Jonah 4

Luganda (BIBU1) (BIBULIYA ENTUKUVU)

← Chapter 3 Jump to:

1Naye Yona n'anyiiga nnyo, n'asunguwala.

2Ne yeegayirira Omukama nti: “Ayi Mukama, ekyo si kye nagamba nga nkyali eka? Kyennava nnyanguwa okuddukira e Tarusisi. Namanya nga ggwe oli Katonda omusaasizi era ow'ekisa, atasunguwala mangu, ajjudde okwagala, ayeddamu n'atakola kabi.

3Kale nno, ayi Mukama, obulamu bwange butwale; waakiri nfe okusinga okuba omulamu.”

4Omukama n'amuddamu nti: “Olowooza ng'oli mutuufu okusunguwala?”

5Awo Yona n'afuluma n'agenda atuula ku luuyi lw'ekibuga olw'ebuvanjuba. Ne yeekolera awo akasiisira, n'atuula omwo mu kisiikirize kyakyo, n'atunula alabe ekinaatuukirira ekibuga.

6Omukama Katonda n'asibusa omusogasoga, ne guwanvuwa waggulu ku Yona gusiikirize omutwe gwe, gumuwonye muli obuteeyagala. Yona n'asanyukira nnyo omusogasoga ogwo.

7Naye enkeera mmambya ng'asala, Katonda n'ategeka envunyu, n'erya omusogasoga ne guwotoka.

8Enjuba bwe yavaayo, Katonda n'asindika empewo ey'ebuvanjuba eyokya; enjuba n'eyokya Yona omutwe, n'ayenjebuka. Ne yeesabira okufa, n'agamba nti: “Waakiri nfe okusinga okuba omulamu.”

9Katonda n'agamba Yona nti: “Olowooza oli mutuufu okusunguwalira omusogasoga?” N'ayanukula nti: “Ndi mutuufu okusunguwala n'okutuusa okufa.”

10Omukama n'agamba nti: “Ggwe olumirwa omusogasoga gw'otaateganira n'akamu yadde okukuza. Gwalokera mu kiro kimu ne gufiira mu kiro kimu.

11Naye nze sandirumiriddwa Nineve ekibuga kino ekikulu, omusula abantu abasukka mu kasiriivu mu emitwalo ebiri, abatasobola kwawula mukono gwabwe ogwa ddyo ku gwa kkono, nga kw'ogasse n'ebisolo enkumu?”

← Chapter 3 Jump to: