1 John 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Emi ndre leta ambo Atani fele ama dri ’doni ’dori, amani ovuzu ani omvezaru anzi Munguniru; te ama ovu ’dini. E’yo ’disi nyaku nini ama ku, erini eri nile kurisi.

2’Ba mani lele ’diyi, curu’do ama ovu anzi Munguni, te e’yo amani ngazu ovuzu ngonile yari eceni nga i ku. Ama ni ra eri ka i e’da ra, ama nga ovu erile ra, amani ngale eri ndrele erini ovulerilerisi.

3’Ba dria ovupi asi teza ’diri be Yesu ma aliari nga i ’ba alatararu erini ovule alatararurile.

4’Ba dria alu alu e’yo onzi ’yepiri eri azita eza aka; azita ezazu akari eri e’yo onzini.

5Emi ni eri ece ndra i e’yo onzi wuzu, te eri ma alia e’yo onzi yo.

6’Ea dria alu alu a ovupi eri ma alia ’daniri ’yeni e’yo onzi ku; ’ba e’yo onzi ’yepiri neni eri ku, nini vini eri ku indi.

7Anzi, nyiri nyiri, ’ba aluni ma ici emi ku. ’Ba e’yo kililiruri ’yepiri eri ’ba kililini, erini ovule ’ba kililirurile.

8’Ba e’yo onzi ’yepiri ibi enga ’ba E asu supiri vu; a’disiku ’ba asu supiri ’ba ndra e’yo onzi ’ye okokeleni. Mvi Munguni e’da ndra i e’yo ’disi, eri ma ja ’yeta ’ba asu supirini ma dri ra.

9’Ba dria alu alu Munguni tileniri ’yeni e’yo onzi ku; Mungu ma orini ovule eri ma alia ’danirisi, econi erini e’yo onzi ’yezaru ku, Munguni eri tilenirisi.

10Anzi Munguni piyi e’da yi e’yo ’disi anzi ’ba asu supirini be: ’ba dria alu alu e’yo kililiru ’yepi kuri ovuni ’ba Munguni ku, ’ba i adrini lepi kuri vini ’dinile indi.

11E’yo ’diri eri e’yo oluza emini erile okokeleri, kini ama ma le ama ama eselia;

12ama ma ovu Kainile ku, eri ’ba ’ba onzirini, fu i adrini kai. Fu eri a’disi ya? ’Yeta erini ’yele ’diyini ovule onzirisi, re ’yeta adrini ’diyini ovule kililirurisi.

13Emi ma osu ku, adripi, nyaku ka emi ngu onzi.

14Ama ni ra ama efu dra ma aliarisi fizu idri ma alia ’bo, amani ama adripiyi lele avasirisi. ’Ba lepi kuri ovu dra ma alia ’dani.

15’Ba dria alu alu i adrini ngupi onziri eri ’ba ’ba fupiri, azini emi ni ra ’ba ’ba fupiri aluni ovuni idri ’dani ’dani be i ma alia ku.

16Ama ni leta avasiri e’yo ’disi, erini idri ini kule va amasirisi; le ani ama ma ku idri amani va ama adripisi.

17Te ’ba azini ka ovu afa nyakuni be, ka i adri alieni ndeleri ndre ra, te ka yiki i asiari ombe erisi ci, leta Munguni ovu di eri ma alia ngoni ngoni ya?

18Anzi nyiri nyiri, ama ma le ama e’yo ’yozasi ku, kani tisi ku, te ’yetasi azini e’yo adarurisi.

19E’yo ’disi ama nga ni ama ’ba e’yo adaruni ’diyi’i, te ama nga ama asi omvi eri milia ani,

20ama asi ka nga e’yo li ama ndezu cenirisi; a’disiku Mungu aga ama asi ra, eri ni e’yo dria.

21’Ba mani lele ’diyi, ama asi ka e’yo li ama ndezu ku, ama ovu asi uri kokoruri be Mungu vu;

22te afa ngoni ngori amani zileri ama isu eri vu, amani azita erini ’diyi ma ta mbale azini e’yo ovupi onyiru eri milia ’diyi ’yelerisi.

23Azita eriniri ’di’i, ama ma a’i Mvi erini Yesu Kristo ma ru azini ama ma le ama ama eselia, erini azile ama tia rile.

24’Ba azita erini ’diyi ma ta mbapiri ovu eri ma alia ’dani, azini eri ovu eri ma alia indi. ’Dini ama ni eri ovu ama alia ’daniri, Orindi erini fele ama driri ma e’yosi.

← Chapter 2 Jump to: Chapter 4 →