Ezra 6

Lugbara (E’yo Siza Alatararu Munguniri BIBLIA)

← Chapter 5 Jump to: Chapter 7 →

1’Dini opi Dario azi e’yoni, ’ba nga e’yo nde nda jo waraga ma ta mbazuri ma alia ani, pari lonyi ta mbazu Babuloniaria.

2’Ba nga di waraga trazaru isu Akimetaa, jo opini ovupi angu Medianiari ma alia, alenia si ndra e’yoni ci ’dini:

3Eli oko opi Kuroni e’dozu opi nyazurisi, opi Kuro azi azita ’dini: E’yo jo Munguni Yerusalemuarinisi, emi ku jo ma ovu sizaru, pari nde yini edeta fezuri, te ’ba ma ’ba etini okporu; oconi engazu va kpere ururi ma ovu wuale kali azia, walani ma ovu wuale kali azia indi;

4’ba ma ede eri oni amboru otizaru kurukuru mileko nasi, azini mileko alu pati o’dirusi; silingi azi ngazuri ma efu opi ma joa.

5’Ba ma omvi afazu meleru azini dahaburu jo Munguni vile ndra Nebukadinezani o’dule engazu hekalu Yerusalemuari ma alia, erini ejile Babulonia ’diyi, ’ba ma ji yi dika hekalu Yerusalemuaria, yi dria alu alu pari yini vu; te emi nga yi ’ba jo Munguni ma alia.

6E’yo ’disi curu’do, mi Tatenai ambo ’ba dri cepi Yi Ara ma tia ’aa’dasiriari la, mi Setari-bozenai pi, agyi emini ’ba Afarisakini ovupi Yi Ara ma tia ’aa’dasi ’diyi pie, emi ma da emi ’daasi re;

7emi ku azi jo Mungunini ’diri ma ovu; emi ku ambo ’ba Yahudini ma dri cepiri pi ’ba ’wara ’ba Yahudini ’diyi be, ma si jo Munguni ’diri i ma paria ani.

8De isu vini ma azi e’yo emini ngale ’yele ’ba ’wara ’ba Yahudini ’diyi vu, jo Munguni ’di ma ovu sizaru aniri: ’dini engazu lonyi opini ma alia, adaru engazu musoro ’bani ’ okule angu Yi Ara ma tia ’aa’dasiri ma alia, ’ba ma fe silingi azi ngazuri ’ba ’diyi dri ecekokoru, ma ici ani dri afaakosi ku beni.

9’Dini ’ba ma fe yi dri o’du vusi o’du vusi ’ciani ecekokoru afa yini lele ’diyi-afa veza vezu Mungu ’buari dri ’diyi, monio aluduru pie, kabilo agoru pie, kabilo anzi pie, anya pie, a’i pie, patiefi ma su pie, odu pie, ekile atalau edeta edepi Yerusalemua ’diyini azilerile-

10yi ma fe edeta arikariru Mungu ’buari dri ani, te yi ma zi Mungu opi pi ma idri ta mbazu anzi erini be.

11Ma ’ba azitani ’dini indi, ’ba ngapi e’yo ’diri ojapiri, ’ba ma nze pati jo erini ma driari alu, ’ba ma ’du eri uru ma so eri pati nderi ma sia, azini e’yo ’disi jo erini ma ofu ekile pari daka ’bazurile indio

12Azini Mungu fepi i ru ma ovu ’dale ’daniri ma onze opi dria ra, azini ’ba dria, ngapi yi ma dri ’bapi e’yo ’diri ojapi, jo Munguni ovupi Yerusalemuari ma dri jazu ’diyi ra. Ma’i Dario, ma ’ba azita ’diri ma’i; ’ba ma ’ye eri ecekokoru.

13’Dini Tatenai ambo ’ba dri cepi Yi Ara ma tia ’aa’dasiriari, Setaribozenai pi agyi yini pie, nga di ’ye dinile ecekokoru, a’disiku Darioni e’yo ’diri ma ti pele ’borisi.

14’Ba ’wara ’ba Yahudini ’diyi nga di jo si azini ’ye onyiru, oluta nabi Hagai pinisi Zekaria Ido mvi be. Yi si eri de ra, ekile azita Mungu Israelinirini azilerile, ekile vini azita Kuroni, azini Darioni, azini Aritaserisesi opi Perisiaarinirile;

15jo ’diri de i o’du na mba Adarinisi, eli azia opi Darioni opi nyazurisi.

16Te anzi Israelini piyi, atalau edeta edepi ’diyi pie, ’ba Levini pie, azini anzi ndra jile ati’baru angu azinia ’diyi ma joloko acepi ’diyi pie, ’ba omu amboru jo ’diri fezu Mungu dri ayikosi.

17Yini jo ’diri feria Mungu dri, yi fe monio turu alu, kabilo ranya turu iri, kabiloanzi turu su; azini edeta e’yo onzi Israeli driani edezu, yi fe ndriago mudri drini iri, kalafe suruti Israelini vusi.

18Yi ’ba atalau edeta edepi ’diyi amuti yini ma alia, ’ba Levini amuti yini vusi indi, inzita Mungu inzizu Yerusalemuarisi, ekile erini ovule sizaru azita Musani ma aliarile.

19Anzi ndra jile ati’baru ’diyi ’ba omu agaza ’ba drilesirini mba okori ma o’du mudri drini susi.

20Isu atalau edeta edepi ’diyi pi ’ba Levini be, yi ede yi rua dria tualu alaru ’bo; yi dria ovu alaru ani. Yi mga di kabilo omu agazani ’diyi oli anzi ndra lile ati’baru ’diyi pi dri, adripi yini atalau edeta edepi ’diyi pie, yi ma ngulupi pie indi.

21Anzi Israelini emupi pari ndra ’bani yi jizu ati’baruriasi ’diyi, azini ’ba dria e’yo ondiru ’ba jururu angu ndea ’diyini ’yeleri kupi, ti ecipi ’ba Israelini be Yehova Mungu Israeliniri ndruzu ’diyi, nya omu ndeni.

22Yi ’ba omu mikate akufi kokoruni o’du aziri ayiko be; Yehovani fele yi ma ovu ayiko berisi, azini erini opi Asuriaari ma asi ojale yi vurisi, drimbaza fezu yi dri azi jo Munguni, Mungu Israeliniri, ma alia.

← Chapter 5 Jump to: Chapter 7 →