Song of Solomon 2

Kikuyu Bible (IBUKU RĨRĨA ITHERU RĨA NGAI)

← Chapter 1 Jump to: Chapter 3 →

1Niĩ nĩ niĩ ihũa rĩa nyeki-inĩ ta marĩa mameraga Sharoni, ningĩ nĩ niĩ kĩro gĩa itoka rĩrĩa rĩgĩaga ituamba-inĩ.

2Ta kĩro gĩa itoka rĩmerete gatagatĩ ga ciigua, noguo mũrata wakwa atariĩ arĩ airĩtu-inĩ arĩa angĩ.

3Mũtĩ wa macungwa ũmerete gatagatĩ ka mĩtĩ ya gĩthaka, nĩ ta ũguo mwendwa wakwa ahaana arĩ arũme-inĩ arĩa angĩ. Ndaikarire thĩ mwĩgunyĩ-inĩ wake ngenete mũno, na matunda make makĩnjamĩra mũrĩo.

4Aandonyirie thingira ũrĩa wa kũrĩĩra iruga, nakĩo kĩbebero gĩake kĩrĩa aahaicĩtie igũrũ rĩakwa nĩ rũendo.

5Ta ndeithĩrĩriai na thabibu, mũkĩndiũkie na macungwa, amu ndĩ mũcuce nĩ rũendo.

6Guoko gwake kwa ũmotho ta nĩkũngĩe makano, kũrĩa kwa ũrĩo nakuo nĩgũkĩ’hĩmbĩrie.

7Inyuĩ andũ-a-nja a Jerusalemu-rĩ, nĩndamwĩhĩtithia na thiya, na mĩgoma ya thwariga cia werũ-inĩ, atĩ mũtikoimbuthũre rũendo, o na kana mũrũarahũre, o nginya rũĩyendere o ruo rũene.

8Nĩ mũgambo wa mwendwa wakwa ndaigua! Ĩ nĩ gũũka aroka, okĩte akĩrũũgaga irĩma-inĩ, agoka o agĩtũrũhaga ithũngũri-inĩ.

9Mwendwa wakwa atariĩ ta thiya, kana ta thwariga ĩrĩa nyanake: nĩwe ũcio! rĩu nĩarũngiĩ rũthingo-inĩ ruitũ na nja, nĩ kũrorereria ararorereria na ndirica, agakĩng’eteria rũkonjo-inĩ.

10Mwendwa wakwa nĩ kwaria araaria, akanjĩra atĩrĩ, Mũrata wakwa, thaka yakwa, ũkĩra tũthiĩ!

11Amu-rĩ, hingo nĩ thiru ya gathano, mbura nĩĩhĩtũkĩte ĩgathira:

12Nĩ hĩndĩ thĩ ĩrakunũka mahũa; hingo nĩ nginyu ya kũhetũra mĩthabibu, na bũrũri witũ ũkagambaga o ndutura;

13Mũkũyũ-rĩ, nĩwĩruhĩtie ngũyũ iria nduru, mĩthabibu nayo nĩĩtumũkĩte kĩro, o na kũhunjia ĩkahunjia mũtararĩko wayo. Mũrata wakwa, thaka yakwa, gĩũkĩre tũthiĩ!

14Ĩ wee, gatutura gaka gakwa, ũrĩ kũu mĩatũka-inĩ ya rũara, o hau hegitĩtie hurũrũka-inĩ-rĩ, ndũreke nguone ũthiũ! reke njigue mũgambo waku; amu mũgambo waku nĩ mwega mũno, na ũthiũ waku nĩ mũthaka.

15Tũnyitĩrei mbwe, tũbwe o tũrĩa, tũrĩa-ni tũgũmagia mĩgũnda ya mĩthabibu! thima-rĩ, mĩthabibu iitũ nĩĩtumũrĩte kĩro.

16Mwendwa nĩ wakwa, na niĩ ndĩ wake: harĩa arĩithagia nĩ mahũa-inĩ.

17Hũndũka, mwendwa wakwa, tuĩka ta thiya kana ta thwariga nyanake ĩrĩ irĩma-inĩ cia Betheri, hũndũka nginya rĩrĩa kũrĩrura, nacio ciĩruru ciirĩrie.

← Chapter 1 Jump to: Chapter 3 →