Philippians 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Ekisembayo, baganda bange, musanyuke mu Mukama. Ebimu okuddamu okubibawandiikira, tekinkooya, ate nammwe kibayamba okuba n'emirembe.

2Mwerinde embwa, mwerinde abakozi b'obubi, mwerinde abakomola.

3Ffe batayirire aba nnamaddala, ffe abasinza Katonda mu Mwoyo, abeetendera mu Kristu Yezu, obwesige bwaffe obutatuli mu mubiri.

4Sso nze nandisobodde okwesiga omubiri. Oba waliwo alina ekimwesiza omubiri, nze nandibadde n'okwesiga okusingawo:

5anti nze natayirirwa ku lunaku olwomunaana, ndi wa mu ggwanga lya Yisirayeli, wa mu kika kya Benyamiini, ndi Mwebureeyi eyazaalibwa Abeebureeyi, mu by'amateeka nali Mufarisaayo,

6ate ng'omutakabanyi, nayigganya Ekleziya; ku bikwata ku butuukirivu obw'omu Tteeka, siriiko kinvunaanibwa.

7Naye olw'okubeera Kristu, ebyo bye nayitanga amagoba, kati ndaba nga kwali kufiirwa.

8Ddala ddala ndaba nga kwali kufiirwa olw'ekigambo eky'okumanya Kristu Yezu Mukama wange ekitenkanika. Olw'okubeera ye byonna nabifiirwa; byonna mbiyita bisasiro ndyoke neewangulire Kristu,

9mbeere mu ye, nga sirina butuukirivu bwange ku bwange obuva mu Tteeka, wabula obwo obuva mu kukkiriza Kristu, obutuukirivu obuva ewa Katonda olw'okukkiriza.

10Njagala mmumanye, mmanye n'amaanyi agali mu kuzuukira kwe, ngabane ne ku kubonaabona kwe, mmufaanane mu kufa kwe,

11nange singa kisoboka ntuuke ku kuzuukira mu bafu.

12Si kwe kugamba nti kino nkifunye, oba nti ntuukiridde. Nedda, nnyongera bwongezi kufuba nkikwate nga Kristu Yezu bwe yankwata.

13Abooluganda, sigamba nti mmaze okukikwata, wabula kimu kyokka kye nkola: ebyangwa enkoto mbyerabidde, nduubirira bino ebindi mu maaso;

14nfaabiina ntuuke ku mpeera ey'obuwanguzi, kwe kuyitibwa okwa waggulu Katonda kwe yatuyitira mu Kristu Yezu.

15Ffe ffenna ababalirwa mu bakuze ebirowoozo ogwo gwe mutima gwe tusaanye okuba nagwo. Oba waliwo kye mutalinaako mutima gutyo, Katonda ekyo ajja kukibabikkulira.

16Wabula kimu kyokka: tunywerere ku ekyo kye twafunye.

17Abooluganda, mubeere kimu mu kundabirako, era mulabire ku abo abayisa nga bwe twabawa ekyokulabirako.

18Kubanga abangi mu abo be nababuulirako emirundi emingi, era kati be mbabuulira nga nkaaba n'okukaaba, engeri gye bayisaamu ya balabe ba musaalaba gwa Kristu.

19Enkomerero yaabwe kuzikirira; katonda waabwe lwe lubuto, ettendo lyabwe liri mu bibaswaza, n'ebirowoozo byabwe biggweeredde ku bya nsi.

20Sso ffe obutaka bwaffe buli mu ggulu, tulindirira nti Omulokozi gy'anaava, Omukama Yezu Kristu,

21oyo alifuula omubiri gwaffe guno ogutalina bwe guli n'agufaananya omubiri gwe ogw'ekitiibwa nga yeeyamba obuyinza obumusobozesa byonna okubissa wansi we.

← Chapter 2 Jump to: Chapter 4 →