1 John 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Anzi nyiti nyiri mani, ma e’yo ’diyi si emi dri emi kazu e’yo onzi ’yezu ku beni; te ’ba azini ka e’yo onzi ’ye ra, ama ovu ’Ba ’ba aza Kopi e’yo nzezasiri be indi Ata vu, eri Yesu Kristo ’ba kililiruri’i;

2eri ovu edeta e’yo onzi amani ma adi cozuriru, e’yo onzi amanisi a’dule ku te e’yo onzi wudrikuru drianisi.

3Ama ka azita erini ma ta mba ra, e’yo ’disi ama ni kini ama ni eri ra.

4’Ba ’yopi kini Ma ni eri ra, te azita erini ma ta mbapi kuri, eri ’ba inzo lipiri, e’yo adaruri eri ma alia yo;

5te ’ba azini ka erini ta mba ra, leta Munguni zo eri alia tre ’bo ada. E’yo ’disi ama ni ra ama ovu eri alia

6’ba ’yopi kini i ovu eri aliari ma aci trotro erini ndra acilerile.

7’Ba mani lele ’diyi la, ma sini azita o’diru emi dri ku, te azita oku emini ovuzu eri be okokeleri’i; azita oku nderi eri e’yo emini erile rari’i.

8Ma si vini azita o’diru emi dri, e’yo nderi ovu adaru eri ma alia azini emi ma alia indi, a’disiku angu bizani aga aga, diza adaruri e’do dizu curu’do ’bo.

9’Ba ’yopi kini i ovu diza ma alia, te i adrini ngupi onziri, eri ovu angu biza ma alia kpere curu’do.

10’Ba i adrini lepiri ovo diza ma alia ’dani, alenia afa kumule fepi ’bani abazuni yo.

11Te ’ba i adrini ngupi onziri eri ovu angu biza ma alia, eri we aci angu biza ma alia indi, nini pari ini muzuri ku, angu bizani mileni bile cirisi,

12Ma si emi dri, anzi nyiri nyiri, e’yo onzi eminini ovule wuzaru eri ma rusirisi,

13Ma si emi dri, anzi atapi, emini ’ba ovupi okokeleri nilerisi, Ma si emi dri, karile, emini ’ba onzi agale ’borisi. Ma si emi dri ra, anzi, emini Atani nile ’borisi.

14Ma si emi dri ra, anzi atapi, emini ’ba ovupi okokeleri nile ’borisi. Ma si emi dri ra, karile, emini ovule okporu, e’yo Mungunini ovuzu emi alia ’dani, azini emini ’ba onziri agale ’borisi.

15Emi ma le nyaku pi afa ovupi nyaku ma alia ’diyi be ku. Te ’ba azini lea nyaku le ra, leta Atani eri alia yo.

16A’disiku afa dria nyaku ma alia ’diyi, li ruani pi, li mileni pie, afu ’bani yi ipizu idri ’dorisiri pie, yi ovuni afa Atani ku, te afa nyakuni.

17Te nyakuni aga aga, li erini be; te ’ba e’yo Munguni leleri ’yepiri ovu ’dani ’dani.

18Anzi, ’diri eri etu asizuri’i; ekile emini erile kini ari’bo Kristoni emu emurile, curu’do ari’ba Kristoni efu karakarau ’bo; e’yo ’disi ama ni, ra eri ovu etu asizuri’i.

19Yi fu ama eseliarisi ra, te yi ndra ’ba amani yo; yi ka te ndra ovu ’ba amani, yi te’do ovu ama be ’dani; te yini fuzu ’diniri ece ani kini yi dria ’ba amani yo.

20Te emi ovu odu osuza ’Ba Alarararurini feleri be, te emi ni e’yo dria.

21Ma sini emi dri emini e’yo adaruri nile kurisi, ’dini ku, te emini eri nile rarisi, azini kini e’yo inzoru aluni ovuni e’yo adaruri ma alia ku.

22’Ba inzo lipiri a’di’i ya, kani ’ba gapi kini Yesu ovuni Kristo’i kuri’i ku ya? ’Ba ’diri eri ari’bo Kristoni, Ata pi gapi Mvi be siri’i.

23’Ba dria alu alu Mvini gapi siri ovuni Ata be ku. ’Ba Mvini e’dapiri ovu Ata be indi.

24Te emi’iruni, e’yo emini erile okokeleri ma ovu emi alia ’dani. Te e’yo emini erile okokeleri ka ovu emi alia ’dani, emi indi nga ovu Mvi pi ma alia Ata be ’dani.

25E’yo ’diri eri e’yo aziza erini azile ama riari, eri idri ’dani ’daniri’i.

26Ma si e’yo ’diyi emi dri ra, ’ba emi icipi ’diyi ma e’yosi;

27te emi’iruni, odu osuza emini a’ile eri vuri eri ovu emi alia ’dani, emi leni ’ba azinini emi imbazu ku; te ekile odu osuza erinirini emi imbale e’yo driasirile, erini ovule adaru azini inzo kokorurisi, ’dini ekile erini emi imbalerile, emi ma ovu eri ma alia ’dani.

28Te curu’do, anzi nyiri nyiri, emi ma ovu eri alia ’dani, ’dini eri ka nga i e’da ra, ama ma ovu asi uri kokoruri be ani, drinza ma bi ama milenia erini emuria ku beni.

29Emi ka ni ra eri kililiru, emi ni alu indi ’ba dria e’yo kililiru ’yepi ’diyi ovu tizaru erisi.

← Chapter 1 Jump to: Chapter 3 →