Zechariah 7

Kalenjin Bible Revised (BUKUIT NE TILIIL Sireet ne Dutero Kanon)

← Chapter 6 Jump to: Chapter 8 →

1Ki nyoonji `ng'olyootap Kamuktaindet ne Toroor Zekariah, eng' kenyiitap ang'wan ne po Laitoryat Darius, eng' peetuutap ang'wan ne po arawetap sogool, nooto ko Kisleb.

2Kiga koyookto anyun icheek che po Bethel Sareser ak Regem-melek, kobooto piikwak, koba kosoom chameet eng' Kamuktaindet ne Toroor,

3ak kong'alaalji tisiigap kootap Kamuktaindet ne Toroor ne po lugoosyek ak maotik, koleenji, “Tos kanyaljo ariir eng' arawet ne po muut, atabaangei, ko uu ye ki ayai eng' kenyisyechu chaang' kot?”

4Ki nyoonjo anyun ng'olyootap Kamuktaindet ne Toroor ne po lugoosyek koleenjo,

5ng'alaalji piik tugul che po emet ak tisiik, ileenji ye kingo rugutkei ak oriirye eng' arawetap muut ak ne po tisap, eng' kenyisyechooto tamanwogik tisap, ko tos ki orugutkei agobo anee, aneendet?

6Ak ye oame, ak ye oee, ko tos moamjinigei, ak oeechinigei?

7Tos manyoljok ogas ng'aleek che ki mwa Kamuktaindet ne Toroor eng' maotik che po tai, ye ki kimenyei Jerusalem, ak komi perurto, ak nganasookyik che mi komoswekyik tugul, ak ye ki kimenyei murot tai ak soito?

8Ak ki nyoonji `ng'olyootap Kamuktaindet ne Toroor Zekariah koleenji,

9Kamwa Kamuktaindet ne Toroor ne po lugoosyek kole, oyai kirwooget ne po iman, ak oyachi tupchetap chii age tugul eng' okweek myeeindo ak rireenet:

10amous kwony ne ki kosiirtoe manong'otyot, anan ne ma tinyei sigiik, anan ne too, anan ne panan; amat kobwaat chii age tugul eng' okweek yaityet eng' muguleldanyi agobo tupchennyi.

11Ago ki eesyo kogas iit, ak kililich tigigoikwak, ak kotiim itiikwak si ma kas.

12Ee, ki iuit mugulelwekwak koigei kibargoiyet, si ma kas ng'atuutyet, ak ng'aleek che kiga koyook Kamuktaindet ne Toroor ne po lugoosyek eng' Kabuusennyi ne Tiliil eng' eunegap maotik che po tai: ki mong' anyun nereegek che eecheen kobunu Kamuktaindet ne Toroor ne po lugoosyek, amu nooto.

13Ak ko uu ye kingo riirchi ineendet icheek ama kogas, ko uu nooto tuun riirtos icheek ama kase, mwaei Kamuktaindet ne Toroor ne po lugoosyek;

14ago aiyestoi icheek eng' kipchurchuryet eng' pororyosyek tugul che ki tomo konai. Ki ek anyun emet karaatya eng' let, kot ko mata kobun chii yooto anan koweegegei: amu ki igoochi emet ne ki karaaran koguber.

← Chapter 6 Jump to: Chapter 8 →