2 Timothy 4

Luganda (BIBU1) (BIBULIYA ENTUKUVU)

← Chapter 3 Jump to:

1Nkukuutirira ddala mu maaso ga Katonda n'aga Kristu Yezu aliramula abalamu n'abafu ku lunaku lw'okulabika kwe n'olw'obwakabaka bwe,

2langirira ekigambo, kinyiikirire we kisanyusiza ne we kitasanyusiza, nnyonnyola, komako, gumya wabula ng'oyigiriza n'obugumiikiriza bwonna.

3Kubanga akadde kalijja abantu nga tebakyagumiikiriza njigiriza nnamu, wabula, olw'ebyo bo bye baagala, balyetuumira abayigiriza aboogera ebisanyusa amatu gaabwe,

4ne balekera awo okuwuliriza amazima, ne badda ku nfumo.

5Naye ggwe ba mukalangufu obudde bwonna, gumiikiriza ebizibu, kola ogw'okuyigiriza Evangili, tuukiriza obuweereza bwo.

6Kubanga nze ka ŋŋambe nti naweebwayo dda ng'ekitone eky'okuyiwa, n'akadde kange katuuse nsitule.

7Olutalo olulungi ndulwanye, embiro nzimalirizza, okukkiriza nkukuumye.

8N'okuva kati engule ey'obutuukirivu entegekeddwa, eyo Omukama, omulamuzi omwenkanya, gy'alimpa ku lunaku olwo, ate si nze nzekka, naye n'abo bonna abaagadde okulabika kwe.

9Yanguwa onneegatteko mangu,

10Kubanga Dema, olw'okwagala ensi eno, yanjabulira n'alaga e Tessalonika, ye Kuresike n'agenda e Galasiya, ate Tito e Dalumatiya.

11Luka yekka y'ali nange; ddira Mariko ojje naye, kubanga angasa nnyo mu kuweereza.

12Nsindise Tukiko e Efezi.

13Bw'obanga ojja, oleetanga omunagiro gwe naleka ne Karupo mu Turowa, n'emizingo, naddala egy'amaliba.

14Alekisanduro omuweesi w'ekikomo yankola akabi kanene; Omukama alimusasula ng'ebikolwa bye bwe bigwanira.

15Naawe mwegendereze, kubanga awakanya nnyo bye twogera.

16Bwe nali neewozaako ogwasooka, tewali yajja kumpolereza; buli omu yanjabulira. Kale, kino kireme kubavunaanibwa!

17Naye Omukama yali nange, n'ampa amaanyi, okulangirira Evangili kutuuke ku bujjuvu nga kuyita mu nze, ab'amawanga bonna bagiwulire. Ne mponyezebwa bwe ntyo mu kamwa k'empologoma.

18Omukama alimponya buli kabi konna n'antuusa mirembe mu bwakabaka bwe obw'omu ggulu. Oyo aweebwe ekitiibwa emirembe n'emirembe. Amiina.

19Prisika ne Akwila n'ab'omu maka ga Onesiforo bandabire.

20Erasto yasigala mu Korinti, ate Turofimo ne mmuleka mu Mileto.

21Gezaako okutuuka eno ng'obudde obw'obutiti tebunnaba. Ewubulo, Pudeni, Lino, Kulawudiya n'abooluganda bonna babatumidde.

22Omukama abeere n'omwoyo gwo! Eneema ebeere nammwe mwenna!

← Chapter 3 Jump to: