Esther 6

Lugbara (E’yo Siza Alatararu Munguniri BIBLIA)

← Chapter 5 Jump to: Chapter 7 →

1Ini ’dasi o’du ga opini si, eri azi yi ma eji i dri buku ’bani e’yo suruni sizu aleniari, la yi opi ma drilia.

2’Ba isu eri ovu sizaru ’dini, kini Moridekai olu ndra e’yo ati’ba Bigitana pini Teresi beri, yi’i ati’ba iri opi ma jotile agei tepi, geri ndrupi ndra opi Ahasueruni fuzu yi ma drisi ’diyi.

3Opi zi kini, Moridekai eri isu ru iduza ngoni kani inzita ngoni, e’yo ’dirisi ya? Ati’ba opini ayua ayupi eri dri ’diyi nga di ’yo ra kini, Eri isuni afa aluni ku.

4Te opi zi kini, ’Ba iriiari a’di’i ya? ’ De isu Hamani eri fi irii amveleru opi vile jo ageiaria, ’yozu opi tia yi ma ’i Moridekaini pati teka erini edele ’dari ma sia.

5Ati’ba opini ’diyi yi ’yo eri ma tia kini, Mi ne, Hamani so pa iriia, Opi kini, Ma efi.

6’Dini Hamani efi ra, opi ’yo eri cia, ’Ba opini lele runi iduleri, ’ba yi nga eri dri a’du ’ye ya? Te Hamani eri osu i ma asia kini, ’Ba eri ma e’yoni opini vale tu ru iduza fezu eri dri ma agapi rari a’di’i ya?

7Te Hamani omvi e’yo opi tia kini, ’Ba opini lele runi iduleri dri,

8ma eji bongo suza opini adrile sule ’diyi, azini akanya opini adrizu tuzu driniari, azini ’ba ma ’ba ekilaza opiniri eri ma dria indi;

9azini bongo ’diyi pi i ma fe ’ba ambo alu inzita be tu opiniri dri akanya ’diri be; eri ma osu ani ’ba opini lele runi iduleri ma ruaa, vutinia ma eji eri akanya dria geri amboru aku ambo eselesiria, ’ba ma oyu e’yoni eri ma drilia kini, ’Ba nga ’ye ’ba opini lele runi iduleri dri ’dini.

10Opi nga di ’yo Hamani ma tia kini, Mi ’ye mbele, mi ’du bongo ’diri pi akanya be ekile mini ’yolerile, mi ma ’ye ’dinile Moridekai ’bo Yahudini ripi kalitile opiniriari dri. Mi ma ece e’yo aluni mini ’yole ’diyi ma eselia ’yekokoru ku.

11Hamani nga di bongo nde pi ’du akanya be ra, eri su Moridekai ma ruaa, nga di eri eji akanya dria geri amboru aku ambo eselesiria, nga e’yo oyu eri ma drilia ’yozu kini, ’Ba nga ’ye ’ba opini lele runi iduleri dri ’dini.

12Te Moridekai nga emvi kalitile opiniria dika. Te Hamani nga nzu i vile joa candisi, a’bu i dri ci.

13Hamani nga di e’yo dria yi ’yepi i vu ’diyi olu oku ini pi ma tia agyi ini be. Agyi erini onduaru ’diyi pi nga di e’yo ’yo eri tia oku erini Zeresi be kini, Moridekai mini e’dozu e’dezu eri ma driliari ka ovu ori’ba Yahudini, mi ngani eri aga ku, te adaru mi nga e’de eri ma drilia ra.

14De yini e’yo ’di ’yoria ’dini eri be, isu ati’ba opi vile joa ’diyi eca Hamanini jizu mbele omu Esiterini edeleria.

← Chapter 5 Jump to: Chapter 7 →