Hebrews 10

Kalenjin Bible (BUKUIT NE TILIL)

← Chapter 9 Jump to: Chapter 11 →

1Amu tinyei Ng’atutiet uruetab tuguk che miachen che bwanei, ma itondab tuguchoto, maimuchi koyai ichek che rikyin koek che igesunotingei, eng’ tiseiywechoto igoitoi ichek kotugul eng’ kenyit age tugul.

2Nda ki u noto, ko tos, kima kebagaktoi kigoito? Amu ye kingo kagitilil saik konyil agenge, ko kimatata kotinyei kabwatetab tengekwogik kogeny.

3Ago eng’ tiseiywechoto komitei kabwatetab tengekwogik kenyit age tugul.

4Amu maimugaksei eng’ korotikab kirugik ak kwesik konem tengekwogik.

5Eng’ noto anyun ye kingonyo Kristo ng’ony, konyo komwa kole, Kima imach tiseiywek ak kagochinoik, Ago kiichobwa borto;

6Kima ibaibaitu eng’ kagochinoik che kibeelei komugul ak che bo tengekwogik:

7Amwa anyun ale, Keero, kaanyo (Kigisir agobo ane eng’ bukuit ne kigimaman) Ayai mageng’ung’, ee Jehovah.

8Mwaei ng’alechu mi meto yu kole, Ma imach anan ibaibaitu eng’ tiseiywek ak kagochinoik ak kagochinoik che kibeelei komugul ak che bo tengekwogik, eng’ choto (che kigoitoi ko u ye mwaei Ng’atutiet),

9yeityo komwa anyun inendet kole, Keero, kaanyo ayai mageng’ung’. Istoi ne bo tai, si kogimit ne bo aeng’.

10Kigitililech anyun eng’ magonato eng’ kagoitoetab bortab Jesu Kristo konyil agenge ak koyam.

11Ak tononi iman tisiindet age tugul eng’ betut age tugul koboisiei ak kogoitoi konyil che chang’ tiseiywechoto, che magoi imuch koisto tengekwogik;

12ago tisiindoni, ko ye kingo kagogoito tiseiywot agenge agobo tengekwogik agoi koigeny, kotebe anyun eutab tai ne bo Jehovah;

13kogeni koboch yoto agoi keyai bunikyik koek ng’echeretab kelyekyik.

14Amu kigoyai koek che igesunotingei agoi koigeny eng’ kagoitoet agenge ichek che kigitilil.

15Ak baorianjinech agine Tamirmiriet ne Tilil: amu kingobata komwa kole,

16Ni kayomiset ne tun kiyomisyinige ak ichek Ye ibata betusiechoto, mwaei Kiptaiyat; Andoi ng’atutikyuk mugulelwekwak, Ak asirji kabwatutikwak;

17Ama abwati chalwogikwak ak tengekwogikwak kogeny.

18Ye mitei anyun nyoetab kaat ne bo chuto, ko ma komitei kogeny kagoitoet agobo tengekto.

19Amu kitinye nyiganatet anyun, che kitupche, kemong’ji ole tilil eng’ korotikab Jesu,

20eng’ oret ne leel ak kosobei, ne kiyatwech, ne chutei anget ne kigioiye, ne noto ko bortanyi;

21ak amu kitinye tisiindet ne o ne bou gotab Jehovah;

22ongerikte anyun eng’ muguleldo ne bo iman eng’ nyiietab kayanet, ko kageis mugulelwekyok kemete kabwatet ne ya, ak kiun borwekyok eng’ beek che tililen:

23ongenam mising’ ng’ang’etab kamang’unennyo si mawalak; amu iman inendet ne kiiaroru:

24Ak ongibwatge achege eng’ achege kigimitge eng’ chamnyet ak boisiosiek che miach;

25ama kibagaktoi kituiyege achege eng’ achege, ko u biteetab bik alak, ago kiteechinige; ak ko u noto kosiir, ko u ye ogeere ole rigu betut.

26Amu ngot kekwetyini keyae tengek ko kagetaach naetab imanit, ko ma kong’etu tiseiywot age kogeny, ne bo tengekwogik,

27ago kagenet ne bo kiruoget eng’ kaiyweisiet, ak koromnatetab mat ne igesu bunik.

28Meei chito ne kasas Ng’atutietab Musa ko mami rirenet, eng’ baorinik aeng’ anan ko somok:

29obwatitoi ano okwek, ng’wanitu ne tia biret ne tun nyoljin kiruokyine inendet ne kigotiech Weritab Jehovah, ak koiit korotikab kayomiset, che kigitilile inendet, koek tuguk che ma tililen, ak kosas Tamirmirietab mieindo?

30Amu kingen inendet ne kigomwa kole, Nenyu yaaktaetab mugetut, ane ne ayaaktoi. Ak kogeny, Tun iruokyin Kiptaiyat bikyik.

31Kit ne bichii kot kibutyi eunekab Jehovah ne sobei.

32Ago obwat betusiek che bo keny, ye kingo kagegonok lapkeiyet; ye kingaomuite eng’ boriet ne o ne bo nyalilwogik,

33ye kioegu, eng’ kebeber, che kitang’ang’jin eng’ katewerisiosiek ak kanyililosiek; ak eng’ kebeber, ko kiotinye yamdaet koboto ichek che kicham keyachin ko u noto.

34Amu kiorire ichek che ki ratotin, ak ocham eng’ boiboiyet kerebenak tugukwok, amu kiongen ole otinye magornatet ne mie kosiir choto ago ne tebyei koigeny.

35Amowirte anyun nyiganateng’wong’, ne tinyei melekto ne o.

36Amu nyolu otinye muitaet, si ye kaoyai magetab Jehovah, omuch otaach arorutiet.

37Amu ta komi kitigin mising’, Si konyo inendet ne nyonei, ama igaigei.

38Ago sobei nenyu ne bo imanda eng’ kayanet, Ak ngot kochuchuigei ko mabaibaitu muguleldanyu eng’ inendet.

39Ago achek ko ma ki bo ichek che ichuchuchegei kobendi luset: ago ki bo ichek che iyani kot koit sorunetab sobondo.

← Chapter 9 Jump to: Chapter 11 →