Jonah 2

Luganda (LBR) (EKITABO EKITUKUVU, BAIBULI)

← Chapter 1 Jump to: Chapter 3 →

1Awo Yona n'asaba Mukama Katonda we ng'ali mu lubuto olw'ekyennyanja.

2N'agamba nti, “Mu nnaku yange ennyingi nakaabirira Mukama N'anziramu; Nasinziira emagombe ne nkukoowoola, N'owulira eddoboozi lyange.

3Kubanga wansuula mu buziba, wakati mu nnyanja, Amazzi ne ganneetooloola, Amayengo go ag'amaanyi ne gampita kungulu.

4Ne ndyoka njogera nti, ‘Ngobeddwa mu maaso go. Ddala ndiddamu nate okulaba Yeekaalu yo entukuvu?’

5Amazzi gansaanikira ne gaagala okunsaanyaawo, Obuziba bw'ennyanja bwanneetooloola, Omuddo ogw'omu nnyanja nga gunneezingiridde ku mutwe gwange.

6Nnakka wansi ensozi we zisibuka, Mu nsi, enzigi zaayo gye ziba ensibe ennaku zonna. Naye ggwe, ayi Mukama, Katonda wange, onziggye mu bunnya nga ndi mulamu.

7Bwe n'awulira ng'obulamu bunzigwamu ne njijukira Mukama, N'okusaba kwange ne kutuuka gy'oli, mu Yeekaalu yo entukuvu.

8Abo abassa omwoyo ku by'obulimba ebitaliimu beefiiriza kusaasirwa kwa Katonda okubalindiridde!

9Naye nze nnaakuwa ssaddaaka yange nga bwe nkutendereza. Naasasula obweyamo bwange. Kubanga obulokozi buva eri Mukama.”

10Awo Mukama n'alagira ekyennyanja ne kisesema Yona ku lukalu.

← Chapter 1 Jump to: Chapter 3 →