Zechariah 2

Kalenjin Bible Revised (BUKUIT NE TILIIL Sireet ne Dutero Kanon)

← Chapter 1 Jump to: Chapter 3 →

1Ki ang'eet met ak ageer, ogeero, chiito ne tinyei eng' eunnyi porowet ne kikwaise.

2Yeityo ateebee aleenji, “Iwendi ano?” Ak ki leenjo, “Awendi akwai Jerusalem, si kobiit anai ole tee tebeesindanyi ak koindonyi.”

3Ki wo anyun malaikaiyandanooto ki ng'alaalwo, kwo kotuiyo ak malaikaiyat age ne kiganyonji ineendet,

4ak koleenji ineendet, “Labat, ng'alaalji murenonin ileenji: Ki menyei Jerusalem ko uu ye ki menyei nganasook che mengeechen che ma tinyei irimoik, amu chaang'indap piik ak tuuga che mi.

5Amu mwaei Kamuktaindet ne Toroor kole, Aegu irimeet ne po maat eng' komoswek tugul, ak aegu toroornatet eng' kwenunnyi.”

6Mwaei Kamuktaindet ne Toroor kole “Eiye, eiye! Omwei eng' emetap murot kaataam, amu ki aseerak ko uu usoonaik ang'wan che po kipsengwet.

7Ee mwechi Zion, sarugei inyee, ne omeng'iisyei ak cheptap Babilon.”

8Mwaei Kamuktaindet ne Toroor ne po lugoosyek ne kagoyookta ineendet agobo toroornatennyi, awo ye mi pororyosyek che kiluulok, kole “Ee iman, ineendet ne twook, ko katwa laptetap kondanyi.

9Ogeero, ang'warii icheek, ak koek luulenigap otiikwak icheek.” Niito ne onae ole ki iyookwo Kamuktaindet ne Toroor ne po lugoosyek.

10Mwaei Kamuktaindet ne Toroor kole “Tyen ak ibaibaitu, ee cheptap Zion; amu, keero, anyoone amenye kwenung'ung'.

11Ak konamgei pororyosyek che chaang' ak Kamuktaindet ne Toroor eng' peetuunooto ak koek piikyuk; ak ameny kwenung'ung'.” Inae niito ile ki iyookwo Kamuktaindet ne Toroor ne po lugoosyek anyo ole imi.

12Ak konam Kamuktaindet ne Toroor Judah koek kebebertanyi eng' emet ne tiliil, ak kolewen kogeny Jerusalem.

13Osisye, okweek piik tugul eng' taitap Kamuktaindet ne Toroor; amu kagong'eet eng' meng'ootennyi ne tiliil.

← Chapter 1 Jump to: Chapter 3 →