Esther 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1Te eri nga eca ’dini o’du nasi Esiteri su afa suza erini opiniri eri mu pa sozu irii ovupi opi ma jo alialeruri ma tilia. De isu opi ri oguna opini jo alia otizaru jotile beri ma dria;

2eri ovu ’dini, opi ka Esiteri oku opiruri mire erini pa soria iriia amve, eri isu asi ndriza eri ma milia, azini opi nga di kali meleru nderi eju Esiteri vu. ’Dini Esiteri esi ogogo kali ’diri ma drile elozu.

3Opi zi eri tia kini, Mi le a’dini ya, Esiteri oku opiniri E’yo mini lele a’ileri ngoni ya? Ka tro ovu angu opini nyaleri ma ali ti, mi nga eri isu ra.

4Esiteri nga e’yo omvi eri tia kini, Ka ovu onyiru opi ma milia, opi ma emu andre tualu Hamani be, omu mani edele opi driri nyazu.

5Opi nga di azi kini, Emi ma omve Hamanini, ma emu mbele, ama ma ’ye ekile Esiterini ’yolerile. ’Dini opi pi Hamani be yi emu omu Esiterini edeleria.

6Yini patiefi ma su mvuria, opi ’yo Esiteri ma tia, Mi le a’dini ya? Mi nga isu ra. E’yo mini lele a’ileri ngoni ya? Ka tro ovu angu opini nyaleri ma ali ti, yi nga fe ra.

7Esiteri omvi e’yo, ’yo kini, E’yo mani lele a’ileri eri ’di:

8Ma ka asi ndriza isu opi ma milia ra, ka ovu onyiru eri milia e’yo mani leleri fezu, e’yo mani a’ileri ’yezu indi, opi ma emu Hamani be, omu mani ngale edele yi driri nyazu, te ma nga ’ye drusi ekile opini ’yolerile.

9Etu ’dasi Hamani eri fu ogutasi, asi ayikoru be. Te Hamani ka Moridekaini ndre kalitile opiniria, azini eri soni pa ku, ruani yani eri drilia ku, adra ga Hamani ma asia tre Moridekai vu.

10Te di Hamani oga i ceni, mvi i vile akua; eri pe ’ba ti ’ba eri ma agyiru ’diyi omvezu oku erini Zeresi be.

11Hamani eri olu e’yo yi tia lonyi dizaru ini pi ma dria, anzi o’biru ini ’diyi pie, e’yo dria opini eri ’bazu drile inzitaru ani ’diyi, eri ’bazu amboru aga ’ba amboru ra azini ati’ba opini ’diyi rari pie.

12Te Hamani ’yo kini, Esiteri oku opiniri a’ini ’ba azinini efizu opi be omu erini edeleri nyazu ku, te alu ma’i a’dule. Eri omve vini ma emuzu dru omu nyazu opi be dika.

13Te di, e’yo ’diyi dria koni ma aza ku, ma ka Moridekai ’ba Yahudini ndre erini riria kalitile opiniria.

14Oku erini Zeresi pi nga ’yo eri tia ’ba erini agyiru ’diyi be kini, Ma ede pati izuru oconi ma ovu wuale o’buko’bu kali towi, te dru o’bitisi mi ma ’yo opi tia kini, ma Moridekaini sinia uru; mi nga di mu tualu opi be omua ayikosi tu beni. E’yo amaza ’diri ovu onyiru Hamani ma milia, fe pati ’diri ede ra.

← Chapter 4 Jump to: Chapter 6 →