2 Timothy 1

Luganda (BIBU1) (BIBULIYA ENTUKUVU)

Jump to: Chapter 2 →

1Pawulo, omutume wa Kristu Yezu olw'okwagala kwa Katonda n'okusinziira ku kisuubizo ky'obulamu obuli mu Kristu Yezu;

2ya Timotewo, mutabani omwagalwa: eneema, okusaasira n'eddembe okuva ewa Katonda Taata ne Kristu Yezu Mukama waffe.

3Neebaza Katonda, oyo gwe mpeereza n'emmeeme entereevu nga bajjajjange bwe baakola, bwe nkujjukira obutasalako mu ssaala zange emisana n'ekiro.

4Bwe nzijukira amaziga go, ne njagala okujja okukulaba nzijule essanyu.

5Nzijukira n'okukkiriza kwo okwesimbu, okwo okwasookera mu jjajjaawo Loyi ne mu nnyoko Ewunisi, ate kati kwe nkakasa nti ne mu ggwe mwekuli.

6Kyenva nkujjukiza okukoleeza obuto ekirabo kya Katonda kye wafuna ng'ossibwako emikono gyange.

7Katonda teyatuwa mwoyo gwa butiitiizi, wabula Mwoyo ow'amaanyi, okwagala n'okwefuga.

8Awo nno tokwatirwanga nsonyi kujulira Mukama oba nze omusibe we, wabula gabana ku bizibu olw'okubeera Evangili okusinziira ku maanyi ga Katonda

9eyatulokola, n'atuyita mu kuyitibwa okutukuvu, si lwa kubeera bikolwa byaffe ku bwaffe, wabula olw'okubeera entegeka ye n'eneema ye. Eneema eno yatuweebwa dda mu Kristu Yezu, ng'obudde tebunnabaawo,

10naye yayolekebwa luno ku kulabika kwa Mulokozi waffe Kristu Yezu, eyaggyawo olumbe n'alaga obutafa n'obulamu ng'ayita mu Vangili,

11gye nalonderwa ng'omulangirizi, omutume era omuyigiriza.

12Kyenva mbonyaabonyezebwa bino byonna, naye sikwatibwa nsonyi kubanga gwe nakkiriza mmumanyi, era ndi mumativu nti asobola okunkuumira bye namukwasa okutuusa ku lunaku olwo.

13Nywerera ku bigambo ebituufu bye wawulira okuva mu nze; bitwale ng'ekyokulabirako, osigale mu kukkiriza ne mu kwagala ebiri mu Kristu Yezu.

14Labirira ekintu ekyo eky'omuwendo ekyakukwasibwa mu Mwoyo Mutuukirivu asula mu ffe.

15Nga bw'omanyi, abalala bonna mu Aziya banjabulidde, omuli ne Fugelo ne Erumogeno.

16Omukama abeere wa kisa eri amaka ga Onesiforo, kubanga ambeeredde kikubagizo bulijjo era takwatirwanga njegere zange nsonyi.

17Wabula ng'atuuse e Roma yanyiikira okunnoonya okutuusa lwe yanzigukako.

18Omukama amuwe asange ekisa ky'Omukama ku lunaku olwo. Omanyi bulungi engeri gye yampeerezaamu mu Efezi.

Jump to: Chapter 2 →