Numbers 36

Kikuyu Bible (IBUKU RĨRĨA ITHERU RĨA NGAI)

← Chapter 35 Jump to:

1NAO anene a nyũmba cia maithe ma mbarĩ ya ciana cia Gileadi wa Makiru, mũrũ wa Manase, ũrĩa warĩ wa mbarĩ ya ciana cia Jusufu, magĩthengerera Musa, me na anene a nyũmba cia maithe ma ciana cia Isiraeli,

2makĩmera atĩrĩ, Jehova nĩaathanire agĩkwĩra wee, mwathi witũ, atĩ ũkahe ciana cia Isiraeli bũrũri ũcio ũũcukĩire mĩtĩ, ũtuĩke wacio; ningĩ wee mwathi witũ ũkĩĩrũo nĩ Jehova atĩ igai rĩa Zelofehadi, mũrũ wa ithe witũ, rĩheo airĩtu ake.

3Na rĩrĩ, acio mangĩhikio nĩ mũndũ o na ũrĩkũ wa ciana cia mĩhĩrĩga ĩngĩ thĩinĩ wa ciana cia Isiraeli, igai rĩao nĩrĩkeherio rĩthengio igai-inĩ rĩa maithe maitũ, rĩonganĩrĩrio na igai rĩa mũhĩrĩga ũrĩa magatuĩka aguo; na tondũ ũcio igai rĩu rĩao nĩrĩgathengio harĩ igai rĩrĩa rĩatũgũĩrĩire.

4Na hĩndĩ ĩrĩa Jubili ya ciana cia Isiraeli ĩgakinya nĩguo igai rĩao rĩkonganĩrĩrio na igai rĩa mũhĩrĩga ũrĩa magakorũo matuĩkĩte aguo; na tondũ ũcio igai rĩao nĩrĩkeherio rĩthengio harĩ igai rĩrĩa rĩagũĩrĩire mũhĩrĩga wa maithe maitũ.

5Nake Musa agĩatha ciana cia Isiraeli, o ta ũrĩa ũhoro wa Jehova watariĩ, akiuga atĩrĩ, Mũhĩrĩga wa ciana cia Jusufu nĩwoiga wega.

6Ũhoro ũyũ nĩguo Jehova aathanĩte ũkoniĩ airĩtu a Zelofehadi, akoiga atĩrĩ, Nĩmahikio nĩ mũndũ o ta ũrĩa mekuona arĩ wega; no rĩrĩ, mũmahikia no mũhaka akorũo arĩ wa nyũmba ĩmwe ya mũhĩrĩga ũrĩa ithe wao oimĩte.

7Na tondũ ũcio hatirĩ igai rĩa ciana cia Isiraeli rĩgathengio mũhĩrĩga-inĩ warĩo, rĩtuĩke rĩa mũhĩrĩga ũngĩ; nĩ gũkorũo ciana cia Isiraeli, mũndũ o mũndũ, agaikara arũmanĩrĩire na igai rĩa mũhĩrĩga wa maithe.

8Ningĩ mũirĩtu o wothe ũrĩa ukagwata igai rĩa gĩthaka mũhĩrĩga-inĩ o wothe wa ciana cia Isiraeli-rĩ, agatuĩka mũka wa mũndũ ũmwe wa nyũmba ĩo ya mũhĩrĩga wa ithe, nĩ getha ciana cia Isiraeli, mũndũ o mũndũ agwatage igai rĩa maithe.

9Tondũ ũcio hatirĩ igai o na rĩmwe rĩgathengio mũhĩrĩga-inĩ warĩo, rĩtuĩke rĩa mũhĩrĩga ũngĩ; nĩ ũndũ mĩhĩrĩga ya ciana cia Isiraeli, mũhĩrĩga o mũhĩrĩga ũgaikara ũrũmanĩrĩire na igai rĩaguo kĩũmbe.

10Na rĩrĩ, o ta ũrĩa Jehova aathire Musa gwĩkwo, ũguo noguo airĩtu acio a Zelofehadi mekire;

11nĩ gũkorũo Mahala, na Tiriza, na Hogila, na Milika, o na Noa, airĩtu a Zelofehadi, maahikirio nĩ ariũ a mũrũ wa nyina na ithe wao.

12Arĩa maamahikirie nĩ arũme a nyũmba cia ariũ a Manase wa Jusufu, narĩo igai rĩao rĩgĩikara o mũhĩrĩga-inĩ wa nyũmba ya ithe wao.

13Macio nĩmo mawatho, o na matuĩro ma cira, marĩa Jehova aathire Musa ere ciana cia Isiraeli imarũmagĩrĩre, irĩ kũu werũ-inĩ wa Moabi, gũkuhĩ na Jorodani, o kũu Jeriko.

← Chapter 35 Jump to: