Ruth 4

Luganda (BIBU1) (BIBULIYA ENTUKUVU)

← Chapter 3 Jump to:

1Awo Bowazi n'ayambuka ku mulyango gw'ekibuga, n'atuula awo. Aba akyali awo ow'oluganda omu eyalina obuvunaanyizibwa obw'okununula n'atuuka, n'amugamba nti: “Kyamako otuule wano;” n'akyama, n'atuula.

2Bowazi n'aleeta kkumi ku bakadde b'omu kibuga n'abagamba nti: “Mutuule wano;” nabo ne batuula.

3Awo n'agamba eyalina obuvunaanyizibwa obw'okununula nti: “Nawomi eyakomawo okuva mu nsi y'e Mowabu, atunda ekitundu ky'ettaka lya muganda waffe Elimeleki.

4Njagadde nkikugambe, okiwulire, nkuwe n'ekirowoozo oligule mu maaso ga bonna abatudde wano, n'ag'abakadde, abakulu mu bantu bange. Bw'oba obuvunaanyizibwa onoobutwala n'olinunula, kikole; bw'obanga toolinunule, mbuulira mmanye. Anti tewali wa luganda mulala alina kukola ekyo okuggyako ggwe, ate nze nkuddirira.” Ye n'ayanukula nti: “Nzija kulinunula.”

5Bowazi kwe kumugamba nti: “Lw'ogula ettaka n'oliggya ku Nawomi ne Ruusi Omumowabu, ne nnamwandu w'omufu oteekwa okumutwalirako, osigazeewo erinnya ly'omufu n'obusika bwe.”

6Eyalina obuvunaanyizibwa obw'okununula n'agamba nti: “Sijja kulinunula, kubanga bwe nkikola, nzija kugootaanya eby'obusika by'omu nnyumba yange. Ggwe linunule, nze sijja kusobola.”

7Kati nno edda mu Yisirayeli waalingayo empisa nti mu kununula ne mu kuwaanyisaganya ebintu, oli okukakasa nti ekikye akiviiriddemu ddala, yanaanulanga engatto ye n'agiwa munne; mu Yisirayeli bwe baajuliranga batyo.

8Eyalina obuvunaanyizibwa obw'okununula bw'atyo naye yagamba Bowazi nti: “Lyegulire;” n'anaanula engatto ye mu kigere.

9Bowazi n'alangirira eri abakadde n'abantu bonna nti: “Olwa leero mmwe mubaddewo ng'abajulirwa, byonna ebibadde ebya Elimeleki ne Kiliyoni ne Makuloni kati mbiguze ku Nawomi,

10ne Ruusi Omumowabu, mukazi wa Makuloni, naye mmututte abeere mukazi wange, nsigazeewo erinnya ly'omufu n'obusika bwe busigalewo, erinnya lye lireme kuggweekerera mu baganda be ne mu kibuga kye. Kale nno mmwe bajulirwa b'ekigambo kino.”

11Abantu bonna abaali ku mulyango n'abakadde ne baanukula nti: “Tuli bajulirwa. Omukazi ono agenda okuyingira mu nnyumba yo, Omukama amukolere nga bwe yakolera Rakeli ne Leya, bombi abaazimba ennyumba ya Yisirayeli. “ ‘Beera muzira mu Efurata, era erinnya lyo limanyike mu Beteleemu.’

12“Mu mwana Omukama gw'aliba akuwadde mu muwala ono, ennyumba yo ebeere ng'ennyumba ya Perezi, Tamari gwe yazaalira Yuda.”

13Bw'atyo Bowazi n'atwala Ruusi, n'afuuka mukazi we. Bowazi yajja gy'ali, Omukama n'amuwa n'aba olubuto, n'azaala omwana wa bulenzi.

14Abakazi ne bagamba Nawomi nti: “Omukama agulumizibwe, olwa leero ataakulese kubulwa wa kukununula; erinnya lye litenderezebwe wonna mu Yisirayeli.

15Omwana alizza buto obulamu bwo, alikulabirira ne mu bukadde bwo, kubanga mukaamwana wo oyo akwagala, akusingira n'abaana ab'obulenzi omusanvu, y'amuzadde.”

16Nawomi n'addira omwana n'amussa ku mubiri gwe, n'aba mukuza we.

17Abakazi ab'oku muliraano ne bamuwa erinnya, ne bagamba nti: “Nawomi afunye omwana ow'obulenzi.” N'atuumibwa Obedi; ye oyo kitaawe wa Yesse azaala Dawudi.

18Lino lye zzadde lya Perezi: Perezi yazaala Kezuroni;

19Kezuroni n'azaala Ramu; Ramu n'azaala Amminadabu;

20Amminadabu n'azaala Nakusoni; Nakusoni n'azaala Salumoni;

21Salumoni n'azaala Bowazi: Bowazi n'azaala Obedi;

22Obedi n'azaala Yesse, ate Yesse n'azaala Dawudi.

← Chapter 3 Jump to: