Esther 8

Lugbara (E’yo Siza Alatararu Munguniri BIBLIA)

← Chapter 7 Jump to: Chapter 9 →

1O’du ’dasi opi Ahasueru fe oku opini Esiteri dri jo Hamani ari’bo ’ba Yahudini vileri. Azini Moridekai emu di ovu opi ma milia, Esiterini e’yoni ecele kini eri ini a’dini yarisi;

2te opi tru anziriku eri ma driamvaa erini trole Hamani ma driari, fe Moridekai dri. Te Esiteri ’ba Moridekaini Hamani vile jo ma drilia.

3Esiteri ’yo dika opi ma milia, eri eco i va eri ma palaa, eri ’ba matu eri vu wuzu mindresi, kini eri ma ku asu Hamani ’ba Agaginirini ja, e’yo erini otule ’yele ’ba Yahudini ma dri jazuri be ra.

4Te opi nga kali ini meleruri eju Esiteri vu,

5’dini Esiteri enga, pa so uru opi ma milia. Eri ’yo ra kini, E’yo ’di ka ovu onyiru opi milia, azini ma ka asi ndriza isu eri ma milia ra, e’yo nde ka ovu onyiru opi ma milia, azini e’yo mani ka ayiko fe eri milia, ma fe ’ba ma si waraga, waraga ndra Hamani Hamedata mvi ’ba Agaginirini fele ndra sile ’ba Yahudini ovupi angu dria opini ma alia ’diyi ma dri jazuri ojazu.

6A’disiku ma eco candi ngapi ecapi ’ba mani ’diyi ma driari ndrezaru ngoni ngoni ya? Kani ma eco ori’ba mani ma dri jaza ’di ndrezaru ngoni ngoni ya?

7’Di ma vutia opi nga ’yo Esiteri oku opiniri pi ma tia Moridekai Yahudioururi be, Emi ne, ma fe jo Hamanini Esiteri dri ’bo, yi ’i eri ngulupi pati sia ’bo, erini i dri ejule i ’ba Yahudini ’yezurisi.

8Te emi ma si waraga ekile emini lelerile ’ba Yahudini ma e’yosi opi ma rusi, emi ma bi waraga nderi ma ti oderisi, anziriku opi ma driamvaarisi; a’disiku waraga ovupi sizaru opi ma rusi azini tini obile oderisi anziriku opi ma drianivaarisiri, ’ba aluni econi ojazaru ku.

9’Ba omve ani ’ba waraga sipi opi vile ’diyi mba na omvele Sivaniri ma o’du kali iri drini narisi; yi si dria ekile Moridekaini azile ’ba Yahudini ma e’yosirile, ’ba opiru angu nyapi ’diyi pi dri, ’ba ambo ’diyi pie, ’ba ambo angu awaza dria ’diyi ma drilia ’diyi pie, engazu Indiaa cazu kpere Etiopiaa, angu turu alu drini kali iri drini aziri, ’ba si angu alu alu vu ekile yini ti yini silerile, azini suru alu alu vu yini ti yini ’yolerile, si vini indi ’ba Yahudini dri ekile yini ti yini silerile, yini ti yini ’yolerile indi.

10Eri si waraga opi Ahasueru ma rusi, eri bi tini oderisi anziriku opi ma driamvaarisi, eri pe waraga ’diri ti ojio tupi akanya dria ’diyi ma dria, akanya yini tuzu drinia ’diyi ovu akanya ongu be ’bani ani opi ma azi ngazu, akanya opini opele i dri anzi tizu ’diyini tile ’diyi.

11Waraga nde ma alia opi fe geri ’ba Yahudini ovupi aku dria ma alia ’diyi dri yi okuzu tualu a’di ’dizu idri yini pazu, okpo ngori engapi ’ba ngoyi eselia, kani angu awaza ngori alia, lepi dri arupi yi pie, anzi yini pie, oku pie ’diyi be, ’ba nde ’diyi dri jazu, ofuzu, inizu nyakuasi, azini afa yini opazu yiniru.

12Yi ma ’ye e’yo ’diri angu dria opi Ahasueruni ’diyia, mba mudri drini iri omvele Adariri ma o’du mudri drini narisi.

13’Ba ere waraga ’ diri ma siza aziniri azitaru angu awaza alu alu vusi dria, azizu ’ba dria dri, ’dini ’ba Yahudini ma ovu ngonde o’du ndesi avuarioti yini ofezu ari’ba yini dri beni.

14Ojio nzupi akanya ongu be u, ’bani ani azi opini ngazu ’diyi ma dria ’diyi yi enga mbele nzuzu, azita opinirini yi etulerisi; azita nde efu Susani aku opiniria.

15Moridekai enga di opi ma miliarisi, fu amve bongo suza bluru azini emveru opiniri be i ma ruaa, su vini i ma dria oku amboru meleru ’diniri’i, bongo izuru be bongo mile be nyiriaruri pisi okalakokalaruri be; aku Susanini dria o’be cere ayikosi.

16’Dini ’ba Yahudini yi ovu diza pi be, ayiko pie, oguta pie, inzita pie.

17Angu dria ma alia azini aku dria ma alia, pari dri dria azita opinirini kuzu aleniaria, ayiko ga ’ba Yahudini ma asia tre oguta be, yi ’ba omu amboru, o’du ava lizuri pie. ’Ba kakau ovupi angu nde ma alia ’diyi oja yi ’ba Yahudiniru, ruta ’ba Yahudini ruzurini ’dele yi driarisi.

← Chapter 7 Jump to: Chapter 9 →