1 Corinthians 3

Kalenjin Bible (BUKUIT NE TILIL)

← Chapter 2 Jump to: Chapter 4 →

1Kitemena anyun, che kitupche, ang’alalwok ko u bik che mi eng’ atebetab tamirmiriet, ago ko u bik che mi eng’ atebetab borto, ko u che manyurunik eng’ Kristo.

2Kiaguenak chego, ma abaenak amitwogik che uuen; amu kitom omuch; achicha, agot nguno kotom omuch;

3amu ta omi eng’ atebetab borto: amu ko u ye mi kwenung’wong’ ng’etkonda ak boriet, tos momi eng’ atebetab borto, ak obendoti ko u biteetab bik?

4Amu ye mwaei age kole, A bo Paulo; ak kolen age, A bo Apolo; tos ma o bik?

5Nee anyun Apolo? Ko nee Paulo? Kiboitinik che kigonok oyan; ak ko u ye kiigochi Kiptaiyat age tugul.

6Kiagole, kobisi Apolo; ago kiibit Jehovah.

7Noto anyun matilei kiy ne kolei, anan ne ibisi; ago Jehovah ne ibiti.

8Noto anyun, inendet ne kolei ak inendet ne ibisi ko agenge: ago tun nyoru age tugul melektanyi inegei ko u boisiennyi.

9Amu ki kiboitinikab Jehovah che kiboisiei koboto inendet: okwek ko o mbaretab Jehovah, gotab Jehovah.

10Kialumde lumeiywot ko u teegindet ne o ne ng’om, ko u mieindab Jehovah ne kigigona; ak teechei chito age baragunnyi. Ago ingorib chi age tugul ole teektoi eng’ baragunnyi.

11Amu mami lumeiywot age ne imuchi chi kolumda kobate noto kigelum, noto Jesu Kristo.

12Ago ngo teech chi baragutab lumeiywondonoto eng’ tahabu, feda, koik che bo kamanutiet ne o, ketik, suswek, mobek;

13tun king’anyei boisietab chi age tugul: amu tun ng’anyei betut, amu king’anyei eng’ mat; ak kotiem mat ole teptoi boisietab chi age tugul.

14Ngo tebi boisietab chi age tugul ne kiteech baragunnyi, kotaachei inendet melekto.

15Ngo lal boisietab chi age tugul, kobetos tugukyik: ago kisoru inendet; ago ko u ye kisoru eng’ mat.

16Mongen okwek ole o hekalut ne bo Jehovah, ak menyok Tamirmirietab Jehovah?

17Ak ngo ng’em chi age tugul hekalut ne bo Jehovah, kotun ng’emei Jehovah inendet; amu tilil hekalut ne bo Jehovah, okwek noto.

18Amat koberbergei chi. Ngobwati chi age tugul eng’ kwenung’wong’ kole ng’om eng’ betusiechu, ko ingoek ne berber, si kobiit koek ne ng’om.

19Amu ng’omnatet ne bo ng’onyuni ko berberindo eng’ Jehovah. Amu kigisir kele, Inendet ne namei che ng’omen eng’ ng’alsenywa:

20ak kogeny, Ingen Kiptaiyat kabwatutikab che ng’omen, kole buch.

21Noto anyun amat kolosgei chi eng’ bik. Amu tuguk tugul ko chekwok;

22ngo Paulo, anan Apolo, anan Kepa, anan meet, anan tuguk che mitei, anan tuguk che bwanei; tugul ko chekwok;

23ak o bo Kristo; ak Kristo ko bo Jehovah.

← Chapter 2 Jump to: Chapter 4 →