James 1

Kikuyu Bible (IBUKU RĨRĨA ITHERU RĨA NGAI)

Jump to: Chapter 2 →

1NIĨ Jakubu, ngombo ya Ngai na ya Mwathani Jesu Kristo, nĩndamũgeithia, inyuĩ a mĩhĩrĩga ĩrĩa ikũmi na ĩĩrĩ ĩharaganĩtie.

2Ariũ a Baba, mwakorũo nĩ magerio mĩthemba mĩingĩ, tuagai atĩ ũguo no gĩkeno gĩtheri:

3mũkĩmenyaga atĩ wĩtĩkio wanyu wagerio nĩũtũmaga mũkirĩrĩrie.

4No rĩrĩ, rekei gũkirĩrĩria kũu kũrutage wĩra wakuo ũrĩa wagĩrĩire kũna, nĩ getha mũtuĩke andũ aagĩrĩru kũna, na agima, mũtarĩ kaũndũ mwagĩte.

5Na rĩrĩ, mũndũ wanyu angĩkorũo nĩaagĩte ũũgĩ, nĩahoe Ngai, ũrĩa ũheaga andũ othe na ũtana, ategũkũmana-rĩ, nake nĩakaheo.

6Ĩndĩ nĩahoe etĩkĩtie, ategũthangania o na atĩa: nĩ gũkorũo mũndũ ũrĩa ũthanganagia ahaana ta ikũmbĩ rĩa iria-inĩ rĩrĩa inene, rĩrĩa rĩtwaragĩrĩrio nĩ rũhuho rĩkarũgarũgagio.

7Mũndũ ũcio nĩagĩtige kwĩgereria atĩ nĩakaheo kĩndũ o na kĩrĩkũ nĩ Mwathani,

8akĩrĩ mũndũ wa ngoro igĩrĩ ũtarĩ harĩa akindĩirie mĩthiĩre-inĩ yake yothe.

9Atĩrĩ, mũrũ wa Ithe witũ ũrĩa ũtarĩ na igweta nĩerahage nĩ ũndũ nĩatũũgĩrĩtio:

10nake ũrĩa mũtongu nĩerahage nĩ ũndũ nĩanyihĩtio: nĩ gũkorũo nĩarĩthira o ta kĩro kĩrĩa kĩa nyeki.

11Nĩ tondũ riũa rĩrathaga, na gũgoka rũhuho rũrĩ na ũrugarĩ mũhiũ, nacio ikomia nyeki ĩo; nakĩo kĩro kĩayo gĩgaitĩka, naguo ũthaka ũrĩa yuma naguo ũgathira: ũguo no taguo mũndũ ũrĩa mũtongu arĩhwererekera mĩthiĩre-inĩ yake.

12Gũkena-rĩ, nĩ mũndũ ũrĩa wĩũmagĩrĩria hĩndĩ ĩrĩa ekũgerio; nĩ ũndũ aagerio na oneka atĩ nĩ mwĩkindĩru-rĩ, nĩakaheo thũmbĩ ya muoyo, o ĩrĩa Mwathani erĩire arĩa mamwenda.

13Mũndũ o wothe aagerio, nĩatige kuuga, Ndagerio nĩ Ngai: amu Ngai ndangĩhota kũgerio nĩ maũũru; nake we mwene ndageragia mũndũ o na ũrĩkũ.

14No rĩrĩ, o mũndũ nĩ kũgerio ageragio hĩndĩ ĩrĩa ekũgucĩrĩrio nĩ merirĩria make moru, akahenererio nĩmo.

15Namo merirĩria macio maagĩa ihu-rĩ, maciaraga wĩhia: naguo wĩhia wakũra-rĩ, ũgaciara gĩkuũ.

16Ariũ a Baba, inyuĩ nyenda mũno, tigai kũhenio.

17Ũheani o wothe wa maũndũ mega, o na kĩheo o gĩothe kĩrĩa kĩagĩrĩire kũna, nĩciumaga Igũrũ, igaikũrũka ciumĩte kũrĩ Ithe witũ, mwene motheri ma Igũrũ, ũrĩa ũtagariũkaga, na ndarĩ na kĩĩruru gĩa kũgarũrũka.

18Nĩwe watũciarire na ũhoro-ũrĩa-wa-ma, kũringana na ũrĩa eyendeire we mwene, nĩ getha tũtuĩke ta mũtũrio wa indo iria ombire.

19Ariũ a Baba, inyuĩ nyenda mũno, nĩmũũĩ ũhoro ũcio. Ĩndĩ mũndũ o wothe nĩahiũhage gũthikĩrĩria, no ndakahĩke kwaria kana kũrakara;

20nĩ gũkorũo kũrakara kwa mũndũ gũtiĩkithagia maũndũ ma ũthingu wa Ngai.

21Nĩ ũndũ ũcio-rĩ, teaniai maũndũ mothe marĩa mathũku, na waganu ũrĩa ũtheaga, na mwĩtĩkĩre, mwĩ na ũhoreri, ũhoro ũrĩa ũhandĩtwo thĩinĩ wanyu, o ũrĩa ũngĩhota kũhonokia mĩoyo yanyu.

22Ĩndĩ tuĩkai andũ a gwĩkaga ũhoro ũrĩa mũiguĩte, na mũtigatuĩke o a kũũiguaga mũtekũwĩka, mũkĩĩhenagia inyuene.

23Amu-rĩ, mũndũ o wothe angĩtuĩka mũiguaũhoro, na ti mũwĩki-rĩ, ahaanaine na mũndũ ũkwĩrora ũthiũ ũrĩa aaciarirũo naguo na gĩcicio:

24nĩ gũkorũo ekwĩrora, agathiĩ, akariganĩrũo o rĩmwe nĩ ũrĩa egũtariĩ.

25No mũndũ ũrĩa ũcũthagĩrĩria watho ũrĩa mwagĩrĩru kũna, o ũrĩa ũtarĩ wa ũkombo-rĩ, na agatũũra aũcũthagĩrĩria-rĩ, ningĩ agakorũo ti mũndũ wa kũũigua akariganĩrũo, no nĩ mũndũ ũrĩa ũwĩkaga, mũndũ ũcio nĩakarathimĩrũo maũndũ marĩa ekaga.

26Mũndũ o wothe angĩĩtua mũndũ wa ndini na ndekwĩĩkĩra mũkwa kanua ohe rũrĩmĩ rũake, no kwĩhenia ehenagia ngoro yake-rĩ, ũndini wa mũndũ ũcio no wa tũhũ.

27Ũndini ũrĩa wonagwo nĩ Ngai, o we Ithe witũ, wĩ mũtheru, na ũtarĩ mũthũku nĩguo ũyũ atĩrĩ, nĩ gũthiaga kũrora ciana cia ngoriai na atumia a ndigwa hĩndĩ ĩrĩa mathĩnĩkĩte, na ningĩ atĩ mũndũ eikaragie gũkũ thĩ ategũthũkio na imeni iria njũru ciakuo.

Jump to: Chapter 2 →