James 2

Kikuyu Bible (IBUKU RĨRĨA ITHERU RĨA NGAI)

← Chapter 1 Jump to: Chapter 3 →

1ARIŨ a Baba, ha ũhoro wa wĩtĩkio ũrĩa wa gwĩtĩkia Mwathani witũ Jesu Kristo, o we mwene riri-rĩ, tigai kũwĩtĩkia mũgĩtĩagĩra andũ maũthĩ.

2Tondũ rĩrĩ, kũngĩũka thunagogi yanyu mũndũ wĩ na gĩcũhĩ gĩa thahabu na ehumbĩte nguo thaka-rĩ, na ningĩ gũcoke gũũke mũndũ mũthĩni wĩhumbĩte nguo thũku-rĩ,

3na inyuĩ mũtĩe ũcio wĩhumbĩte nguo iria thaka, mũmwĩre atĩrĩ, Wee-rĩ, ikara thĩ handũ haha hega; na mwĩre ũcio mũthĩni atĩrĩ, Wee-rĩ, rũgama harĩa; kana rĩrĩ, Ikara thĩ haha magũrũ-inĩ makwa-rĩ;

4githĩ mũtikoragwo mwĩ na ngũũrani thĩinĩ wanyu, na mũgatuĩka atuĩri andũ, mũkĩrĩ na meciria moru?

5Ariũ a Baba, inyuĩ nyenda mũno, ta thikĩrĩriai: githĩ Ngai ndaagĩthurire andũ arĩa marĩ athĩni gũkũ thĩ matuĩke itonga ũhoro-inĩ wa wĩtĩkio, na matuĩke a kũgaĩrũo ũthamaki ũrĩa erĩire arĩa mamwendaga?

6Ĩndĩ inyuĩ nĩ kũmenereria mũmenagĩrĩria ũrĩa mũthĩni. Itonga-rĩ, githĩ ticio imũnyariraga ikamũgucũrũria na hinya, ikamũtwara cira-inĩ?

7Ningĩ-rĩ, ticio icambagia rĩĩtwa rĩrĩa rĩĩ gĩtĩo, o rĩrĩa mwĩtanagio narĩo?

8Rĩu-rĩ, mwakorũo nĩmũhingagia watho ũrĩa mũtue nĩ Mũthamaki, o ũrĩa wandĩkĩtwo Maandĩko-inĩ atĩrĩ, Enda mũndũ ũrĩa ũngĩ o ta ũrĩa wĩendete wee mwene-rĩ, nĩmwĩkaga wega:

9Ĩndĩ mwakorũo mũtĩagĩra andũ maũthĩ-rĩ, nĩ kwĩhia mwĩhagia, na mũgatuwo nĩ watho ũcio atĩ mũrĩ aagarari watho.

10Nĩ ũndũ mũndũ o wothe angĩkorũo arũmagia watho wothe, no akahĩngwo nĩ kaũndũ kamwe kaguo, mũndũ ũcio aatuĩka ta mũndũ ũhingũrĩte mĩhingo yaguo yothe.

11Amu ũrĩa woigire atĩ, Ndũkanatharanie, nowe woigire atĩ, Ndũkanoragane. Rĩu-rĩ, o na ũngĩkorũo ndũgũtharania, no nĩ kũũragana ũkũũragana, nĩũgĩtuĩkĩte mwagarari watho.

12Aragiai, o na mwĩkage maũndũ manyu, mũkĩmenyete atĩ mũrĩ a gũtuĩrũo cira na watho ũrĩa ũtarĩ wa ũkombo.

13Nĩ ũndũ mũndũ ũrĩa wagĩte kũiguanĩra tha, nĩwe ũgatuĩrũo cira atekũiguĩrũo tha: nacio tha nĩciĩrahaga nĩ ũndũ wa gũtoria cira.

14Ariũ a Baba, gũkĩrĩ na uumithio ũrĩkũ, mũndũ angiuga atĩ arĩ na wĩtĩkio, no ndarĩ na ciĩko njega ekaga? Ĩ, wĩtĩkio ũcio wakĩhota kũmũhonokia?

15Mũrũ wa Ithe witũ kana mwarĩ wa Ithe witũ angĩkorũo arĩ njaga, na aagĩte irio cia kũrĩa o mũthenya o mũthenya-rĩ,

16na ũmwe wanyu amere atĩrĩ, Thiĩi na ũhoro, mũgote mwaki na mũkarĩe, mũhũne; na ndamahe indo iria mabatairio nĩcio cia mwĩrĩ, gwĩka ũguo-rĩ, kwĩ na uumithio ũrĩkũ?

17Ũguo no taguo wĩtĩkio, ũtarĩ na ciĩko njega, nĩ mũkuũ guo mwene.

18Ĩndĩ hihi mũndũ no kuuga atĩrĩ, Wee-rĩ, wĩ na wĩtĩkio, na niĩ-rĩ, ndĩ na ciĩko njega; rĩu-rĩ, ta kĩnyonie wĩtĩkio waku hatarĩ ciĩko njega, na niĩ-rĩ, nĩngũkuonia wĩtĩkio wakwa nĩ ũrĩa njĩkaga ciĩko njega.

19Wee-rĩ, nĩwĩtĩkĩtie atĩ Ngai no ũmwe; ũguo wĩkĩte no wega: o na ndaimono nacio nĩciĩtĩkĩtie, igakĩinaina

20No rĩrĩ, wee mũndũ ũyũ ũtarĩ kĩene, wetĩkĩra kũmenya atĩ wĩtĩkio hatarĩ na ciĩko njega nĩ mũthatu?

21Githĩ Iburahimu ithe witũ ndaatuirũo mũthingu nĩ ũndũ wa ciĩko njega, tondũ wa ũrĩa aarutĩire Ngai mũriũ Isaaka kĩgongona-inĩ?

22Ndũkuona atĩ wĩtĩkio nĩwarutire wĩra hamwe na ciĩko ciake, naguo wĩtĩkio wake ũgĩtuwo mũiganĩru kũna nĩ ũndũ wa ciĩko icio?

23Namo Maandĩko magĩkĩhingio marĩa moigĩte ũũ, Nake Iburahimu nĩehokete Ngai, naguo ũndũ ũcio agĩtuĩrũo ta arĩ ũthingu e naguo: nake agĩgĩtuwo mũrata wa Ngai.

24Nĩmũkuona atĩ mũndũ atuagwo mũthingu nĩ ũndũ wa gwĩka ciĩko njega, na to ũndũ wa wĩtĩkio wiki.

25O nake Rahabu, mũka ũrĩa wa maraya-rĩ, githĩ ndaatuirũo mũthingu o ũndũ ũmwe, nĩ ũndũ wa ciĩko iria ekire, tondũ wa ũrĩa aagwatire arekio arĩa ũgeni, agĩcoka akĩmagereria njĩra ĩngĩ?

26Nĩ ũndũ-rĩ, o ta ũrĩa mwĩrĩ ũtarĩ roho wĩ mũkuũ, no taguo wĩtĩkio, ũtarĩ na ciĩko njega, wĩ mũkuũ.

← Chapter 1 Jump to: Chapter 3 →