1 Corinthians 5

Kalenjin Bible (BUKUIT NE TILIL)

← Chapter 4 Jump to: Chapter 6 →

1Mwaat komie kele mitei ibetab ge kwenung’wong’, ibetab ge ne mami agot eng’ Bororiosiek, kele ibegei chi ak osotiotab kwandanyi.

2Ak omendosi, ama agot oarogense, si kobiit keisto eng’ kwenung’wong’ inendet ne kiyai kioto.

3Amu ane iman, ko mamite eng’ borto, ago amite eng’ tamirmiriet, kaaruokyi anyun inendet ne kiyai kiito ko u noto, ko u ye amite,

4ye koyumge eng’ kainetab Kiptaiyandennyo Jesu, koboto tamirmiriennyu, ak kamuktaetab Kiptaiyandennyo Jesu,

5ogochi Setani chito ne u noto si keng’em borto, si tun kesor tamirmiriennyi eng’ betutab Kiptaiyat Jesu.

6Ma kararan kalosuneng’wong’ bo ge. Tos mongen ole igutu mermerek tutigin kererutiet komugul?

7Ounde mermerek che bo keny, si kobiit oegu kererutiet ne leel, ko u ye mami mermerek eng’ okwek. Amu kigeeny agine aruennyo ne bo Paska, noto ko Kristo:

8noto anyun ongerib igorta, ma eng’ mermerek che bo keny, anan eng’ mermerekab yaitiet ak tengekto, ago eng’ makatiat ne ma kinde mermerek che matinyei kenisiet ak bo iman.

9Kiasirwak eng’ baruennyu ale amonamge ak bik che soksei;

10mamwae ale otabanege mising’ che soksei che bo ng’onyuni, anan kipkeinik anan rebik, anan che saei kanamonik; amu nda u noto ta kanyoljok omande eng’ ng’ony:

11ago nguno asirwok, ale amonamge ak chi age tugul ne kiguure tupchet, ne soksei, anan kipkeiyat, anan ne saei kanamonik, anan ne chubisiei, anan kibogityot, anan rebindet; amat oamjine ak chito ne u noto, achicha.

12Amu amage nee aruokyi ichek che mitei sang’? Tos moruokyini okwek ichek che mitei go?

13Ago ichek che mitei sang’ koruokyin Jehovah choto. Oiste anyun chichoto sogoran eng’ kwenung’wong’.

← Chapter 4 Jump to: Chapter 6 →