Ezekiel 45

Kikuyu Bible (IBUKU RĨRĨA ITHERU RĨA NGAI)

← Chapter 44 Jump to: Chapter 46 →

1O na ningĩ atĩrĩ, hĩndĩ ĩrĩa mũkagaya bũrũri na ũndũ wa kũũcukĩra mĩtĩ mũndũ o mũndũ agwate igai rĩake-rĩ, nĩmũkarutĩra Jehova gĩcigo kĩaguo, gĩtuĩke gĩcunjĩ kĩamũre kĩa bũrũri ũcio; naguo ũraihu wakĩo ũtuĩke o ta ũraihu wa mĩkono ngiri mĩrongo ĩĩrĩ na ĩtano, o naguo wariĩ ũtuĩke mĩkono ngiri mĩrongo ĩĩrĩ. Gĩcunjĩ kĩu nakĩo nĩgĩgatuwo kĩamũre o nginya mĩhaka-inĩ yakĩo yothe ĩrĩa ĩkĩrigicĩirie na ndwere ciothe.

2Ningĩ kũu gĩcigo-inĩ kĩu, gũgathimwo handũ haraihĩte mĩkono magana matano, o na hakaarama mĩkono magana matano o ro ũguo, hatuĩke handũ haamũre, na hakorũo he thikwea; na ningĩ hathimwo handũ hangĩ ha mĩkono mĩrongo ĩtano ha gũtuĩka baraganya waho ũharigicĩirie na ndwere ciothe.

3O na ningĩ gĩcigo-inĩ kĩu hathimwo gĩcigo kĩraihĩte mĩkono ngiri mĩrongo ĩĩrĩ na ĩtano, o na gĩkaarama mĩkono ngiri ikũmi, na nĩho hagaakwo handũ hau haamũre, o harĩa hatheru gũkĩra harĩa hangĩ hothe.

4Gĩcigo kĩu gĩgatũĩka kĩamũre thĩinĩ wa bũrũri ũcio; na gĩtuĩke gĩa athĩnjĩri-Ngai, acio atungati a handũ hau haamũre, o acio mathengagĩrĩra ho nĩguo matungatĩre Jehova; na hatuĩke ha gwakwo nyũmba ciao, o na hatuĩke haamũre nĩ ũndũ wa gwakwo handũ hau haamũre.

5Ningĩ hathimwo gĩcigo kĩngĩ kĩa ũraihu wa mĩkono ngiri mĩrongo ĩĩrĩ na ĩtano, na gĩkaarama mĩkono ngiri ikũmi gĩtuĩke kĩa Alawii, o acio atungati a nyũmba ya Jehova; kĩu nĩkĩo makegwatĩra gĩtuĩke kĩao kĩũmbe, gĩa gwakwo matũũra ma gũtũũrũo.

6O na ningĩ mũgathima gĩcigo gĩa gwakwo itũũra kĩaramĩte mĩkono ngiri ithano na gĩkaraiha mĩkono ngiri mĩrongo ĩĩrĩ na ĩtano, nakĩo gĩcigo kĩu kĩhakane na gĩcigo kĩrĩa gĩtheru kĩrutĩirũo Jehova; nakĩo gĩgatuĩka kĩa andũ othe a nyũmba ya Isiraeli.

7Nacio icigo iria igatuĩka cia mũnene-rĩ, ikagĩa mbarĩ cierĩ cia gĩcigo kĩrĩa kĩamũrĩirũo Jehova, o na mbarĩ cierĩ cia handũ hau ha gwakwo itũũra, nakĩo gĩcigo kĩa mwena wa ithũĩro kĩĩikie na mwena ũcio wa ithũĩro, nakĩo kĩrĩa kĩngĩ kĩa mwena wa irathĩro kĩĩikie na mwena o ũcio wa irathĩro; ciĩikie gatĩĩna kaiganaine na ũraihu wa gĩcigo kĩmwe gĩa icio ingĩ, kuuma o mũhaka-inĩ wa ithũĩro, nginya o mũhaka-inĩ wa mwena wa irathĩro.

8Gĩcigo kĩu-rĩ, nĩkĩo gĩgatuĩka gĩake kĩrĩa egwatĩire thĩinĩ wa Isiraeli; nao anene akwa-rĩ, matigacoka kũnyarira andũ akwa o na rĩ, no nĩ kũgaya makagaĩra andũ a nyũmba ya Isiraeli ithaka cia bũrũri ũcio o ta ũrĩa mĩhĩrĩga yao ĩtariĩ.

9Na rĩrĩ, Mwathani Jehova oigĩte ũũ: Atĩrĩrĩ, inyuĩ anene a Isiraeli, iganwoi nĩ maũndũ macio mwĩkĩte, na mũcoke mweherie ũhinya, o na wanangani, mũhinganagĩrie matuĩro ma cira, na mũtuanagĩre cira na kĩhooto; tiganai na ũhoro wanyu wa gũtunya andũ akwa ithaka hatarĩ kĩhooto; ũguo nĩguo Mwathani Jehova oigĩte.

10Gĩagai na ratiri itangĩhenania, o na eba ĩtangĩhenania, o na mbathi ya gũthima nayo ĩtangĩhenania.

11Eba cianyu, o na mbathi cianyu, ituĩkage o kĩgeri kĩmwe kĩiganaine, nĩ getha mbathi ĩiganĩre gĩcunjĩ gĩa ikũmi kĩa homeri ĩmwe, o nayo eba ĩmwe ĩiganĩre gĩcunjĩ gĩa ikũmi kĩa homeri o ĩmwe; ithimi icio cierĩ ikĩringane na ũrĩa homeri ĩigana.

