Jonah 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Omukama n'ategeka ekyennyanja ekinene kimire Yona. Yona n'amala mu lubuto lw'ekyennyanja ennaku ssatu n'ebiro bisatu.

2Awo Yona ne yeegayirira Omukama Katonda we ng'ayima mu lubuto lw'ekyennyanja, n'agamba nti:

3“Mu nnaku zange nakoowoola Omukama, n'annyanukula. Nayima mu lubuto lw'emagombe ne mpanjaga, n'owulira eddoboozi lyange.

4Wankasuka mu ddubi, mu buziba bw'ennyanja; engezi n'enneebungulula, amayengo go n'amasingiisira go ne gambikka.

5Ne ŋŋamba nti: ‘Ngobeddwa mu maaso go, ndiddamu ntya okulaba Ekiggwa kyo ekitukuvu?’

6Amazzi ganneebungulula ne gantuukira ddala mu bulago; eddubi lyanneetooloola, endago zanneezingirira ku mutwe.

7Nakkirira ku ntobo z'ensozi, emiyingo gy'ensi ne ginzigalira emirembe gyonna. Naye obulamu bwange n'obuggya mu bunnya, ayi Mukama Katonda wange.

8Omwoyo gwange bwe gwali gunnyenjebuse, ne nkujjukira, ayi Mukama; essaala yange n'eyambuka gy'oli, mu Kiggwa kyo ekitukuvu.

9“Abo abeesiba ku bitaliimu, balekerera ekisa ekyandibagiriddwa.

10Naye nze nzija kutambira ekitambiro n'oluyimba olw'okwebaza; bye neetemye nzija kubituusa. Okulokola kuva eri Mukama.”

11Awo Omukama n'alagira ekyennyanja, ne kisesema Yona ku lukalu.

← Chapter 1 Jump to: Chapter 3 →