Lamentations 4

Lugbara (E’yo Siza Alatararu Munguniri BIBLIA)

← Chapter 3 Jump to: Chapter 5 →

1Mele oja i urizaru ’doni, mele alatararuri oja i ’doni! Oni pari alatararuni ’diyi ovu erezaru gboko tia dria.

2Agupianzi Zionini afa aje be tu, ’bani ecole o’bile mele alatararusi ’diyi, ’ba ega yi ma e’yo ekile imvu sile odrisi, azi ’ba imvu sipiri ma dripamvule’doni!

3Ka tro obalako ti, yi ba fe ondruzu anzi yini dri ra, te suru mani ma zi eca yiki kokoru, ekile okondo roko dria ’diyile.

4Mva ba ndrupiri ma andre ibi i eri ma anakulea yi avijosi; anzi nyiri enya a’i, te ’ba tipi fepi yi drini yo.

5’Ba ndra adripi nyaka aluza nyapi’diyi yi ovu pirini gboko alia. ’Ba ndra adripi bongo ekaru supi ’diyi yi ola yi pari okurunya dazuria.

6A’disiku e’yo onzi ’ba mani ma ziniri ovu amboru aga ezata Sodomaniri ra, ndra ogule va rugbu coti, drini eloleni kuri’i.

7’Ba ’wara erini ’diyi ndra ovu alaru aga si emveruri ra, yi ovu ndra emveru aga lesu ra; yi ma rua walala aga ndra nyoro ekaru aje be amboru ’diyiniri ra, rua yini dozaru ovu ndra ekile oni aje ambosi safirarurile.

8Yi ma andreti ovu di inicici aga aci pelengu ra ’ba nini yi gbokoa ku; yi ma enyiriko odi nzu fala ruaa, eri onyu ra, eri oja i pati a’wile,

9Seini olile ’diyi ovu drilebaru aga ’ba odrapi abirisi ’diyi ra, a’disiku ’ba ’diyi oyi drile drile, abiri fi yi ma ruaa tre yini efi kaza amvuari nyale kurisi.

10Oku yiki be tu ’diyi a’di yi ma ngulupi ma anzi yi ma drisi; anzi nde ovu yi dri nyakaru o’du ’ba mani ma zini dri jazurisi.

11Yehova fe aoko erini ma ’ye ira, eri osu adra erini aciruri ’bo; azini eri e’du aci Zionia ’bo, jo eti erini vezu.

12Opi amboru nyakuni yi a’ini ku, kani, ’ba dria adripi angu wudrikurua ’diyi a’ini ku indi, kini, ’ba omba ’bapi eri be ’diyi pi nga fi kalitile Yerusalemu ’diyia ari’ba be.

13Eri ovu ’dini nabi erini ’diyi ma ezata pisi e’yo onzi kuhani erini ’diyini be, yini ’ba kililiru ’diyi ma ari adale eri ma eselia ’borisi.

14Yi aba aba gbokoa ekile ’ba mile kokoru ’diyile, yi ma mile bi bi arisi, ’ba econi ani yi ma bongo elozaru aluni ku.

15Emi nga ’dale, yi otre yi dria, Emi ondi be, emi nga, emi nga! Emi elo ku! Yini aparia azini abaria ’ba ’yo suru ’diyi ma eselia, Yi ma ovu ’dia dika ku.

16Adra Yehovani ere yi ’bo, eri ngani e’yo yini ega dika ku; yi runi ’ba kuhaniru ’diyi ma mile ku, inzini ’ba ’wara ku.

17Mile amani oro amani aza koza amani ma mile gale ’dani tirisi; amani teria ama te suru ecopi ama papi kuri.

18Yi ri ama pamvu obi, ’dini ama econi ani acizaru ama vile gbokoa ku; asiza amani ovu inyia; o’du amani de yi ’bo; asiza amanini ecale ’borisi.

19’Ba ama vuti dropi ’diyi ma ongu aga aji ’bua ’diyiniri ra; yi odro ama oni driasi, yi ri ama mba angu rokoaria.

20Ava ’yaza ama omvuleari, ’ba Yehovani odu osuzu drinia ’bo, ovu ndra bizaru awi yini ma alia, amani e’yoni ’yozu ani, Endri erini ma etia ama nga ovu idriru suru ma eseliari’i.

21Mi ’ba ayiko, mi ovu nyoŋasi Edomu zi la, mi’i adripi angu Uziniari’i; okeleani nga aga cazu kpere mi vu; mi nga ati ati, mi nga mi otru pililiru.

22Azi onzi miniri ma panga ’ye i ’bo, Zioni zi la, eri ngani mi ji ati’baa dika ku. Eri nga e’yo onzi miniri e’da ra fo, Edomu zi la, eri nga ezata mini ’diyi isu ra.

← Chapter 3 Jump to: Chapter 5 →