Ezra 9

Lugbara (E’yo Siza Alatararu Munguniri BIBLIA)

← Chapter 8 Jump to: Chapter 10 →

1Te afa ’diyi ka yi ’ye ’bo, opianzi yi nga esi ma vu ogogo, kini, ’Ba Israelini piyi atalau edeta edepi ’diyi pie, ’ba Levini pie, coni nga yi ma esele ’ba angu ’dirini ’diyi be ku, yini ’yeta onzikanyaru ’yele ’ba ndeni ’yelerilerisi; yi ’ba Kananini piyi, ’ba Hitini pie, ’ba Perizini pie, ’ba Yebusini pie, ’ba Amonini pie, ’ba Moabuni pie, ’ba Misirini pie, ’ba Amorini pie dria.

2Yini ezoanzi yini jele okuru yi ma ngulupi dri, azini anzi yini dri indirisi; ’dini ori alatararuri osa i ’ba angu ndea ’diyi be. Ada, opianzi ’ba ambo ambo angu dri cepi ’diyi be, su yi dri oko ezata ’diri ma alia.

3Mani afa ’diri eriria, ma osi bongo mani, bongo mani amveri be, ma si dri’bi ma driari, azini ma ti’bi indi, ma nga di ri va osuta be tu.

4Vutinia ’ba dria ma yapi e’yo Mungu Isradinirini ’yolerisi, e’yo onzi ’ba ’bani obile jile ati’baru ’diyinisi ’diyi, nga yioku ma ve, te ma ri osuta be tu kpere etu ’bani afa feza ondresiri i fezuria.

5Etu ’bani afa feza ondresiri fezuria ma nga di enga, engazu mani ma ’bazu va afukokoru ’diniria, afa suza mani azini afa suza mani amveleruri be osizaru, te ma nga di ma eco va kumuti dria, ma aja ma dri Yehova Mungu mani vu;

6ma nga di ’yo: Mungu mani la, ma ovu drinzasi, azini ma mile ovu bizaru drinzasi tu mani ma mile engazu mi vu, Mungu mani; e’yo onzi amanini yi erele aga ama drilesirisi, azini e’yo onzi ama ndepi ’diyi aga ama drilesi zo uru kpere ’bua.

7Engazu ewu ama atapinisi e’yo onzi nde ama tu ecazu kpere curu’do; onzi amanirisi ama’i, opi amani ’diyi pie, atalau amani edeta edepi ’diyi pie, ovu ani fezaru opi angu ndea ’diyi dri, sei sia, ’ba bi ama ati’baru, eza ama afa ra, fe mile amani ovu bizaru drinzasi tu, ekile o’du curu’dorisirile.

8Te curu’do o’du weresi Yehova Mungu amani ece ama dri asi ndriza ’bo, ama joloko kuzu apazu, azini musumari fezu ama dri pari ini alatararuri ma alia, ’dini Mungu amani ma i angu ama milia ani, azini eri ma omvi ama asi were ombeza amani ma alia indi.

9A’disiku ama ati’baru; te kiri Mungu kuni nga ama ombeza amani ma alia ku, te eri fe yiki ama dri opi Perisiaa ’diyi ma milia, ama asi omvizu dika, Mungu amaniri ma jo sizu dika, azini pari alenia yi asupi va ’diyi ’bazu kilili, azini abi kaliru fezu ama dri angu Yudaa azini Yerusalemua.

10Te di Mungu amani la, e’yo ’diri ma vutia ama nga e’yo ’yo ngoni ya? Amani azita mini yi kule rarisi,

11mini azile ati’ba mini ’ba nabiru ’diyi ma tisi kini, Angu emini ngazu fizu alenia ’duzu eminiruri eri angu onzikanyaru, ’ba alenia ’diyini ovule onzikanyarurisi, ’yeta yini onzikanyaru fepi anguni gazu tre e’yo badakaru yinisi, engazu kala aluria kpere kala aziniria ’diyi ma e’yosi indi.

12E’yo ’disi emi ma fe ezoanzi emini anzi yini dri ku, emi ma je ezoanzi yini okuru anzi emini dri ku indi, azini vini emi ma nda asi anzuru pi fezu yi dri, drileba be ’dani ’dani aluni ku, ’dini emi ma ovu okpo be, azini emi ma nya afa onyiru angu ndeni ’diyi ani, azini emi ma ku eri awitaru anzi emini dri ’dani ’dani beni.

13Te ka tro e’yo ewaru eca ama ruaa, ’yeta amani onzikanyaru ’diyi ma e’yosi azini e’yo onzi amboru ama ndepiri ma e’yosi, ’dopi ti, isu de mi Mungu amaniri fe ama dri panga were dri fupi onzi amanile kuri, te mi ku ama azini jolokoru ’dipi;

14e’yo ’diyi ma vutia ama nga azita mini nyo dika, ama nga ama eci wa’diru ’ba suruni e’yo onzikanyaru ’yepi ’diyi be ra ya? Ka’dini mi ngani adri ama be adrasi kpere mini ama dri jaria teketeke, joloko acekokoru kani ’ba apapiri kokoru, ku ya?

15Yehova la; Mungu Israeliniri, mi ovu alatararu; ama ace ’ba jolokoru apapi ’bo ’diyi troa andru. Mi ndre, ama ovu mi milia e’yo onzi ama ndepiri ma alia; ’ba aluni econi pa sozaru mi drilia e’yo ’disini ku.

← Chapter 8 Jump to: Chapter 10 →