Isaiah 59

Lugbara (E’yo Siza Alatararu Munguniri BIBLIA)

← Chapter 58 Jump to: Chapter 60 →

1Mi ndre, Yehova ma dri ovuni alinaru, econi erini ani ’ba pazaru ku, ’dini ku, azini bile erini ovuni vini dirinyaru, econi erini ani e’yo erizaru ku, ’dini ku indi;

2te e’yo onzi emini co emi esele Mungu emini be ’bo, ezata emini ’diyi fe eri zi i ma mile emisi eri ma eri ku ani.

3Avuarini emi dri ezalerisi, drianzi emini eza yi e’yo onzisi; tile emini li inzo ’bo, andre emini ono e’yo onzisi ngurunguru indi.

4’Ba aluni yo ’ba esupi e’yo kililirurisiri, ’ba aluni yo e’yo adaru ma eti nzepiri; te yi ovu a’itasi e’yo tokonisi, yi inzo li, yi egata ’ba ezazuri ti, yi e’yo onzi osi’i.

5Yi ’boroa gbe oga, yi ibio ma emba ca; ’ba gbe yini nyapi ’diyi nga odra ra, azini mi ka gbe nde afu ra, ’boroani nga efuni.

6Ibio emba yini ngani yi oja yi dri bongoru ku; yi ngani vini yi a’bu ’yeta yinisi ku. ’Yeta yini yi ’yeta e’yo onzini ’diyi, yi ma dri ’ye eganasi,

7Yi ma pa nzu e’yo onzi vu, yi nzu ongusi ’ba e’yo onzi kokoru ’diyi ma ari adazu; asisile yini ovu asisile e’yo onziniri, ’ba ezazu teketekeri ovu yi ma geria dri ata be.

8Yi nini geri asi anzuniri ku, e’yo liza kililiru acita yini ma alia aluni yo; yi ede yi dri geri goligoliru ’diyi, ’ba acipi alenia ’diyi nini asi anzuru aluni ku.

9E’yo ’disi e’yo liza kililiru ovu ama vu ziri, onyi ecani vini ama vusi ku; ama diza ma mile ga ’dani, te mi ndre, inini, ama diza amboru ma mile ga, te ama aci angu biza ma alia.

10Ama abi rua ova drisi ekile ’ba angu ndrepi ku ’diyile, ada, ama angu nda paripari ekile ’ba mile kokoru ’diyile; ama aci truŋu truŋu etu agaduarisi ekile angu bipi manimanisirile, ama ovu ekile ’ba drapi ’bo ’diyile ’ba okporu ma eselia.

11Ama ono ngurule, ama wu candisi ekile a’balaule; ama e’yo liza kililiruri ma mile ga, te eri yo; ama pata ma mile ga, te eri ovu ama vu ziri

12E’yo onzi amanirini ezule tre mi miliarisi, azini e’yo onzi amanini e’yo eti nzele ama ruaarisi; a’disiku ezata amani ovu ama be, azini ama ni e’yo onzi amani ’diyi ra:

13amani ezata ezazuri, Yehova ma e’yo gazuri pie, amani ama ojazu kalaa Mungu amani ma vuti bizu kuri pie, amani inzata ’ba inzazuri ma e’yo, azini e’yo amani ombuzu amveri ma e’yo ’yozuri pie, amani e’yo inzoru egazu ama asia, e’yo nde ’yozu asi driasiri pie dria.

14E’yo liza kililiru oja i vile ’bo, onyi so pa re; a’disiku e’yo adari e’de va geria, azini e’yo kililiruri econi fizaru ku.

15Adaru, e’yo adari avi ra, azini ’ba e’yo onzi kupiri ’ba i ovuzu afa paza ’bani pale ombaarile. Yehova ndre e’yo ’diri ra, eri ovu candisi e’yo liza kililiruni ovule yorisi.

16Eri ndre ’ba yo, eri osu tu ’ba Mungu zipi e’yonisirini ovule yorisi; e’yo ’disi eri ji pata i dri dri inirisi, azini onyi erini edre eri uruni.

17Eri su onyi i ma agatia gombereru, azini biri pataniri i ma dria indi; eri su bongo arioti ofezaniri afa suzale, eri su ava i ma ruaa ekile bongo ’bezale.

18Eri nga afa ofe ’yeta yini vusi, eri nga adra omvi ’ba omba ’bapi eri be ’diyi dri, eri nga arioti ofeza ofe ari’ba erini dri; eri nga arioni ofeza ofe angu miri tia ’diyi dri indi.

19Geri ’disi ’ba nga ru Yehovaniri ru ani engazu angu etuni ’dezuria, azini yi nga diza erini ru engazu etuni efuria; erini ngale emule ekile yi rapi okposi Yehova ma avani drolerilerisi.

20Te ’Ba ’ba Onzepiri nga emu Zionia, ’ba yi ojapi ezata kupi Yakoboa ’diyi vu, Yehova ’yo ra.

21Te ma’i, ma ’ba aziza mani yi be ’dinile, Yehova ’yo ra: Orindi mani ovupi mi driari, azini e’yo ’yoza mani, mani ’bale mi tilia ’diyi, ngani mi tile ku ku, ngani vini ori mini ma tile ku ku, kani ngani anzi mi vile ’diyi ma ori ma tile ku ku, engazu curu’do kpere ’dani ’dani, Yehova ’yo ra.

← Chapter 58 Jump to: Chapter 60 →