Lamentations 5

Lugbara (E’yo Siza Alatararu Munguniri BIBLIA)

← Chapter 4 Jump to:

1Yehova la, mi ega e’yo ecapi ama dria ’bori fo; mi lu, mi ndre o’data amani.

2Fe awita amani ani’ba dri, azini jo amani ’ba jururu ’diyi dri indi.

3Ama imvoanzini ata kokoru; ama andrepi yi ovu ekile awuzile.

4Ama mvu yi amaniri ajesi, ama je eja amani je je.

5’Ba ama vuti odropi ’diyi eca ama ombelea ’bo; ama ande tu, ama isuni ava liza ku.

6Ama eci ti ’ba Misiria ’diyi be, ’ba Asuriani ’diyi be indi, ama ma tra ani beni.

7Ama atapi yi eza ra, yi curu’do yo; te ama ’du azi onzi yini ama’i.

8Ati’ba yi ama nya opiruni; ’ba aluni ama opapi yi ma driani yo.

9Ama enya amani isu pi dra eselesi, sei angu roko driari ma e’yosi.

10Enyiriko amani dri dri ekile atiliko acile liki ma aci ama vepiri dri.

11Yi oru oku piyi okposi Zionia, ezoanzi aliriaru ’diyi be aku amboru Yudani ’diyi ma alia.

12A’di opianzi ma dri bakasi yi o’izu uru; inzini ’ba ’wara ’diyi ma mile ku.

13Karile yi ’du oni anya ’izuri; azini anzi nyiri ad parapara eja be dria.

14’Ba ’wara de yi kalitilea ra, azini karile ku o’di yini coko ja.

15Ayiko ama asiari de i ’bo; ongo tuza amani ayikoru oja i awu ongoru ’bo.

16Oku opiniri e’de ama driarisi va Candi ama dri ’do, amani ezale ’borisi!

17E’yo ’disi asi amani fu ani fu fu, e’yo ’disi mile amani asa asa,

18Oni Zionini ovupi piriniri ma e’yosi; obalako yi aci driniani,

19Mi’i Yehova la, mi ri opiru ’dani ’dani; oguna miniri ovu a’bianzi vusi, a’bianzi vusi.

20Ama tavi avi di mi dri ’dani a’disi ya, mini ama kuzu o’du izu ’dopi ’doni ya?

21Mi oja ama mi fo, Yehova la, ama nga ovu di ojazaru ani! mi ’ba o’du amani o’diru dika ekile okurile!

22Ka’dini yo, mi ’be ama iriti ’bo yani, te mi ovu ama vu adrasi tu.

← Chapter 4 Jump to: