Lamentations 1

Lugbara (E’yo Siza Alatararu Munguniri BIBLIA)

Jump to: Chapter 2 →

1Aku amboru ovupi mira ’ba be treri, ri pirini ’doni ya! Eri eca awuzioru ’doni ya! eri’i ndra ovupi amboru suru ma eseliari! Eri’i ovupi ndra opi zaaru angu awaza ma eseliari, eri ofu musoro ’bepiriru ’doni ya!

2Eri wu inisi tu, azini eri ma mindre osi eri ma o’boloa; ’ba eri lepi ’diyi ma eselia dria ’ba eri ma asi omipini yo; agyi erini dria yi ’ye eri vu lokirisi, yi oja yi eri ma ari’baru.

3Yuda mu ati’boru inzata amboru ma e’yosi, azi okporu ati’boniri ma e’yosi indi; eri adri juru ma eselia, eri isuni ava liza ku; ’ba dria eri ecandipi ’diyi isu eri pari ocokoru ma alia.

4Gboko Zionia ’diyi yi owu owu, a’disiku ’ba aluni emuni okuza inzizaruria ku; kalitile erini ’diyi dria andruru, atalau erini edeta edepi ’diyi yi ota ra; ezoanzi erini aliriaru ’diyi ovu ecandizaru, azini eri ma ngulupi ovu candi okangalikaru ma alia.

5’Ba omba ’bapi eri be ’diyi ofu drileru, azini ari’ba erini ofu drilebaru, a’disiku Yehova fe candi eri dri azi onzi erini o’biru ’diyisi ’bo; anzi nyiri erini mu ati’baru ’ba eri ecandipiri ma drilia.;

6Diza opini eriniri ku Zioni zini ’bo. Opianzi erini ’diyi oja yi kile yere iribi ndrupi ti ’diyile; azini yi mu okpo kokoru ’ba yi vuti dropi ’diyi ma drilia.

7O’du Yerusalemuni candi nyazu azini ovuzu ocoko berisi, eri ega afa ayiko fepi eri dri ewu driori ma alia’diyi ma e’yo. ’Ba erini ka o’de ’ba omba ’bapi eri be ’diyi ma drilia, ’ba eri ma aza kopini aluni yo, ’ba omba ’bapi eri be nde ’diyi ndre eri ra, yi ’ba eri oguaru erini i ojale tokorisi.

8Yerusalemu eza e’yo amboru, e’yo ’disi eri eca afa ondirurile; ’ba ndra eri inzipi ’diyi dria yi ede eri ede ede, yini rua erini pililiri ndrelerisi; ada eri ota ra azini oja i vivileru.

9Ondi erini ovu ndra bongo erini ma tia; eri egani asiza ini ma e’yo ku; e’yo ’disi eri esi va osutaru; ’ba eri ma asi omipini yo. Mi lu, Yehova la, inzata mani, a’disiku ari’boni i ’bale amborurisi!

10’Ba omba ’bapi eri beri eju i ma dri afa erini ayiko fepi ’diyi ma dria ci; a’disiku eri ndre ’ba toko fi pari erini alatararuria ’bo, ’ba ndra mini e’vo azile ma fi ’ba ongulemuru mini ma alia ku ’diyi,

11’Ba erini dria ota ota, yi nyaka nda; yi ofe afa yini ayiko fepi ’diyi nyakasi ’bo yi ma orindi egazu. Mi ndre, Yehova la, mi lu, mani ecale edemararurisi.

12Emi asini e’yo nderisi ku ya, emi dria alipi ageinisi ’diyi? Emi lu, emi ndre candi azini i sipi candi mani i ’yepi ma ruaari beri ka indi ya, candi Yehovani ma inzazu 0’du adra aciru erinirisiri’i.

13Engazu uru eri pe aci ma ti ma falaa, aci nde aga yi ’bo; eri ’be emba ma pa bizu; eri oja ma vile ’bo; eri gbu ma a’dule, fe asi mani fu etu zu.

14Eri ombe ezata mani ’diyi tualu kulumburu i ma drisi; yi eci yi tualu; etu ma embelia; eri fe ma okponi i dezu; Opi fe ma yi ma dria ’bo, ’ba mani ecozu pa sozu yi ma milia ku ’diyi.

15Opi ’ba ’ba mani okporu ’diyi ecazu dria toko ma eselia; eri omve okuza inzizaruri ma ruaa ’bo, karile mani anzizu. Opi tu Yuda zi aliriaru ekile pari pati su nzizuri ma aliarile ’bo.

16Ma owu e’yo ’diyisi owu ovu; ma mileni yo, ma mileni yo, eri ra yiru ’do’i yo; A’disiku ’ba ’ba asi omipi te ecopi ma orindi ’bapi o’dirurini ovule ma be rerisi; anzi mani yi pirini, a’disiku ari’bani agale rarisi.

17Zionini i ma dri eju, te ’ba aluni eri ma asi omipini yo; Yehova azi e’yo Yakobonisi kini, ’ba eri ma ageia kuru ’diyi ma ovu ’ba omba ’bapi eri be’diyi; Yerusalemuni yi ma eselia kile afa ondirule.

18Yehovani kililiruni, te ma’i ma mbu amve azita erini kuzu; emi eri, kirikiri, emi suru dria, emi lu candi mani; ezoanzi mani aliriaru ’diyi pi karile be yi mu ati’baa ’bo.

19Ma omve ’ba ma lepi ’diyi te yi ici ma ra; kuhani mani ’diyi pi ’ba ’wara mani ’diyi be odra aku amboru ndea ra, yini nyaka ndaria yi ma orindi egazu.

20Mi lu, Yehova la, mani ovule e’yo ewaru aliarisi; ma asi li li, ma asi ombu ombu mani mbule amve onzikanyarurisi. Amve amveleru seini olini; akua alialeru drani ’ba cini.

21Yi eri ’dini kini ma ota ra; ’ba ma asi omipini yo. Ari’ba mani dria eri candi mani ma e’yo ’bo; yi ovu ayikosi mini e’yo nderi ’yelerisi. Mi nga o’du mira mini azileri eji, ’ te yi nga ovu male.

22Mi fe azi onzi yini dria ma eca mi milia; azini mi ’ye yi vu ekile mini ’yele ma vu azi onzi dria mani ’diyisirile; a’disiku otaza mani yi kakau, ma asi fu ra.

Jump to: Chapter 2 →