Colossians 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Kale nno, oba mwazuukizibwa ne Kristu, munoonye ebiri waggulu eyo Kristu gy'ali ng'atudde ku gwa ddyo ogwa Katonda.

2Mufe ku bya waggulu, naye si ku bya ku nsi.

3Anti mwafa, n'obulamu bwammwe bukwekeddwa ne Kristu mu Katonda.

4Kristu nno obulamu bwammwe bw'alirabika, olwo nammwe ne mulabika wamu naye mu kitiibwa.

5Mutte buli kya nsi ekibalimu: obwenzi, obuseegu, amaddu, okwegomba okubi, n'okululunkanira ebintu, leero ekiba okusinza ebitaliimu.

6Olwa bino obusungu bwa Katonda kyebunaava bujja.

7Nammwe luli bino mwe mwatambuliranga bwe mwali mukyabirimu.

8Kati ebyo byonna mubisse ebbali: obusungu, ennyiike, okuwaayiriza, okuvuma n'enjogera embi eziva mu kamwa kammwe.

9Temulimbagananga, anti ng'obw'omuntu bwe mwalina edda n'empisa zaakwo mwabyeyambula

10ne mwambala obw'omuntu obuggya, obugenda buzzibwa obuggya mu kumanya ne mu nfaanana y'Omutonzi waabwo.

11Awo tewaba ono Mugereeki, ono Muyudaaya, ono mutayirire ono si mutayirire, ono mugwira, ono si mugunjufu, ono muddu, ono mwana wa ddembe; wabula Kristu ye byonna mu byonna.

12Mmwe nno Katonda be yalonda, abatuukirivu ate abaganzi, mwambalenga omutima omusaasizi, ekisa, obwetoowaze, obuteefu, obugumiikiriza;

13mulekeraganenga, era musonyiwaganenga nga wabaddewo alina ekigambo ku munne; ng'Omukama bwe yabasonyiwa, nammwe bwe muba mukola.

14Kungulu kwa bino byonna mwambalirengako okwagala, kye kifundikwa ekisibira byonna awamu mu butuukirivu.

15Eddembe lya Kristu libeere mu mitima gyammwe; anti ekyo kye mwayitirwa ng'omubiri ogumu; mwebazenga.

16Ekigambo kya Kristu kibukale mu mmwe mu bugagga bwakyo bwonna. Buli omu ayigirize munne, abuulirire munne mu magezi gonna. Muyimbirenga Katonda mu mitima gyammwe zabbuli, amatendo n'ennyimba entukuvu nga mwebaza.

17Buli kye mukola, kibeere mu bigambo oba mu bikolwa, mukikolenga mu linnya lya Mukama Yezu, nga mwebaza Katonda Taata nga muyita mu ye.

18Abakazi, mugondere babbammwe nga bwe kigwanidde mu Mukama.

19Abasajja, mwagale bakazi bammwe, temubakambuwaliranga.

20Abaana, muwulirenga bazadde bammwe mu buli kintu, kubanga ekyo kisanyusa Omukama.

21Abazadde, temunyiizanga baana bammwe, sikulwa nga baggwaamu omutima.

22Abaddu, muwulirenga mu buli kintu bakama bammwe ab'oku nsi, si lwa kulabibwa, kyenkana ng'abanoonya okutendebwa abantu, naye mukozenga mutima gumu nga mutya Omukama.

23Kyonna kye mukola, mukikozenga kwagala ng'abakolera Omukama, abatakolera bantu buntu,

24nga mumanyi nti mulifuna obusika ng'empeera yammwe okuva ew'Omukama, anti Omukama Kristu gwe muweereza.

25Akola obubi alisasulibwa olw'ensobi ze yakola, ate tewali kusosola.

← Chapter 2 Jump to: Chapter 4 →