Esther 2

Lugbara (E’yo Siza Alatararu Munguniri BIBLIA)

← Chapter 1 Jump to: Chapter 3 →

1E’yo ’diyi ma vutia, adra ovupi opi Ahasueru ma asiari ka i de were ’bo, eri ega e’yo Vasitini, e’yo erini ’yeleri pi e’yo lile eri ma ruaari be.

2Ati’ba opini azi ngapi eri dri ’diyi nga di ’yo ra, ’Ba ma ndru ezoanzi aliriaru yi ecipi agupi be ku, ndrizaru ’diyi, opi dri.

3Te opi ma o’ba ’ba amboru angu opi nyaza erini ma alia ’diyia dria, yi ma oku lezoanzi aliriaru yi ecipi agupi be ku, ndrizaru ’diyi, ma eji yi Susani aku opiniria yi o’bazu okujoa Hegai ovupi ati’bo opini oku ma agei tepiri ma dria; azini ’ba ma fe yi dri afa onyiafaru yini yi ’bazu alaru ani’diyi.

4Te zamva ngapi ayiko fepi opi driri ma ovu opi okuru Vasiti ma paria. E’yo ’diri ovu opi ma milia onyiru, eri ’ye ’dini indi.

5Isu ndra Yahudiou alu ovu Susani aku opiniria ’dale, runi Moridekai, Simei Kisi mvi ma mva Yairi ma mvi, suruti Benyaminini,

6’bani ndra jile ati’boru engazu Yerusalemuari, ji ndra eri tualu ’ba azini obile ati’baru jile Yekonia opi Yudaari be, Nebukadineza opi Babuloniarini ndra obi le jile ’diyi.

7Moridekai nde ezo adroi ma zi Hadasa ’bani omvele Esiteri’iri, a’disiku erini ovule ata kokoru azini ayia kokorurisi; zamva nde ’ diri ma mile onyiru azini ndrizaru tu; te ati erini azini andri erini yi ka ndra dra ’bo, Moridekai ’du eri i ma ziru.

8Te eri eca ’dini, ’ba ka azita opini azileri eku ’bo, ka ezoanzi oku kakau aku Susania Hegai ma dria ’bo, yi eji Esiterini indi jo opiniria, fe eri Hegai oku agei tepiri ma dria.

9Zamva nde fe ayiko eri dri tu, nga ani asi ndriza isu eri milia; e’yo ’disi eri ’ye mbele onyiafa erini, erini ngazu i edezu alaru ’diyi pi fezu eri dri, nyaka esele erini ’diyi pie, ezoanzi aziri opezaru engazu opi ma joa, dri fupi fezu eri dri ’diyi pie, nga eri ’ba drile ezoanzi erini ’diyi be yi ofizu pari onyiru agapi ra jo okuniriari ma alia.

10Te Esiteri eri eceni ori’ba ini pi suru ini be ku, a’disiku Moridekai azi ndra eri tia kini eri ma ece ku.

11Te Moridekai eri aci o’du vusi o’du vusi jo okuyini ma drilia, e’yo Esiterini ovuzu ngoni yari nizu, azini vini nizu e’yo ngonini nga yi ’ye eri vu.

12Te o’du ezoanzi alu aluni ngazu fizu opi Ahasueru vuri ka eca ra, ’bani yi edezu mba mudri drini iri azita okuni vusi ’boria (te yi adri ewu yini yi ’bazu alaruri ma ta mba ’dinile dezu dria, mba azia yi nga yi rua tri odu ebesenirisi, dika mba azia azini afa aji be arikariru ’diyi pisi afa okuni yi ’bazu alaru ’diyi be),

13zamva ka nga fi opi vu ’dinile, yi adri fe eri dri onyiafa dria erini lele muzu yi be engazu okujoa fizu jo opiniria ’diyi ra,

14Eri mu ondresi, dika eri emvi o’bitisi ovuzu okujo liriria, Saasigazi ati’bo opini oku ma ta mbapiri ma dria; fini dika opi vu ku, opi ka ayiko isu eri vu ku, ka eri omve rusi ku indi.

15Isu o’du Esiteri Moridekai ma adroi Abihaili ma zi, Moridekaini ’dule i ma zirurini tizu opi vuri ka eca ra, eri leni onyiafa azini a’i ku muzu yi be, pe afa Hegai ati’bo opini oku agei tepirini opele ’diyi a’dule. Te onyi Esiterini si ’ba dria eri nepi ’diyi ma mile si si.

16’Dini yi ji di Esiterini opi Ahasueru vu jo erini opiniria mba mudrisi, ’di mba Tebeti’i, eli aziri erini opi nyazurisi.

17Te opi le Esiterini aga oku azini ’diyi dria ra, azini eri isu asi ndriza yiki be eri ma milia aga ezoanzi azini ’diyi dria ra, ’dini eri su ekilaza opiniri Esiteri ma dria, eri ’ba eri opi okuru Vasiti ma paria.

18Opi nga di omu amboru ’ba ’ba amboru erini ’diyi pi dri dria, ati’ba erini be, ’di’i omu Esiterini. Dika eri fe ’ba ma li ava angu awaza erini nyale ’diyi ma alia, azini eri fe afa feza ’ba dri, ekile lonyi opinirile. Moridekaini e’yo otule opi ma ruaari ecezuri

19Te ezoanzi yini yi okuria tualu pale iririsi, etu ’dasi Moridekai eri ri opi ma kalitilia.

20De isu Esiteri eceni nga suru erini kani ori’ba erini ku, ekile Moridekaini eri ma bile imbalerile; a’disiku Esiteri eri ’ye azita Moridekaini ekile ndra erini ’yele erini zoria eri ma palaarile.

21O’du ’dayisi, Moridekaini riria opi ma kalitilia, ati’ba opini iri jotile agei tepi ’diyi, Bigitana pi Teresi be, yi ovu aokosi tu, yi ndru geri dri yini ’bazu opi Ahasueru ma ruaa.

22Isu Moridekai eri e’yo ’diri ra, eri olu Esiteri oku opiniri ma tia, Esiteri indi eri olu e’yo nderi opi ma tia Moridekai ma rusi.

23’Ba ka e’yo ’diri ndru ’bo, ka isu eri e’yo adaru, yi nga ’ba iri ’diyi o’i pati sia uru. ’Ba nga vini e’yo ’diri si buku suru ma e’yo sizuri ma alia opi ma drilia.

← Chapter 1 Jump to: Chapter 3 →