James 4

Kikuyu Bible (IBUKU RĨRĨA ITHERU RĨA NGAI)

← Chapter 3 Jump to: Chapter 5 →

1RĨU-RĨ, mbaara na kũhũrana-rĩ, ciumaga kũ thĩinĩ wanyu? Githĩ itiumaga o thuti-inĩ cianyu iria irũaga ciĩga-inĩ cianyu thĩinĩ?

2Mwĩriragĩria na mũkaaga kuona: ningĩ mũũraganaga, mũkagĩa na rũitho, na mũtione kĩndũ: na ningĩ mũhũranaga na mũkarũa mbaara, mũgakĩaga kuona kĩndũ tondũ wa kwaga kũhoya.

3Mũhoyaga, na mũtiheo, nĩ ũndũ mũhoyaga na mũhoere ũrĩa ũtaagĩrĩire, no getha mũitangage kĩrĩa mũngĩheo na maũndũ marĩa mwendaga gwĩkenia namo.

4Inyuĩ atharania aya! Kaĩ mũtoĩ atĩ kũiguana na maũndũ ma gũkũ thĩ nĩkuo kũgĩa ũthũ na Ngai? Nĩ ũndũ ũcio-rĩ, mũndũ o wothe wendaga kũiguana na maũndũ ma gũkũ thĩ, nĩetuaga thũ ya Ngai.

5Kana hihi mũkwĩgereria atĩ Maandĩko maaragia mohoro ma tũhũ? Anga roho ũrĩa Ngai aatũmire ũtũũre thĩinĩ witũ nĩwĩriragĩria ũkĩiguaga ũiru?

6Ĩndĩ nĩ Wega wake aheanaga o makĩria. Nĩkĩo Maandĩko mekuuga atĩrĩ, Ngai nĩareganaga na arĩa etĩi, no arĩa menyihĩtie-rĩ, nĩo aheaga Wega wake.

7Nĩ ũndũ ũcio athĩkagai nĩ Ngai; reganagai na mũcukani, nake nĩekũmũũrĩra.

8Kuhĩhĩriai Ngai, nake nĩekũmũkuhĩhĩria inyuĩ. Wĩthambei moko manyu, inyuĩ ehia; na mũtherie ngoro cianyu, inyuĩ andũ a ngoro igĩrĩ.

9Wĩthikĩrei na mũgĩe na kĩeha, o na mũrĩre maithori: nayo mĩtheko yanyu nĩĩgarũrũke ĩtuĩke kĩeha, nakĩo gĩkeno kĩanyu kĩgarũrũke gĩtuĩke gũthimbara.

10Wĩnyihiei harĩ Mwathani, nake nĩekũmũtũũgĩria.

11Ariũ a Ithe witũ, tigai gũcambania. Mũndũ ũrĩa ũcambagia mũrũ wa ithe, kana agatuĩra mũrũ wa ithe ituĩro, nĩ watho acambagia, na nĩ watho atuagĩra ituĩro: ĩndĩ wakorũo nĩ watho ũtuagĩra ituĩro, ndũrĩ mũhingia wa watho, no makĩria nĩũtuĩkĩte mũtuanĩri cira.

12Harĩ o ũmwe mũheani watho na mũtuanĩri cira, o we ũhotaga kũhonokania, o na kũninana. Kaĩ ũkĩrĩ ũ, wee ũtuagĩra mũndũ ũrĩa ũngĩ ituĩro?

13Rĩu-rĩ, ta thikĩrĩriai, inyuĩ muugaga atĩrĩ, Ũmũthĩ nĩtũgũthiĩ itũũra rĩna, kana tũgathiĩ kuo rũciũ, tũgatũũre kuo mwaka mũgima, na tũkonjorithie kuo, na tuone uumithio:

14no rĩrĩ, mũtiũĩ ũrĩa gũgatuĩka rũciũ. Muoyo wanyu nĩ mũtũũ? Amu mũrĩ o kĩbii, kĩrĩa kĩonekaga kahinda kanini, gĩgacoka gũthira biũ.

15Handũ ha ũguo nĩ kaba muugage atĩrĩ, Mwathani angĩenda-rĩ, nĩtũgũtũũra muoyo, na twĩke ũna na ũna.

16No rĩu, nĩ gwĩkumia mwĩkumagia nĩ ũndũ wa nguthi cianyu; nakuo gwĩkumia guothe ta kũu nĩ kũũru.

17Nĩ ũndũ ũcio-rĩ, mũndũ ũrĩa ũũĩ gwĩka wega, na ndawĩke, ũcio nĩ kwĩhia ehagia.

← Chapter 3 Jump to: Chapter 5 →