Ruth 3

Luganda (BIBU1) (BIBULIYA ENTUKUVU)

← Chapter 2 Jump to: Chapter 4 →

1Olumu Nawomi, nnyazaala we, n'amugamba nti: “Muwala, olowooza sandikuzuulidde we wandibadde owummulira n'oba bulungi?

2Ne Bowazi nnyini bawala b'obadde nabo mu nnimiro, si wa luganda lwaffe? Ate laba ekiro kino yennyini ajja kubeera ng'awewa sayiri mu gguuliro lye.

3Awo nno, naaba, weekube obuwoowo, oyambale engoye zo ennungi, oserengete mu gguuliro; naye tomweraga okutuusa ng'amaze okulya n'okunywa.

4Bw'anaaba agenze okwebaka, wekkaanye ekifo we yeebase; oluvannyuma ojja kugenda obikkule ebigere bye, weebake, ye anaakubuulira eky'okukola.”

5Ruusi n'addamu nti: “Kyonna ky'onooba ondagidde, nzija kukikola.”

6N'aserengeta mu gguuliro, n'akola byonna nnyazaala we bye yali amulagidde.

7Bowazi bwe yamala okulya n'okunywa, ng'acamuseemu, n'agenda yeebaka eri egguuliro gye likoma kumpi n'entuumu z'emiganda. Ruusi n'asooba mpola n'amubikkula ebigere, ne yeebaka awo.

8Mu ttumbi wakati Bowazi ekintu ne kimusisimula, n'asituka, n'alaba omukazi nga yeebase eri ku bigere bye.

9N'amubuuza nti: “Ggwe ani?” Ko ye nti: “Nze Ruusi omuzaana wo. Bikka omuzaana wo n'omunagiro gwo kubanga ggwe oteekwa okunnunula.”

10Ko Bowazi nti: “Muwala, Omukama akuwe omukisa; ekisa n'obwesigwa bwo kati bisinze n'ebyasooka, kubanga tozze mu kunoonya bavubuka, abaavu oba abagagga.

11Leka nno kutya, muwala; kyonna ky'onoogamba nzija kukikukolera; anti abantu bonna ab'omu kibuga kyange bakumanyi bw'oli omukazi ow'ekitiibwa.

12Sigaanyi, nze nteekeddwa okukununula, naye waliyo ow'oluganda obuvunaanyizibwa obw'okukununula gwe bugwako ennyo okusinga nze.

13Sigala ekiro kino; nga bukedde, bw'anaayagala okukununula, kale anaakununula; bw'anaaba tayagadde, Mazima Omukama nga mulamu, tewali kubuusabuusa, nze nnaakununula. Weebake okutuusa enkya.”

14Ruusi ne yeebaka awo ku bigere bye okutuusa enkeera; naye yazuukuka bukyali ng'abantu tebannasobola kwawula ono ku oli. Bowazi n'agamba nti: “Wekkaanye! Tewabaawo amanya nti omukazi yazzeeko wano mu gguuliro.”

15N'agamba era nti: “Ndeetera omunagiro gwe weebikkiridde, ogwanjuluze.” Bwe yagwanjuluza, Bowazi n'ayiwamu ebipimo mukaaga ebya sayiri, n'abimutikka. N'addayo mu kibuga.

16Ruusi bwe yatuuka eri nnyazaala we, Nawomi n'amubuuza nti: “Muwala, bikugendedde bitya?” Ruusi n'amunyumiza byonna oli bye yali amukoledde,

17n'ayongerako nti: “Yampadde n'ebipimo mukaaga ebya sayiri ng'agamba nti: ‘Saagala odde wa nnyazaala wo ngalo nsa.’ ”

18Nawomi n'agamba nti: “Muwala, lindako okutuusa ng'otegedde gye bikkidde, kubanga mmanyi omuntu oyo tajja kuweera okutuusa ng'ebintu abigonjodde olwa leero.”

← Chapter 2 Jump to: Chapter 4 →