12Nayo cekeri ĩmwe ĩkaigananaga na gera mĩrongo ĩĩrĩ; ningĩ cekeri mĩrongo ĩĩrĩ, o na cekeri mĩrongo ĩĩrĩ na ithano, o na cekeri ikũmi na ithano, mũcituage mane ĩmwe.

13Indo iria mũrĩrutagĩra Jehova nĩcio ici; nĩ gĩcunjĩ gĩa gatandatũ kĩa eba ĩmwe kiumĩte harĩ homeri ĩmwe ya ngano, o na mũrehage gĩcunjĩ gĩa gatandatũ kĩa eba ĩmwe kiumĩte harĩ homeri ĩmwe ya cairi;

14namo maguta marĩa mũrĩrutaga na mbathi, matuĩkage gĩcunjĩ gĩa ikũmi kĩa mbathi ĩo, thĩinĩ wa kori ĩmwe, nayo nĩyo mbathi ikũmi, kana homeri ĩmwe; nĩ gũkorũo mbathi ikũmi nĩcio homeri ĩmwe;

15o nako gatũrũme kamwe ka rũũru, karutĩtwo thĩinĩ wa mbũri magana merĩ, karutwo ũrĩithio-inĩ ũrĩa mũnoru wa Isiraeli. Icio nĩcio igatuĩka cia magongona ma mũtu, o na mahaki ma njino, o na magongona ma ũiguano, nĩguo mahorohagĩrio nacio; ũguo nĩguo Mwathani Jehova oigĩte.

16Andũ othe a bũrũri makaruta indo icio cia kũrutwo, ineo mũnene ũrĩa wa Isiraeli.

17Nake mũnene ũcio nĩwe ũrĩrutaga indo cia mahaki ma njino o na magongona ma mũtu, o na magongona ma indo iria irutagwo cia kũnyuwo, acirutage hĩndĩ ya ciathĩ iria ituĩtwo, o na tũrũgamo-inĩ twa mĩeri, o na mĩthenya ya thabatũ, o na ciathĩ-inĩ ciothe iria njathane cia andũ a nyũmba ya Isiraeli; nĩ kũhaarĩria arĩhaaragĩria igongona rĩa mehia, o na igongona rĩa mũtu, o na mahaki ma njino, o na magongona ma ũiguano, nĩ getha andũ a nyũmba ya Isiraeli mahoroherio namo.

18Ningĩ Mwathani Jehova oigĩte ũũ: Mweri wa mbere, o mũthenya wa mbere wa mweri ũcio-rĩ, nyitaga ndegwa njĩthĩ ĩtarĩ na kaũũgũ, ũtherie handũ harĩa haamũre nayo.

19Nake mũthĩnjĩri-Ngai oe thakame ĩo ya igongona rĩa mehia, amĩhake hingĩro cia mĩrango ya nyũmba ya Jehova, o na tuune-inĩ tũrĩa tũna twa metha ya kĩgongona, o na itingĩ-inĩ cia kĩhingo kĩa nja ya na thĩinĩ.

20Ningĩ ũguo noguo ũgacoka gwĩka mũthenya wa mũgwanja wa mweri ũcio nĩ ũndũ wa mũndũ o wothe wĩhĩtie, o na ũndũ wa mũndũ ũrĩa wĩkaga maũndũ make na ũrimũ; ũguo nĩguo mũkahoroheria nyũmba ĩo.

21Na rĩrĩ, mweri wa mbere, mũthenya wa ikũmi na ĩna wa mweri o ro ũcio-rĩ, gĩagai na gĩathĩ kĩa Bathaka, mũrĩe gĩathĩ kĩu mĩthenya mũgwanja; na nĩ mĩgate ĩtarĩ mĩimbie ĩkarĩo.

22Ningĩ mũthenya ũcio-rĩ, mũnene nĩarute ndegwa ya igongona rĩa mehia nĩ ũndũ wake we mwene, o na ũndũ wa andũ othe a bũrũri.

23O na ningĩ mĩthenya ĩo mũgwanja ya gĩathĩ kĩu akarutĩra Jehova ihaki rĩa njino, narĩo rĩtuĩke rĩa ndegwa mũgwanja, na ndũrũme mũgwanja itarĩ na kaũũgũ, acirutage mũthenya o mũthenya mĩthenya-inĩ ĩo mũgwanja, na arutage thenge mũthenya o mũthenya nĩ ũndũ wa igongona rĩa mehia.

24Na nĩakaruta mũtu wa igongona, o eba ĩmwe nĩ ũndũ wa ndegwa ĩmwe, o na eba ĩngĩ ĩmwe o ro ũguo nĩ ũndũ wa ndũrũme, na hini ĩmwe ya maguta nĩ ũndũ wa eba o eba ya mũtu.

25Ningĩ mweri wa mũgwanja, o mũthenya wa ikũmi na ĩtano wa mweri ũcio-rĩ, hagĩe gĩathĩ; nake ekage o ta ũguo mĩthenya mũgwanja; eke o ta ũrĩa igongona rĩa mehia rĩekirũo, na ta ũrĩa ihaki rĩa njino rĩekirũo, o na ta ũrĩa igongona rĩa mũtu rĩekirũo, o na ta ũrĩa maguta mekirũo.

← Chapter 44 Jump to: Chapter 46 →