Zechariah 13

Kalenjin Bible Revised (BUKUIT NE TILIIL Sireet ne Dutero Kanon)

← Chapter 12 Jump to: Chapter 14 →

1Tuun kiyaatyin kootap Daudi ak piik che menyei Jerusalem, kondametutap peek eng' peetuunooto, amu tengekto ak murwoonindo.

2Ak mwaei Kamuktaindet ne Toroor ne po lugoosyek kole tuun aistoi eng' peetuunooto kainaigap kanamonik eng' emet, ama kibwaati kogeny: ak aiste kogeny maotik ak tamirmiryet ne murwoon eng' emet.

3Ak ngot ko tuun komaoten age tugul, koleenji anyun kwanda ak kamet che kisichei chiichooto, Mesabe; amu imwae lembechek eng' kainetap Kamuktaindet ne Toroor: ak kotoor ineendet kwanda ak kamet che kisichei ineendet, ye kamaoten.

4Ak tuun ililandos maotik eng' peetuunooto, ililani age tugul agobo ng'ang'utyennyi, ye kamaoten; ama kolaachi ngoryeet ne sabul si kobiit koberber piik:

5ago mwaei kole ma aa maotyot, aa kabatindet; amu ki kiyaa aek otwogindet kobooch ming'inatennyu.

6Ak keteebe keleenji, Po nee perutichu mi euneguk? Kowol anyun kole po perutichu kaguotenet ne ki kiguotena eng' kootap choronokyuk.

7Ng'eet, ee rotwetap chok, porye mestowondennyu, porye chiito ne ki mi tuwai, mwaei Kamuktaindet ne Toroor ne po lugoosyek: pir mestowot, si koiyesta keechiirek; ak atokyi eunnyu che mengeechen.

8Ki istoi, ak kobek eng' peetuunooto eng' emet komugul, kebeberwek aeng', mwaei Kamuktaindet ne Toroor; ago kibagakyin olooto kebeberta agenge eng' somok.

9Ak amut kebeberato po somok kobun maat, ak atiliil icheek ko uu ye kitiliili fedha ak atyem icheek ko uu ye kityemei thahabu: kuurei icheek kainennyu, ak agas icheek: amwae ale, Icheeget ko piikyuk; ak kole, Kamuktaindet ne Toroor ko Kamuktaindennyu.

← Chapter 12 Jump to: Chapter 14 →