1 Thessalonians 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Paulo pi, Silivano pie, Timoteo pie, Kanisa ’ba Tesalonikia ’diyini, ovupi Mungu Ata pi ma alia Opi Yesu Kristo beri vu: ’Yeta anzutiri ma ovu emi vu asi anzuru be.

2Ama awa’difo fe Mungu dri etuzu ’dani emi e’yosi dria, emi egazu Mungu ziza amani ma alia;

3ama kuni azi emini ’yele a’itasiri pi ma e’yo egazu Mungu Ata amani ma milia, azi okporu emini ’yele letasiri pie, asi teza emini Opi Yesu Kristo tezuri pie ku.

4Adripi Munguni lele ’diyi, ama ni opeza eminiri ra;

5te e’yo baru amaniri ecani ndra emi vu e’yo ’yozasi a’dule ku, te okpo be, Orindi Alatararu ma alia, azini e’yo a’iza adaru asiari be tu; ekile emini e’yo amani ovuzu ndra emi eselia emi e’yosi ngoni yari nilerile.

6Te emi eca ndra ’ba ripi e’yo amani o’bipi e’yo driasi Opiniri be ’diyiru, emini ndra e’yo nde a’iria inzata amboru ma alia, te ayiko Orindi Alatararunisi;

7dini emi ofu ndra ecetaru ’ba e’yo a’ipi Makedoniaa ’diyi azini Akayaa ’diyi dri dria.

8A’disiku engazu emi vu e’yo Opini ku wakaka ’bo, Makedoniaa azini Akayaa a’dule ku, te e’yo emini ovuzu a’itasi Mungu vuri ere pari dri dria, ’dini e’yo azini ama dri ’yozaru anini yo.

9Te ’ba nde ’diyi yi e’yo amani efizu ndra emi eseliari oluni, azini e’yo emini ojazu Mungu vu, wura inzile inzi ’diyi kuzu, emini azi ngazu Mungu idriru adaruri dri,

10emini Mvi erini, erini engale ’ba draza ma eselia, Yesu ama opapi aoko ngapi ecapiri ma aliari ma emviza ’buarisirile tezuri’i.

Jump to: Chapter 2 →