Ezra 5

Lugbara (E’yo Siza Alatararu Munguniri BIBLIA)

← Chapter 4 Jump to: Chapter 6 →

1Te nabiyi, nabi Hagai pi Zekar Ido mvi be, yi olu e’yo nabiru Yahudini ovupi Yerusalemua azini Yudaa ’diyi dri; yi olu e’yo yi dri Mungu Israeliniri ma rusi ani.

2Ka’dini Zerubabeli Sealitieli mvi pi nga di enga Yesua Yozadaki mvi be, yi e’do jo Munguni Yerusalemuari sizu, nabi Munguni yi ovu yi be indi yi ma aza kozu.

3Etu ’darisi Tatenai,ambo’badri cepi angu Yi Ara ma tia ’aa’dasiriari pi nga di emu yi vu, Setari-bozenai pie, agyi yini pie, ’yo yi ma tia kini, A’di azi emi tia jo ’diri sizu, abini dezu ’dinini ya?

4Yi ’yo vini yi ma tia ’dini, ’Ba jo ’diri sipi ’diyi ma ru a’dipiyi ya?

5Te isu Mungu yini ma mile ovu ’ba ’wara ’ba Yahudini ma dria, ’ba nde ogani yini azi ngakokoru ku, kpere e’yoni ngaria caria Dario vu, erini ngaria e’yoni omviria waragasi nde ma e’yosi.

6Waraga Tatenai ambo ’ba dri cepi angu Yi Ara ma tia ’aa’dasiriari pi, Setari-bozenai pie, agyi erini ’ba Afarisakini pie ovupi Yi Raza ma tia ’aa’dasia ’diyini sile opi Dario vuri ma e’yo sizari eri ’di’i;

7yi pe waraga ma ti eri vu, si alenia ’dini: Opi Dario, ama zi mi ci ci, asi anzuru ma ovu mi be.

8Opi ma ni ’dini kini ama mu angu Yudani ma alia, jo Mungu amboriniria. Si jo nde oni amborusi, ala pati abi dria indi; azi ’diri mu icimadri kokoru azini onyiru ’ba nde ma dria.

9Vutinia ama zi e’yo ’ba ’wara nde ’diyi ma ria, ama ’yo yi ma ria ’dini, A’di azi emi tia jo ’diri sizu azini abini dezu ’dinini ya?

10Ama zi vini ru yini indi, ama eco e’yoni ece mi dri ani, ama eco ’ba yi ma drilia ’diyi ma ru sizaru ani beni.

11Te yi omvi ama tia ’dinile: Ama ati’ba Mungu ’bu ’bapi nyaku berini, te ama jo ndra sile drio, opi amboru ’ba Israelinirini ndra sile deleniri si’i.

12Te atapi amani yi ka fe Mungu ’buarini ovuzu adrasi ’bo, eri nga yi fe Nebukadineza opi angu Babuloniari ma dria, eri ’ba Kalideyani jo ’diri ma dri japi, azini ’ba obipi jipi ’dale angu Babuloniari’i,

13Te eli oko Kuro opi Babuloniarini opi nyazurisi, opi Kuro azi azita jo Munguni ’diri sizuni.

14Te afazu dahaburu azini meleru jo Mungunirini, Nebukadinezani ndra o’dule engazu hekalu Yerusalemuari ma aliarisi, yi ejizu hekalu Babuloniari ma alia ’diyi, Opi Kuro o’du afa nde ’diyi hekalu Babuloniari ma aliasi, fe yi agu runi omvele Sesibazari, erini ’bale ambo ’ba dri cezuri dri, tani mbazu;

15’yo vini eri ma tia kini, Mi ’du afazu ’diyi, mi mu, mi ’ba yi hekalu ovupi Yerusalemuari ma alia, azini mi ku ma si jo Munguni i ma paria dika ani.

16’Dini agu Sesibazariru’diri emu ra, ’ba jo Munguni ovupi Yerusalemuari ma eti ra, te engazu etu ’dasi kpere curu’do ’ba nga jo nde si si ’dani, te kiri deni nga i ku.

17Ka’dini curu’do, e’yo ka ovu opi ma milia onyiru, ’ba ma nda ’dini jo opi ma afa ma ta mbazu ovupi ’dale Babuloniari ma alia, nizu kani opi Kuro azi azita jo Munguni ovupi Yerusalemua ’diri sizu ’dini tandi yani. ’Dini opi ma pe e’yo erini leleri ma ti ama vu e’yo ’disi.

← Chapter 4 Jump to: Chapter 6 →