1 Thessalonians 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1Te adripi, emi ma ngulupi ni ama fini ndra emi eselia oye ku;

2te yini tro ndra ama ecandizu oko, azini ama ’yezu onzi Filipia rari ti, ekile emini nilerile, ama ovu uri kokoru Mungu amani ma alia e’yo baru Munguniri oluzu emi tia agata gaza okporu ma eselesi.

3Ama oluni asi omiza amani inzo ma e’yosi ku, kani e’yo alatara kokorurisi, kani lokirisi, ’dini ku;

4te ekile Munguni ama o’bile lale onyiru erini ani e’yo bari kuzu ama dri oluzu ’borile, ’dinile ama olu ra, ayiko fezu ’ba dri ku, te Mungu asi amani o’bipiri dri,

5Te engazu drio ama ’yoni e’yo inzita lokiriruri be ku, ekile emini nilerile, kani ’baza afasiri ma ri a’buzu inzosi, ’dini ku, Munguni e’yo ’diri ma eti nipiri;

6ama ndani inzita ’ba vu, kani emi vu, kani ’ba azini vu aluni ku, ama ka tro eco ovuzu nzizaru emi dri ekile ’ba Kristoni ti opele ’diyile ti.

7Te ama ovu e’yere emi eselia, ekile endriani anzi ma ta mbalerile.

8’Dini, ava eminiri ama vale turisi, ama ega ndra eri onyiru kiri e’yo baru Munguniri fezu emi dri a’dule ku, te asi amani fezu indi, emini ovule ’ba ama asini lele tu ’diyi’irisi.

9Te emi ega, adripi, azi okporu azini maturu amani ngale ndrari; ama adri ndra azi nga inisi etusi, ama ma ovu nzizaru ’ba aluni emi eseliari dri ku beni, amani ndra riria e’yo baru Munguniri oluria emi tiaria.

10Emi ovu ’ba e’yo amani ma eti nzepi ’diyi, azini Mungu’i indi, kini ama ri ndra ovu emi ’ba e’yo a’ipi, diyi ma eselia asi alarusi e’yo kililiruri be, asu suza ama ruaani ndra yo;

11te emini nilerile, ama ri ’ye emi vusi emi vusi dria alu alu, ekile atani ’yele anzi ini vurile, emi asi omizu azini omvizu, e’yo eti nzezu emi dri,

12emi ma ad ani onyiru ekile Mungu emi omvepi fizu suru ini pi ma alia diza ini berini lelerile.

13E’yo ’disi ama kuni awa’difo i’yozu Mungu dri ku, a’disiku emini e’yo Munguni ’diri eriria ama vu, emi a’ini eri ekile e’yo ’banirile ku, te ekile erini ovule adadarurile, ekile e’yo Munguni, azi ngapi emi ’ba a’ipi ’diyi ma aliarile.

14’Dini, adripi, emi ofu ndra ovuzu ’ba kanisa Munguni ovupi Yudiaa Kristo ma,alia ’diyi ma pamvu o’bipi ’diyiru; a’disiku emi ma ngulupi isu ndra candi emi ori’ba dri trotro ekile yini i isule ’ba Yahudini dririle.

15’Ba Yahudini ’diyi ofu ndra Opi Yesu pi nabi pie, inza ndra ama ama drozu ra, te yi feni ayiko Mungu dri ku, yi ’ba i dria be ari’baro,

16ama ogazu e’yo oluko ’ba Jururu ’diyi dri si yini yi pazu ani-’dini yi fe e’yo onzi yinini ezuzu tre etuzu ’dani, Te aoko eca yi ma dria kpere etu asizaniria ’bo!

17Te ama’i, adripi, ovupi esele cozaru emi be ewu weresi, milesi te asi ma alia ku ’diyi, ama ’ba asi tu lezu emi mile ndrezu ava amborusi;

18a’disiku ama le te ndra ’ye mu elini vuma’i Paulo pale alu azini pale iri-te Satani oga ndra ama si.

19Te asi teza amani, kani ayiko amani, kani ekilaza amani afu ’bazu Opi amani Yesu ma milia, ewu erini emvizuri ngarerisiri a’di’i ya? Eri emi’i ku ya?

20Te emi diza amani azini ayiko amaniri emi’i.

← Chapter 1 Jump to: Chapter 3 →