa hĩa inya irũngiĩ.

16Naho handũ hau nĩ ha mĩkono ikũmi na ĩĩrĩ kũraiha, na hakaarama mĩkono ikũmi na ĩĩrĩ o ro ũguo haiganaine na mĩena ĩrĩa ĩna.

17Nayo metha nĩ ya mĩkono ikũmi na ĩna kũraiha, o na ĩkaarama mĩkono ikũmi na ĩna o ro ũguo, ĩiganaine na mĩena yayo ĩrĩa ĩna, naguo mũgũkũ ũrĩa ũmĩrigicĩirie na ndwere ciothe nĩ wa nuthu ya mũkono ũmwe; nakĩo gĩtina kĩayo nĩ kĩa mũkono ũmwe na mĩena yothe. Nacio ngathĩ ciakĩo ikorũo irorete irathĩro-inĩ.

18Nake akĩnjĩra atĩrĩ, Mũrũ wa mũndũ, Mwathani Jehova oigĩte ũũ: Atĩrĩrĩ, ĩno nĩyo mĩtugo ĩrĩa ĩrĩrũmagĩrĩrũo ĩkoniĩ kĩgongona hĩndĩ ĩrĩa magagĩthondeka, nĩguo marutagĩre mahaki ma njino igũrũ rĩakĩo, o na maminjaminjage thakame igũrũ rĩakĩo.

19Wee nĩwe ũkahe athĩnjĩri-Ngai arĩa Alawii a mbeũ ya Zadoku, o acio ma’thengagĩrĩra nĩguo mandungatĩre, ndegwa njĩthĩ ĩtuĩke ya igongona rĩa mehia; ũguo nĩguo Mwathani Jehova oigĩte.

20Ningĩ woe thakame yayo, ũmĩminjĩrie hĩa icio inya, o na tuune tũrĩa tũna twa metha ĩo, o na mũgũkũ-inĩ wa mĩena yothe yakĩo; ũguo nĩguo ũgagĩtheria ũkĩhoroherie.

21O na ningĩ woe ndegwa ĩo ya igongona rĩa mehia, nayo ĩcinĩrũo handũ harĩa hatuĩtwo icinĩro rĩa igongona nyũmba-inĩ ĩo, narĩo nĩ na nja ya handũ harĩa haamũre.

22O na ningĩ mũthenya wa kerĩ ũrute thenge ĩtarĩ na kaũũgũ ĩtuĩke ya igongona rĩa mehia, nakĩo kĩgongona gĩtherio nayo o ta ũrĩa gĩatheririo na ndegwa ĩo.

23Nawe warĩkia gũgĩtheria-rĩ, ũcoke ũrute igongona rĩa ndegwa njĩthĩ ĩtarĩ na kaũũgũ, o na ndũrũme ĩtarĩ na kaũũgũ ũmĩrutĩte rũũru-inĩ rũa ng’ondu.

24Nawe ũcoke ũcirehe mbere ya Jehova, nao athĩnjĩri-Ngai maciminjĩrie cumbĩ, na macirute ituĩke ihaki rĩa njino rĩrutĩirũo Jehova.

25Ũguo noguo mũkaruta igongona rĩa thenge mĩthenya mũgwanja, mũthenya o mũthenya, ĩtuĩke igongona rĩa mehia, na kũrutagwo ndegwa njĩthĩ, o na ndũrũme ĩrutĩtwo rũũru-inĩ rũa ng’ondu ĩtarĩ na kaũũgũ.

26Ũguo nĩguo kũrĩĩkagwo mĩthenya ĩo yothe mũgwanja, nĩ getha matherie kĩgongona kĩu, makĩhoroherie, nĩguo makĩamũre magĩtherie.

27Na rĩrĩ, hĩndĩ ĩrĩa matukũ macio makahinga-rĩ, nĩgũgatuĩka atĩrĩ, atĩ mũthenya wa ĩnana, o na thutha waguo, athĩnjĩri-Ngai makarutagĩra mahaki manyu ma njino kĩgongona-inĩ kĩu, o na magongona manyu ma ũiguano; na niĩ ndĩmwĩtĩkĩre; ũguo nĩguo Mwathani Jehova oigĩte.

← Chapter 42 Jump to: Chapter 44 →