1 Corinthians 8

Kalenjin Bible (BUKUIT NE TILIL)

← Chapter 7 Jump to: Chapter 9 →

1Nguno anyun agobo tuguk che kieng’jin kanamonik: kingen kele kitinye achek tugul naet. Menei naet, ago teeksei chamnyet.

2Ngo len chi age tugul ingen kiy age tugul, ko tomo konai ko u ye kanyol konai;

3ago ngo chamei chi age tugul Jehovah, ko naat chichoto eng’ inendet.

4Noto anyun eng’ amet ne bo tuguk che kieng’jin kanamonik, kingen kele mami kanamwet ne kiy eng’ ng’ony, ama mi Jehovah age kobate agenge.

5Amu agot nganda mitei che keguure cheptalelisiek, ngo eng’ kipsengwet, anan eng’ ng’ony; ko u ye mitei cheptalelisiek che chang’, ak kiptainik che chang’;

6ago eng’ achek komitei Jehovah agenge, inendet Kwanda, ne bunu tuguk tugul ak achek eng’ inendet; ak Kiptaiyat agenge, Jesu Kristo, ne mi tuguk tugul amu inendet, ak achek eng’ inendet.

7Ago mami naonato eng’ bik tugul: ago ko u ye kigonerta alak kanamonik agoi nguno, koamei ko u kit ne kagieng’ji kanamwet; ak muruonitu kabwatenywa ne nyalulat.

8Ago amitwogik ko ma kit ne imutech kerikyi Jehovah: anan ngo magiamisie, ko mararuech kiy; anan, ngeamisie, ko matesak kiy.

9Ago oripge si maek kanagutiet kimnatoning’wong’ eng’ che nyalulyotin.

10Amu ngo keerin chi inye ne itinye naet, iamisiei eng’ hekalut ne bo kanamwet, ko tos manyiganitu kabwatennyi, ngot ko nyalulat, kot koam tuguk che kieng’jin kanamonik?

11Ak lusei inendet ne nyalulat amu naeng’ung’, inendet tupchet ne kimechi Kristo.

12Ak u noto anyun, ye koyachini tengek tupchosiek, ak oguoteni kabwatenywa ne nyalulat, ko koyachi tengek Kristo.

13Noto anyun, ngot konachi amitwogik ne kitupche, ko ma aame banyek agoi, si manach ne kitupche.

← Chapter 7 Jump to: Chapter 9 →