Philippians 1

Luganda (BIBU1) (BIBULIYA ENTUKUVU)

Jump to: Chapter 2 →

1Pawulo ne Timotewo, abaweereza ba Kristu Yezu. Ya batuukirivu bonna mu Kristu Yezu abali e Filippi, wamu n'abalabirizi n'abadyakoni.

2Eneema ebeere nammwe, ko n'emirembe okuva ewa Katonda Kitaffe n'ew'Omukama Yezu Kristu.

3Neebaza Katonda wange buli lwe mbajjukira

4bulijjo mu ssaala zange zonna nga mbasabira mwenna, ne nsaba nga nnina essanyu,

5nga neebaza olw'okukwatira awamu omulimu gw'Evangili okuva olubereberye n'okutuusa kati.

6Era neesigira ddala nti eyatandika mu mmwe omulimu omulungi, ajja kugutuusa ku kumalirizibwa ku lunaku lwa Kristu Yezu.

7Kituufu nze mwenna okubateebeza ntyo, kubanga mundi ku mutima, kubanga mwagabana ku neema gye nafuna, ku busibe bwange ne ku kutaasa n'okukakasa Evangili.

8Katonda anjulira nga bwe mbalumirwa omwoyo mwenna n'okwagala kwa Kristu Yezu.

9Kino kye nsaba, nti okwagala kwammwe kweyongerenga bulijjo, ko n'okumanya n'okutegeera,

10mulyoke mulondengawo ebisinga obulungi, era mubeere batukuvu abataliiko musango ku luli Kristu lw'alijja,

11nga mujjudde ebibala nkumu eby'obutuukirivu ebiyita mu Yezu Kristu ku lw'ekitiibwa kya Katonda n'ettendo lye.

12Nandyagadde mumanye, abooluganda, nti ebyo ebintuuseeko byongedde bwongezi Vangili kugenda mu maaso.

13Era kati wonna mu Purayitoriyo n'awalala wonna, bategedde nti ndi mu nvuba lwa Kristu.

14Ate abasinga obungi mu booluganda, nze olw'okubeera mu nvuba, beeyongedde bweyongezi kuguma, era kati bayigiriza n'obuvumu obusingawo ekigambo kya Katonda okusinga luli, nga tebaliimu kutya.

15Abamu okuyigiriza batyo Kristu bakikoza buggya na kuluubirira; naye abalala bakikoza mutima mulungi.

16Bano bakikoza kwagala, nga balaba ndi wano lwa kutaasa Vangili,

17naye bali bayigiriza Kristu lwa kuluubirira, si na mutima mulambulukufu, wabula bagenderera kunnumya mu nvuba ze nnimu.

18Ye ddala kiki? Mu buli ngeri, oba oli yeekoza bwekoza oba akolera ddala mu mazima, Kristu y'aba ayigirizibwa, ekyo kye nsanyukira.

19Ddala nzija kwongera okusanyuka, kubanga mmanyi ng'olw'essaala zammwe n'okuyambibwa Mwoyo wa Yezu Kristu kino kijja kunviiramu obulokofu.

20Kino kye nninda n'amaddu era kye nsuubira, nti sijja kuswala n'akatono, wabula nti ku mulundi guno Kristu anaagulumizibwa n'obuvumu bwonna mu mubiri gwange nga bulijjo, mu bulamu oba mu kufa.

21Anti ku nze, obulamu ye Kristu, ate okufa gaba magoba.

22Naye nno ate oba nze okusigala nga nkyali mulamu mu mubiri kiwa omulimu gwange okubaako kye gugasa, olwo simanyi kye nnondawo.

23Nkwatiddwa ku njuyi zombi; neegomba nsomoke, mbeere ne Kristu, ekyo kye kisinga obulungi.

24Naye ate okugira nga nkyali mulamu mu mubiri ku lwammwe kye kisinga okwetaagibwa.

25Mmanyi era nkakasa nga nzija kugira nga nkyaliwo nammwe mwenna, musobole okweyongera era n'okwesiimira mu kukkiriza kwammwe,

26mweyongere okwetendera mu Kristu Yezu ku lwange bwe ndikomawo gye muli omulundi omulala.

27Kyokka muyise mu ngeri esaanidde Evangili ya Kristu, oba nga nzize ne mbalaba oba nga siri eyo, mbeere nga mpulira nga bwe muli abanywevu, ab'omwoyo ogumu n'emmeeme emu, nga muteganira wamu olw'okukkiriza kw'Evangili.

28Ababalumba baleme kubatiisa n'akatono; obwo bukakafu obuva ewa Katonda nti abo bazikiridde ate nga mmwe mulokoddwa.

29Mmwe mwaweebwa nti ku lwa Kristu muleme kukkiriza kyokka, naye n'okubonaabona muboneebone olw'okubeera ye.

30Muli ku lutalo lwe lumu nange lwe mwandaba ndiko era lwe mukyampulirako.

Jump to: Chapter 2 →