Hebrews 7

Kalenjin Bible (BUKUIT NE TILIL)

← Chapter 6 Jump to: Chapter 8 →

1Amu Meldisedeki-nito, laitoriatab Salem, Tisiindet ne bo Jehovah ne Toror Mising’, ne kituiyo ak Abraham ye kiweeksei kobunu ole kibare laitorinik, ak koberur inendet,

2ne kipchechi agine Abraham kebebertab taman ne bo tugul ne ye kiweech, ko Laitoriatab imanda korok, ak yeityo kogeny ko Laitoriatab Salem, noto ko Laitoriatab kalyet;

3ne matinyei kwanda, ama tinyei kamet, ama tinyei orenywa, ama tinyei taunetab betusiek anan kagesunetab sobondo, ago kigiyai kogergeit ak Weritab Jehovah, tebyei ko tisiindet koigeny.

4Obwat anyun ole ki te oindab chichi, ne kiigochi Abraham, boiyot ne o, kebeberta ne bo taman ne bo bareiywek.

5Ak tinyei iman werikab Lawi che namei boisietab tisisiet, ng’atutiet konam kebeberwekab taman eng’ bik ko u eng’ Ng’atutiet, eng’ tupchosiekwak, agot nga kibunu bortab Abraham:

6ago kinam kebeberwekab taman eng’ Abraham inendet ne kima kiitito ichek eng’ orenywa, ak koberur inendet ne tinyei arorutik.

7Ago ne mami tiiyet age tugul, konyoru ne ming’in kaberuret eng’ ne o.

8Ak eng’ yu kotaachei bik che begu kebeberwekab taman; ago eng’ oloto, ko inendet ne kibaoriani kele sobei.

9Ak, kimuchi kemwa kele, eng’ Abraham agot Lawi, ne taachei kebeberwekab taman, ko kiigoito kebeberwekab taman;

10amu kita komi bortab kwandanyi, ye kituitos ak Melkisedek.

11Ak nda kimi kagesunatetab ge eng’ tiseinatetab Lawik (amu kinyorune yoto bik Ng’atutiet), ko kita kimage nee kobiit tisiindet age ne u kit ne ki u Melkisedek, ama kiititoi kit ne ki u Aron?

12Amu ngot kowalak tiseinatet, ko kanyol kewal agine ng’atutiet.

13Amu inendet ne kimwaitae tuguchu ko bo bororiet age, ne mami chi eng’ bororionoto ne kigobois eng’ kaptisisio.

14Amu toogu kele kibunu Kiptaiyandennyo oretab Juda; bororiet ne kima mwaitae Musa ng’olyo age tugul eng’ ng’alekab tisiik.

15Ak toogu komie kosiir, ngot kotun biitu tisiindet age eng’ kergeindab Melkisedek,

16ne kigiyai, ago ma eng’ oretab ng’atututikab borto, ago eng’ kimnatetab sobondo ne ma igesugei:

17amu kibaoriani kele, I tisiindet koigeny Ko u kit ne ki u Melkisedek.

18Amu mitei metoet ne bo ng’atutiet ne kiga kindoune, amu nyalulennyi ama tilei kiy

19(amu ma yai Ng’atutiet kiy koek ne igesunotgei), ak komitei ibunetab kamang’unet ne kaigai, ne kirikyine Jehovah.

20Ama yaaksei ama kiyosio

21(amu kigiyai ichek koek tisiik ama mi kayosiet eng’ inendet ne mwaei agobo inendet kole, Kiiyosio Kiptaiyat ama walei kole, I tisiindet koigeny).

22Ko u noto anyun kiek Jesu tononjinindet ne bo arorutiet ne mie kosiir.

23Ago icheget ko kigiyai koek tisiik che chang’, amu eete ichek meet si matebi:

24ago amu tebyei inendet koigeny, kotinyei anyun tiseinatet ne magiwalei.

25Eng’ noto anyun komuchi kogeny kosor agoi kasuldaet ichek che bwanjin Jehovah eng’ inendet, amu sobei inendet koigeny si kobiit kosaei agobo ichek.

26Amu nyoljinech tisiindet ne o ne u ni, ne tilil, ne matinyei kenisiet, ama tinyei muruonindo, ne itabanat eng’ kiptengeginik, ak kigitoror kosiir kipsengwetisiek;

27ne ma nyoljin kogoito tiseiywek betut age tugul, ko u tisiichu ki eechen, che igoitoi korok agobo tengekwogikyik, ye ibata kogoito agobo bik: amu kiyai nito konyil agenge ak koyam, ye kiigoitogei.

28Amu indoi Ng’atutiet bik che nyalulyotin koek tisiik che eechen; ago ng’olyotab kayosiet, ne kibiitu let eng’ Ng’atutiet, kondoi Werit, ne igesunotgei koigeny.

← Chapter 6 Jump to: Chapter 8 →