Song of Solomon 8

Kikuyu Bible (IBUKU RĨRĨA ITHERU RĨA NGAI)

← Chapter 7 Jump to:

1Na arĩ korũo ũgĩtuĩkĩte ta arĩ wee mũrũ wa maitũ, ũrĩa wongire nyondo o icio cia maitũ! hĩndĩ ĩo ingĩgĩgũtũnga njĩra, ndakũmumunya; ĩĩ-ni, o na gũtirĩ mũndũ o na ũrĩkũ ũngĩ’mena.

2Nĩ gũgũtwara ingĩgũtwara, ngũtonyie nyũmba ya maitũ, nake nĩ kũnduta angĩnduta; ndagũkundithia ndibei ĩrĩa njamithie wega, ya ngogoyo yakwa ya ikomamanga.

3Guoko kwa ũmotho kwa mwendwa wakwa nĩ kũngĩa kũngĩkĩngĩa makano, kũrĩa kwa ũrĩo nakuo kũ’hĩmbĩrie.

4Inyuĩ andũ-a-nja aya a Jerusalemu-rĩ, nĩndamwĩhĩtithia atĩ mũtikoimbuthũre rũendo, o na kana mũrũarahũre, o nginya rũĩyendere o ruo rũene.

5Nũ ũcio ũkwambata akiuma na werũ-inĩ, etiiranĩtie na mwendwa wake? Hau mũtĩ-inĩ ũcio wa macungwa-rĩ, nĩho ndakũhindũrĩire wĩ toro; kũrĩa nakuo nĩkuo nyũkwa aarũmĩirũo agĩgũciara, nokuo aarũmĩirũo, ũcio mũgũciari.

6Njĩkĩra ngoro-inĩ yaku ta arĩ rũũri wĩĩkĩrĩte, na ta arĩ rũũri wĩĩkĩrĩte guoko: amu rũendo rũĩ hinya o ta gĩkuũ; ũiru-rĩ, ũũmĩte ihu o ta mbĩrĩra: mahenũka maguo nĩ mahenũka o ro ma mwaki, o ta arĩ mo rũrĩrĩmbĩ rũa Jehova kĩũmbe.

7Maĩ, o na mangĩiyũrĩrĩra, matingĩhota kũhoria rũendo, rũthire, njũĩ-rĩ, itingĩhota kũrũtwara rũũrĩre: mũndũ o na angiuga arute ũmathi wothe wa gwake mũciĩ atĩ egũrĩre rũendo naguo, no kũnyũrũrio angĩnyũrũrio o kũnyũrũrio.

8Tũrĩ na kairĩtu ka nyina witũ, nako gatiumĩtie nyondo: tũgeka kairĩtu kau gaitũ atĩa hingo ĩrĩa gagatuĩka ga kwarĩrio?

9Angĩgatuĩka ta rũthingo, tũgaaka gĩtara kĩa betha igũrũ rĩake; na angĩtuĩka mũrango, tũkamũhinga na kũmũhũrĩrĩra mĩbaũ ya mũtarakwa.

10Niĩ-rĩ, ndarĩ rũthingo, nacio nyondo ciakwa ciatariĩ ta icũĩro njake igũrũ rĩaruo: gwagĩtuĩka ũguo-rĩ, maitho-inĩ make ngĩikara ta mũndũ muonu thayũ.

11Suleimani-rĩ, aarĩ na mũgũnda wake wa mĩthabibu Baali-hamoni; mũgũnda ũcio akĩũkomborithia harĩ athondeki, o mũndũ arutage icere ngiri ĩmwe cia betha nĩ ũndũ wa maciaro maguo.

12Niĩ, mũgũnda wakwa wa mĩthabibu, o ũyũ wakwa-rĩ, ũrĩ o harĩ niĩ: wee, Suleimani-rĩ, ĩrigĩrie na ngiri ĩo, nao acio athondeki maciaro maguo maikare na magana merĩ.

13Ĩ wee mũikari mĩgũnda-inĩ, a-thiritũ aku nĩ mũgambo waku maikaire mategeire matũ; ta gĩtũme ndĩũigue!

14Mwendwa wakwa, hiũha, ũtuĩke ta thiya kana ta thwariga nyanake ĩrĩ irĩma-inĩ iria irĩ mahuti manungi wega!

← Chapter 7 Jump to: