Colossians 4

Luganda (BIBU1) (BIBULIYA ENTUKUVU)

← Chapter 3 Jump to:

1Abakama, abaddu bammwe mubayisenga bulungi mu bwenkanya, anti mumanyi nga nammwe mu ggulu mulinayo Omukama.

2Munyiikire okwegayirira; nga mwegayirira mutunule era mwebaze.

3Naffe mutusabire Katonda atuggulirewo oluggi ku lw'ekigambo, tusobole okulangirira ekyama kya Kristu ekyansibisa mu njegere,

4nkyolese nga njogera nga bwe nteeekeddwa okwogera.

5Mweyise na magezi n'abo abagwira, nga muggya omugaso mu budde buno.

6Enjogera yammwe ebeere ya ssimbo, ennungemu omunnyo, mulyoke mumanye engeri gye musaanye okwanukula buli omu.

7Tukiko, owooluganda omwagalwa, omukozi omwesigwa, muweereza munnange mu Mukama, ajja kubategeeza byonna ebinfaako.

8Mmubasindikidde olw'ensonga eno, mumanye ebitufaako, akubagize n'emitima gyammwe,

9wamu ne Onesimo owooluganda omwagalwa era omwesigwa, omu ku mmwe. Bajja kubategeeza byonna ebifa eno.

10Aristariko, musibe munnange, abatumidde; ne Mariko muganda wa Barunaba, gwe mwaweerwako ebiragiro - bw'atuukanga eyo, mumwanirizanga;

11ne Yezu gwe baakazaako erya Yusito. Bano be bokka abava mu batayirire mu abo bwe tukola omulimu gw'obwakabaka bwa Katonda; babadde kikubagizo gye ndi.

12Epafura, omu ku mmwe, omuweereza wa Kristu Yezu, abatumidde; ono bulijjo abalwanirira mu ssaala ze muleme kugwa, wabula mutuukirire bulungi era munywere ddala ku ekyo Katonda ky'ayagala.

13Nnyinza okumujulira nti abalumirwa nnyo, n'ab'e Lawodikeya n'ab'e Yiyerapoli.

14Luka omusawo omwagalwa ne Dema babatumidde.

15Mundabire abooluganda abali e Lawodikeya, ne Nimfa n'Ekleziya eri mu maka ge.

16Ebbaluwa eno bw'emalanga okusomebwa ewammwe, mugisome ne mu Ekleziya y'ab'e Lawodikeya, ate nammwe musome eva e Lawodikeya.

17Mugambe Arikippo nti: “Wekkaanye, laba nti omulimu gwe wafuna mu Mukama ogutuukiriza.”

18Okulamusa kuno nze nkuwandiise nzennyini Pawulo mu mukono gwange. Mujjukire enjegere zange. Eneema ebeere nammwe.

← Chapter 3 Jump to: