Philippians 2

Luganda (BIBU1) (BIBULIYA ENTUKUVU)

← Chapter 1 Jump to: Chapter 3 →

1Obanga mu Kristu mulimu ekiyinza okubagumya, ekibasindika okwagala, okussa ekimu mu Mwoyo, okwagalana n'okulumirwagana,

2mujjuulirize essanyu lyange nga muba n'endowooza emu, n'okwagala kumu, emmeeme emu n'omutima gumu.

3Mubuleko kye mukola nga kiva mu kwelowoozaako ne mu kwepanka; wabula mu bwetoowaze, buli omu atwale abalala nti be bamusinga.

4Buli omu abeere nga tafa ku bibye yekka, wabula ne ku by'abalala.

5Mu mmwe mubeere ba ndowooza ng'eyali mu Kristu Yezu:

6Oyo newandibadde nga mu ndabika yali Katonda, eky'okuba ekyenkanyi ne Katonda teyakiremerako,

7wabula yeemaliramu ddala, n'afaanana omuddu, n'afuuka ng'abantu bwe baba.

8Ng'amaze okufaanana abantu, yeetoowaza, n'awulira okutuusa okufa, okufa nno ku musaalaba.

9Ne Katonda kyeyava amusukkulumya, n'amuwa n'erinnya erikira amannya gonna,

10awali erinnya lya Yezu byonna bifukamirenga, eby'omu ggulu, eby'omu nsi n'ebiri wansi w'ensi,

11buli lulimi lwatulenga nti Yezu Kristu Mukama, Katonda Taata afune ekitiibwa.

12Kale nno, bannange abaagalwa, nga bwe mubadde abawulize bulijjo, si nga ndi eyo kyokka, naye kaakano n'okusingawo nga siri eyo, mufaabiinire okulokoka kwammwe mu kutya n'okukankana.

13Anti Katonda y'akola mu mmwe n'abawa okwagala n'okukola olw'ekyo kye yeeteesa mu kwagala kwe.

14Byonna mubikolenga awatali kwemulugunya na kulonzalonza,

15mubuleko kye babavunaana, nga temuliiko musango, muli baana ba Katonda abalungi, abataliiko bbala wakati mu bantu be mulimu, ezzadde ekkyamu eryonoonefu, mwe mwakaayakanira ng'ettawaaza mu nsi,

16nga munyweza ekigambo ky'obulamu. Olwo ku lunaku lwa Kristu, ndiba ne kye neetenderamu nti embiro sadduka za bwereere, saakolera busa.

17Ne bwe nnaaba mpeerezeddwayo ng'ekitone eky'okuyiwa ekigattiddwa ku kitambiro kyammwe n'ebitone eby'okukkiriza kwammwe, nandisanyuse ne njaganya nammwe mwenna.

18Nammwe era mwandisanyuse ne mujaganya nange.

19Nsuubira mu Mukama Yezu okusindika amangu Timotewo ajje eyo nziremu omwoyo nga ntegedde ebibafaako.

20Anti sirina mulala wano asobola kulumirwa ddala bibakwatako ng'oyo.

21Abalala bonna beenoonyeza byabwe, si ebyo ebya Yezu Kristu.

22Naye ono mmumanyi bulungi bw'afaanana, nga bwe yaweerezanga nange Evangili ng'omwana akola ne kitaawe.

23Ono nno nsuubira okumusindika amangu gye muli bwe nnaamala okulaba ebyange wano nga bwe bigenda.

24Nange neesize Omukama nti sijja kulwa kujja gye muli.

25Ndabye nga kyetaagisa okusindika amangu gye muli Epafuradito, owooluganda, bwe tukola, mutabaazi munnange, omubaka wammwe ate omuweereza mu bwetaavu bwange.

26Abadde abalumirwa mwenna omwoyo, era mweraliikirivu kubanga mwawulira bwe yali omulwadde.

27Kituufu, yalwala era kumpi kufa; kyokka Katonda yamusaasira; si ye yekka, nange yansaasira, anti nandiyimbye ennaku ku nnaku.

28Nfubye nnyo okulaba ng'oyo mmusindika mumulabeko, muddemu okusanyuka, nange nkendeeze ku kweraliikirira.

29Mumwanirize n'essanyu lyonna mu Mukama; abafaanana ng'oyo mubassengamu ekitiibwa.

30Yabula kata afe olw'okubeera omulimu gwa Kristu. Obulamu bwe yabussa mu kabi amalirize ebyali bikyabula ku bye mwali munkolera.

← Chapter 1 Jump to: Chapter 3 →