Philippians 4

Luganda (BIBU1) (BIBULIYA ENTUKUVU)

← Chapter 3 Jump to:

1Kale nno, baganda bange abaagalwa, abannumya omwoyo, essanyu lyange, engule yange, munywerere mu Mukama, abaagalwa.

2Neegayirira Ewodiya, neegayirira ne Suntuke, bakkaanye mu Mukama.

3Nsaba naawe munnange omwesigwa bwe tukola omulimu, abakyala abo obayambe, kubanga twakolanga ffenna ku lw'Evangili wamu ne Kulementi ne bakozi bannaffe abalala amannya gaabwe agaawandiikibwa edda mu kitabo ky'obulamu.

4Musanyuke mu Mukama bulijjo; nziramu okubagamba: musanyuke.

5Abantu bonna balabe obuteefu bwammwe. Omukama ali kumpi.

6Temubaako kye mweraliikirira n'akatono, naye mu buli kintu bye mwetaaga mubyanjulirenga Katonda nga mwegayirira awamu n'okwebaza.

7Olwo eddembe lya Katonda erisukkiridde buli kutegeera, linaakuumanga emitima gyammwe n'emyoyo gyammwe mu Kristu Yezu.

8Ekisembayo, abooluganda, buli kya mazima, buli kya kitiibwa, buli kituufu, buli kitukuvu, buli kyegombebwa, buli kyogerwako obulungi, oba waliyo empisa ennungi, oba ekiweesa ettendo, ebyo bye muba mulowoozaako.

9Bye mwayiga ne mukwata, bye mwawulira ne bye mwalaba ku nze bye muba mukola, olwo Katonda ow'emirembe ajja kubeera nammwe.

10Nasanyuka nnyo mu Mukama okulaba nga muzzeemu buto okunnumirwa; mubadde ggwe wamma munnumirwa, naye nga mukyabuliddwa akadde.

11Obubulwa si bwe bunjogeza, kubanga nze nayiga okuba omumativu mu buli mbeera:

12okudooba nkumanyi n'okuba n'ebingi nkumanyi; natendekebwa mu buli mbeera na mu buli kintu: okuba omukkufu n'okugenda enjala, okuba n'ebingi n'okuwamma.

13Byonna nnyinza okubisobola mu oyo ampa amaanyi.

14Ggwe wamma mwakola bulungi okuba nange mu nnaku zange.

15Mmwe mwennyini ab'e Filippi, mumanyi nga bwe nali nva e Masedoniya, luli nga naakatandika okuyigiriza Evangili, mpaawo Ekleziya ndala n'emu bwe twakolagana ebeeko k'empa nange mbeeko ke nfuna, wabula mmwe mwekka.

16Ne bwe nali e Tessalonika mwanziruukirira ogwasooka n'ogwokubiri.

17Eky'okumpa si kye nnoonya; wabula nnoonya magoba ageeyongera ku bugagga bwammwe.

18Leero nnina byonna, biyitiridde n'okuyitirira; nzijudde oluvannyuma lw'okufuna okuva ku Epafurodito ebintu bye mwampeereza; byali akawoowo ak'akaloosa, ekitambiro ekisanyusa Katonda.

19Katonda wange alibajjuza na byonna bye mwetaaga ng'asinziira ku bugagga bw'ekitiibwa kye mu Kristu Yezu.

20Katonda waffe era Taata agulumizibwe emirembe n'emirembe. Amiina.

21Mundabire buli mutuukirivu mu Kristu Yezu. Abooluganda bwe tuli eno babatumidde.

22Abatuukirivu bonna babatumidde, naddala eb'ennyumba ya Kayisari.

23Eneema ya Mukama waffe Yezu Kristu ebeere n'omwoyo gwammwe.

← Chapter 3 Jump to: