Isaiah 3

Lugbara (E’yo Siza Alatararu Munguniri BIBLIA)

← Chapter 2 Jump to: Chapter 4 →

1Te mi ndre, Opi, Yehova asikari ongulumuruni, Enze Yerusalemu pi ma aliasi Yuda be aza koza yini lote be, adani eri nze aza koza enyaniri pi aza koza yi mvuzaniri be dria;

2’ba okporu, ’ba omba ’dipiri pie, ’ba e’yo ipiri pie, nabi pie, ’ba andri ndripiri pie, ’ba ’wara pie,

3asikari ’ba kali towi dri cepiri pie, ’ba ’bani inzileri pie, ’ba e’yo amapiri pie, onduou pie, ’ba uri etalipi onduasiri pie dria.

4Te ma nga anzi fe ovuzu opi yiniru, azini odekua nga yi dri ce opiru.

5Te ’ba nga yi inza ceni ceni, yi alu alu nga ovu inzazaru yi agyi dri, yi alu alu ’ba yi ma jo ejeleari dri; mvani nga ’ye afuru ’ba ’wara vu, ’ba inzita kokori nga ’ye afuru ’ba inzita beri vu ’dini.

6’Ba alu ka adripi ini bi i ati vile joa, kini: Mi ovu bongo be; mi ce di ama dri fo, aku andruru ’diri ma ovu di mi dria ani;

7o’du ’dasi eri nga di eri ma o’duko enga kini: Ma leni ovu ’ba ’ba atipiriru ku; ma vile joa enya yo, bongoi vini yo; emi ngani ma ’ba opiru ’ba ma drilia ku.

8A’disiku kumu si Yerusalemuni ra, te Yuda e’de va ’bo; yini omba ’bale Yehova be e’yo ’yoza yini pisi ’yeta yini berisi, eri ma mile dizani nini engazu aokoru.

9E’yo yini ’ba opezu operi eri e’yo eti nze yi ma ruaa; te yi e’da e’yo onzi yini ekile Sodomale, yi zini eri ku candi orindi yini dri! Yini yi ma ngulupi ’yele onzirisi.

10Mi ma ’yo ’ba kililiru ’diyi ma e’yosi, kini eri nga ovu onyiru eri dri, yini ngale ’yeta yini ma efi nyalerisi.

11Candi ’ba azi onzi ’yepiri dri! Eri nga ovu onzi eri dri, ’bani ngale dri erini ma ’yeta ma panga fele eri dririsi.

12Te ’ba mani yi ’dini-anzi inza yi ra, azini oku ce yi dri. Suru mani la! ’Ba emi dri cepi ’diyi fe emi aba aba, yi geri emini acizu alenia ’diyi ma dri ja.

13Yehovani pa so ’ba esuzu, eri pa so suru ndu ndu ma e’yo lizu.

14Yehovani nga fi e’yo lizu ’ba ’wara suru erini ma dri cepi ’diyi be, opi were yini be indi: ’Ba amvu pati zabibuni nyapi ’diyi bani emi’i, afa emini pale ’ba alioru ’diyi driri ovu jo eminia.

15Emini ’ba mani omizu ’diniri ma efi ngoni ya? Emi ’ba alioru ma andreti ’i a’disi ya? Opi ’yo ra, Yehova asikari ongulumuruni.

16Azini vini Yehova ’yo ra, Ezoanzi Zionia ’diyi yini ovule afusirisi yini acile ombele o’bezasi, azini mile acisirisi, yini acile afusirisi, yini aiyoro cole yi ma pasirisi;

17e’yo ’disi Opini nga ezoanzi Zionia ’diyi ma drini oti oti anzosi, azini Yehovani nga yi ma rua ma esele zizaruri ’ba pililiru.

18O’du ’dasi Opini nga emve yini ma afu nze ra, bongo drini ’bani cale cari pie, onyiafa wura mbaniri be ’diyi pie;

19nzia bia ’diyi pie, mele dria ’diyi pie, bongo ombelea, ’diyi pie;

20nyoro dria ’diyi pie, anziriku paa ’diyi pie, opilemvu pie, lu’bu odu arikariruni pie, siri’ba pie;

21anziriku drimvani pie, nzia omvua ’diyi pie;

22afa suza omua ’diyi pie, koti pie, bongo ’bele budria ’diyi pie, jurua pie;

23mandara were ’diyi pie, bongo mile be nyingirikia ’diyi pie, bongo dri ombezu ’diyi pie, bongo andreti a’buzu ’diyi pie dria.

24Te eri nga eca ’dini, afa aji be arikariruri ma paria afa mazani nga ovuni; opilemvu paria yi nga baka a’di’i; dri’bi edele onyiru ’diyi ma paria, ’ba dri nga ovu tuaru; bongo suza ma paria ’ba nga koliba su’i; nyibileko nga di ovu rua ndriza ma pariani.

25’Ba mini nga o’de seisi, ’ba mini okpo be ’diyi nga o’de omba ma alia.

26Kalitile erini nga wu, yi nga lulu: ga indi; eri nga ovu kuzaru pirini, eri nga ri va nyakua ra.

← Chapter 2 Jump to: Chapter 4 →