Isaiah 60

Lugbara (E’yo Siza Alatararu Munguniri BIBLIA)

← Chapter 59 Jump to: Chapter 61 →

1Mi enga, mi di di; diza minini ecale ’borisi, azini diza Yehovani efu mi dria ’bo.

2Te mi ndre, angu biza nga nyaku a’bu ci, azini ini asepi inideiruri nga suru ndu ndu a’bu ci; te Yehovani nga enga mi dria, azini yi nga diza erini ndre mi ruaa.

3Suru jururu ’diyi nga emu diza mini vu, azini opi yi nga emu efuza mini ma diza vu.

4Mi enga mi mile, mi ndre angu mi ageiari; yi dria oku yi tualu, yi emu mi vu; anzi mini nga emu engazu ziri, azini yi nga mi ezopi ’du yi ma wua.

5Etu ’dasi mi di nga ndre, mi nga ovu ani diza be, asi mini nga oya, eri nga ovu walaru; afa kakau miri ma alia ’diyini ngale i ojale mi vu, azini ’ba suru ndu ndu ’diyi ma lonyini ngale emule mi vurisi.

6Ngamia o’biru nga mi a’bu ci, ngamia ’ba Midiania ’diyi pini ’ba Efaa ’diyi be; yi dria nga enga Sebaasi. Yi nga di mele pi eji ajinguru be, yi nga ’yeta inzitaru Yehovani ma e’yo e’da’i.

7Kabilo o’biru Kedaria ’diyi dria nga yi oku mi vu, kabiloago Nebayotia ’diyi nga azi nga mi dri; yi nga tu pari mani edeta edezuri ma dria, ma nga yi a’i ra, ma nga diza mani ma jo ’ba dizaru.

8’Ba sapi iritile azini ekile a’balaule derisa yini vu ’diyi, yi a’dipi ya?

9Ada, angu miri tia ’diyi nga ma te ra, oguru Tarisisia ’diyi nga ma te okonini, agianzi mini ejizu engazu ziri, dahabu yini pie mele yini be tualu, Yehova Mungu mini ma rusi, Mungu Alatararu Israeliniri ma e’yosi, erini diza fele mi dri ’borisi.

10’Ba emuza ’diyi nga di abi mini si uru, opi yini nga vini azi nga mi dri; a’disiku ma co mi aoko mani ma alia, te asi ndriza manisi ma ’ba yiki mi vu ’bo.

11Kalitile mini nga ovu zizaru walaru’dani; ’ba ngani yi opi etusi kani inisi ku; ’ba ma ofi lonyi suru ndu nduni mi alia ani, opi yini ’bani dri cele mi ve ’diyi pie.

12A’disiku suru pi angu opini nvaleri be lepi azi ngapi mi dri kuri nga dri ja ra; ada, suru ’diyi nga ovu ezazaru teketeke ra.

13Diza Lebanonini nga eca mi vu, pati izuru pi, pati asarau pie, tualu pati masaruri be, pari alatararu mani ovuzu aleniari ’bazu ndrizaru ani; azini ma nga pari mani ma pa ’bazuri ’ba dizaru.

14Te ’ba ndra mi inzapi ’diyi ma anzi nga emu avuzu va mi vu; ’ba ndra mi ’bapi aparakaru ’diyi! dria nga avu va mi palaa; te yi nga mi ru ’da, Aku Yehovaniri’i, Zioni Mungu Alatararu Israeliniri vileri’i.

15Isu ndra ku mi toko, ngu ndra mi onzi, ’dini ’ba agani geri mi ma aliarisi ku ani, te curu’do ma nga mi ’ba ovuzu onyiru tu ’dani, ovuzu a’bianzi vile kakau ’diyi dri ayikoru.

16Mi nga suru ndu ndu ma basu ndru, mi nga vini ’ba opiru ’diyi ma ba ndru; azini mi nga ni kini ma’i, Yehova, ma ’Ba mi Papiri, mi Onzepiri’i, Mungu Okpo be tu Yakoboniri’i.

17Mola paria ma nga mele eji’i, aya paria ma nga dahabu eji’i; te pati ma paria, mola’i, oni ma paria, aya’i. Ma nga vini ’ba mi dri cepi ’diyi ma asi ’ba anzuru azini ma nga ’ba mi omipi afa fezasi ’diyi ma asi ’ba onyiru.

18Yi ngani vini ’ba fuza ari beri ma e’yo eri dika ku angu mini ma alia, yi ngani vini ezaza ’bani aku ezazuri pi ma e’yo eri kala mini ’diyia dri jata be ku; te mi nga abi mini ma ru ’da, Pata’i, azini kalitile mini mi nga runi ’da, Inzita’i.

19Etu ngani ovu diza miniru etusi dika ku mba ngani fe angu ma mve mi drini dika ku; te Yehovani nga ovu mi dri diza i depi kuriruni, Mungu mini nga ovu diza mini.

20Etu mini ngani ’de dika ku, mba mini ngani vini ’de dika ku indi; Yehovani ngale ovule diza mini ’dani ’danirisi, azini o’du mini ovuzu caridisi ’diyi nga asi ra.

21’Ba mini dria alu alu nga ovu onyiru; yi nga angu nya awitaru ’dani ’dani, yi ovu arakala mani isileri, azi ma drini ’yele mani ngazu diza isuzu aniri.

22’Ba wereru nga ezu ’ba alifu aluru, ’ba werearuri nga ovu suru okporu; ma’i Yehova, ma nga e’yo ’diri ’ye mbele ewu erini ka nga eca raria.

← Chapter 59 Jump to: Chapter 61 →