2 Timothy 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Naye manya nti mu nnaku ez'oluvannyuma walibaawo ebiseera ebizibu:

2abantu baliba beefaako bokka, baagazi ba ssente, beepansi, ba lunkulu, bavuma, tebawulira bazadde baabwe, ntasiima, omutali butuukirivu,

3abataliimu kwagala, abatasonyiwa, abawaayiriza, abateefuga, abakambwe, abakyawa ekirungi,

4ab'enkwe, nga badumi, beekuza, banoonyi b'amasanyu mu kifo ky'okunoonya Katonda;

5nga beeyisa ng'abasomi, sso ng'eddiini tebakkiriza maanyi gaayo. Abo beesambire ddala.

6Abamu ku bano basensera amayumba ne bakwasa abakazikazi, abeebinise ebibi, abatwalibwa amaddu aga buli ngeri,

7bulijjo abagezaako okuyiga naye abatasobola kutuuka ku kumanya mazima.

8Nga Yanne ne Yambure bwe baawakanya Musa, na bano bwe bawakanya amazima, abantu abagwagwawadde, okulabira ku kukkiriza, abatakyabalibwa.

9Naye tebajja kutuuka wala, kubanga obusiru bwabwe bujja kweraga abantu bonna, nga bwe kyali ku bali ababiri.

10Naye ggwe ogoberedde enjigiriza yange, enneeyisa, ekigendererwa, okukkiriza, obugumiikiriza, okwagala, okuguma,

11okuyigganyizibwa, okubonaabona, nga bwe byantuukako mu Antiyokiya, Yikoniyo ne Lisitura; ebyo bye bibonoobono bye nagumira. Kyokka Omukama yamponya mu bino byonna.

12Go amazima gali nti buli alyagala okuba omusomi mu Kristu Yezu, aliyigganyizibwa.

13Naye abantu ababi n'abalimba balyeyongera bubi, nga balimba nabo nga bwe balimbibwa.

14Naye ggwe sigala kw'ekyo kye wayiga n'omatira, ng'omanyi baani be wakiyigako,

15era ng'okuva mu buto omanyi Ebiwandiiko Ebitukuvu, ebisobola okukuwa amagezi ag'okulokoka okuva mu kukkiriza Kristu Yezu.

16Ebiwandiiko byonna ebitukuvu byafuuyirirwa Katonda, era bigasa mu kuyigiriza, mu kusimba ensonga, mu kugolola, ne mu kutendeka mu butuukirivu,

17olwo omuntu wa Katonda alyoke abeere ng'ajjuuliridde, ng'atendekeddwa okukola buli mulimu mulungi.

← Chapter 2 Jump to: Chapter 4 →